ଯାଜପୁର ଜିଲ୍ଲାର କଳିଙ୍ଗନଗରଠାରେ ବୁଧବାର ଏକ ବୃହତ୍ ଶିଳ୍ପ କାର୍ଯ୍ୟକ୍ରମ ଆୟୋଜିତ ହେବ । ଏଥିରେ ୩୯,୩୮୨ କୋଟି ଟଙ୍କାର ୪୬ଟି ଶିଳ୍ପ ପ୍ରକଳ୍ପ ସାମିଲ ହେବ । ଏହି ପ୍ରକଳ୍ପଗୁଡ଼ିକ ଦ୍ୱାରା ୪୨,୫୧୨ ଜଣଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି ହେବ । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏଥିରେ ଯୋଗଦେଇ କେତେକ ପ୍ରକଳ୍ପର ଉଦ୍ଘାଟନ କରିବା ସହ ନୂଆ ପ୍ରକଳ୍ପର ଶିଳାନ୍ୟାସ କରିବେ । ଏହି ଅବସରରେ ଶିଳ୍ପପତି ଓ ନିବେଶକଙ୍କ ଏକକ ଆଲୋଚନା ହେବ । ଏଥିରେ ପ୍ରକଳ୍ପ କାର୍ଯ୍ୟକାରିତା, ନିବେଶକଙ୍କ ସମସ୍ୟା ଓ ରାଜ୍ୟରେ ଶିଳ୍ପ ସମ୍ପ୍ରସାରଣ ନେଇ ଆଲୋଚନା କରାଯିବ । ଶିଳ୍ପ ମନ୍ତ୍ରୀ ସମ୍ପଦ ଚନ୍ଦ୍ର ସ୍ୱାଇଁ, ମୁଖ୍ୟ ଶାସନ ସଚିବ ଅନୁ ଗର୍ଗ ଏବଂ ଶିଳ୍ପ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ହେମନ୍ତ ଶର୍ମାଙ୍କ ସମେତ ଅନ୍ୟ ଅଧିକାରୀମାନେ ଯୋଗଦେବେ । ଏହି ୪୬ଟି ପ୍ରକଳ୍ପ ଅନୁଗୁଳ, ବରଗଡ଼, ବାଲେଶ୍ୱର, ବୌଦ୍ଧ, କଟକ, ଢେଙ୍କାନାଳ, ଯାଜପୁର, ଜଗତସିଂହପୁର, କେନ୍ଦୁଝର, ଖୋର୍ଦ୍ଧା, ମୟୂରଭଞ୍ଜ, ପୁରୀ, ସମ୍ବଲପୁର ଓ ସୁନ୍ଦରଗଡ଼ ସମେତ ୧୪ଟି ଜିଲ୍ଲାରେ କାର୍ଯ୍ୟକାରୀ ହେବ । ଇସ୍ପାତ ଓ ଧାତୁ, ରାସାୟନିକ ପଦାର୍ଥ, ଅକ୍ଷୟ ଶକ୍ତି, ଖାଦ୍ୟ ପ୍ରକ୍ରିୟାକରଣ, ଜୈବ ଇନ୍ଧନ, ବୟନ ଓ ପୋଷାକ, ଇଲେକ୍ଟ୍ରୋନିକ୍ସ, ଆଇଟି ସେବା, ଲଜିଷ୍ଟିକ୍ସ, ଗୋଦାମ, ପର୍ଯ୍ୟଟନ, ଆତିଥେୟତା, ଶିଳ୍ପ ଗ୍ୟାସ୍, ଭିତ୍ତିଭୂମି, ରବର ଓ ପ୍ଲାଷ୍ଟିକ୍, ଜାହାଜ ନିର୍ମାଣ ଓ ମରାମତି, ଶକ୍ତି ସଂରକ୍ଷଣ, ରିଫ୍ରାକ୍ଟୋରିଜ୍, ସର୍କୁଲାର ଇକୋନୋମି ଏବଂ ସ୍ୱାସ୍ଥ୍ୟସେବା ଭଳି କ୍ଷେତ୍ରରେ ଏହି ପ୍ରକଳ୍ପ ହେବ । ଏହି ନିବେଶ ଦ୍ୱାରା ରାଜ୍ୟର ଶିଳ୍ପ ଉତ୍ପାଦନ ବଢ଼ିବା ସହ ସ୍ଥାନୀୟ ଉଦ୍ୟୋଗୀ ଓ କ୍ଷୁଦ୍ର, ଛୋଟ ଓ ମଧ୍ୟମ ଉଦ୍ୟୋଗଗୁଡ଼ିକ ଉପକୃତ ହେବେ । ନିର୍ମାଣ, ପରିବହନ ଓ ଅନ୍ୟାନ୍ୟ ସହାୟକ କ୍ଷେତ୍ରରେ ମଧ୍ୟ କାମର ସୁଯୋଗ ସୃଷ୍ଟି ହେବ । ଶିଳ୍ପ ମନ୍ତ୍ରୀ ସମ୍ପଦ ଚନ୍ଦ୍ର ସ୍ୱାଇଁ କହିଛନ୍ତି ଯେ, ସରକାରଙ୍କ ଲକ୍ଷ୍ୟ କେବଳ ନିବେଶ ଆଣିବା ନୁହେଁ, ବରଂ ଏହାକୁ ପ୍ରକଳ୍ପ, ନିଯୁକ୍ତି ଓ ଲୋକଙ୍କ ଜୀବନଜୀବିକାର ଉନ୍ନତିରେ ପରିଣତ କରିବା । ଅନ୍ୟପକ୍ଷରେ, ହେମନ୍ତ ଶର୍ମା କହିଛନ୍ତି ଯେ ନିବେଶକଙ୍କ ସମସ୍ୟାର ସମାଧାନ, ସେମାନଙ୍କ ଆବଶ୍ୟକତା ପୂରଣ ଏବଂ ବିଭିନ୍ନ ବିଭାଗ ମଧ୍ୟରେ ସମନ୍ୱୟ ଉପରେ ସରକାର ଗୁରୁତ୍ୱ ଦେଉଛନ୍ତି । Post navigation Baragada Dhanu Jatra: ଜାନୁଆରୀ ୧୨ ରୁ ୨୨ ପର୍ଯ୍ୟନ୍ତ ଅନୁଷ୍ଠିତ ହେବ ବରଗଡ଼ ଧନୁଯାତ୍ରା State Cabinet Approves 16 Proposals: ରାଜ୍ୟ କ୍ୟାବିନେଟ୍ରେ ୧୧ ବିଭାଗର ୧୬ ପ୍ରସ୍ତାବକୁ ମଞ୍ଜୁରୀ
