Journalist Accreditation Panel Directed Set Up in Odisha: ରାଜ୍ୟରେ ୨ ମାସ ଭିତରେ ଗଠନ ହେବ ସାମ୍ବାଦିକ ଅଧିସ୍ୱୀକୃତି କମିଟି, ପିସିଆଇର କଡ଼ା ନିର୍ଦ୍ଦେଶ

ରାଜ୍ୟରେ କାର୍ଯ୍ୟରତ ସାମ୍ବାଦିକମାନଙ୍କ ସ୍ୱାର୍ଥ ସୁରକ୍ଷା ଓ ଅଧିସ୍ବୀକୃତି ପ୍ରକ୍ରିୟାକୁ ନେଇ ପ୍ରେସ୍ କାଉନସିଲ୍ ଅଫ୍ ଇଣ୍ଡିଆ (PCI) ଏକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଆଦେଶ ଜାରି କରିଛନ୍ତି। ଆସନ୍ତା ଦୁଇ ମାସ ମଧ୍ୟରେ ଓଡ଼ିଶାରେ ‘ସାମ୍ବାଦିକ ଅଧିସ୍ବୀକୃତି କମିଟି’ ଗଠନ କରିବା ପାଇଁ ପିସିଆଇ ରାଜ୍ୟ ସରକାରଙ୍କୁ କଠୋର ନିର୍ଦ୍ଦେଶ ଦେଇଛନ୍ତି।

ପ୍ରେସ୍ କାଉନସିଲ୍ ଅଫ୍ ଇଣ୍ଡିଆର ଅଧ୍ୟକ୍ଷା ଜଷ୍ଟିସ୍ ରଞ୍ଜନା ପ୍ରକାଶ ଦେଶାଈଙ୍କ ପ୍ରତ୍ୟକ୍ଷ ନିର୍ଦ୍ଦେଶକ୍ରମେ ଏହି ଗୁରୁତ୍ୱପୂର୍ଣ୍ଣ ରୁଲିଂ ଜାରି କରାଯାଇଛି। ପିସିଆଇ ସଦସ୍ୟ ପ୍ରସନ୍ନ ମହାନ୍ତିଙ୍କ ଦ୍ୱାରା ଉଠାଯାଇଥିବା ଅଭିଯୋଗକୁ ଆଧାର କରି କାଉନସିଲ୍ ଏହି ମାମଲାକୁ ଅତ୍ୟନ୍ତ ଗୁରୁତ୍ୱର ସହ ଗ୍ରହଣ କରିଛନ୍ତି। ଶୁଣାଣି ସମୟରେ ବିଗତ ୧୯ ବର୍ଷ ଧରି ରାଜ୍ୟରେ ଏହି କମିଟି ଗଠନ ନହୋଇ ପଡ଼ିରହିବାକୁ ନେଇ କାଉନସିଲ୍ ଗଭୀର ଚିନ୍ତା ବ୍ୟକ୍ତ କରିବା ସହ ସରକାରଙ୍କ ଅବହେଳା ଉପରେ ଗମ୍ଭୀର ପ୍ରଶ୍ନ ଉଠାଇଛନ୍ତି।

ଦୀର୍ଘ ବର୍ଷ ଧରି କମିଟି ଗଠନ ନହେବା ଫଳରେ ରାଜ୍ୟର ବହୁ କାର୍ଯ୍ୟରତ ସାମ୍ବାଦିକ ନିଜର ସରକାରୀ ସ୍ୱୀକୃତି ଓ ମୌଳିକ ସୁବିଧା ସୁଯୋଗରୁ ବଞ୍ଚିତ ହୋଇ ରହିଥିଲେ। ପିସିଆଇର ଏହି କଠୋର ନିର୍ଦ୍ଦେଶ ପରେ ଏବେ ରାଜ୍ୟ ସରକାର ନିର୍ଦ୍ଧାରିତ ସମୟସୀମା ମଧ୍ୟରେ କମିଟି ଗଠନ ପାଇଁ ପଦକ୍ଷେପ ନେବାକୁ ବାଧ୍ୟ ହେବେ, ଯାହା ସାମ୍ବାଦିକ ମୋର୍ଚ୍ଚା ଓ ଗଣମାଧ୍ୟମ ଜଗତରେ ଏକ ଆଶାର ସଞ୍ଚାର କରିଛି।

ଏହି ଆଦେଶ ଅନୁଯାୟୀ, ରାଜ୍ୟ ସରକାରଙ୍କୁ ନିର୍ଦ୍ଧାରିତ ଦୁଇ ମାସ ସମୟସୀମା ମଧ୍ୟରେ କମିଟି ଗଠନ କରିବାକୁ ପଡ଼ିବ, ଯାହା ଦ୍ୱାରା ଆବେଦନଗୁଡ଼ିକର ସଠିକ୍ ଓ ନିରପେକ୍ଷ ଯାଞ୍ଚ କରାଯାଇ ପରିଚୟ ପତ୍ର ପ୍ରଦାନ କରାଯାଇପାରିବ। ପିସିଆଇର ଏହି ପ୍ରତ୍ୟକ୍ଷ ହସ୍ତକ୍ଷେପ ଫଳରେ ଗଣମାଧ୍ୟମ କ୍ଷେତ୍ରରେ ସ୍ୱଚ୍ଛତା ଆସିବା ସହ କାର୍ଯ୍ୟରତ ସାମ୍ବାଦିକମାନଙ୍କ ପାଇଁ ଏକ ସୁରକ୍ଷିତ ଓ ଅନୁକୂଳ ପରିବେଶ ସୃଷ୍ଟି ହୋଇପାରିବ ବୋଲି ଆଶା କରାଯାଉଛି। ରାଜ୍ୟର ବିଭିନ୍ନ ସାମ୍ବାଦିକ ସଂଘ ଏହି ନିଷ୍ପତ୍ତିକୁ ସ୍ୱାଗତ କରିଛନ୍ତି।