କେନ୍ଦ୍ର ସରକାରଙ୍କ ନୂତନ ଖଣି ଓ ଖଣିଜ ସଂଶୋଧନ ଆଇନ୍, ୨୦୨୬ (MMDR Act) କୁ ନେଇ ଓଡ଼ିଶା ବିଧାନସଭାରେ ବିରୋଧୀ ଦଳଗୁଡ଼ିକ ପ୍ରବଳ ହଙ୍ଗାମା କରିଛନ୍ତି। ସୋମବାର ସେପ୍ଟେମ୍ବର ୨୨ରୁ ଆରମ୍ଭ ହୋଇଥିବା ମୌସୁମୀ ଅଧିବେଶନର କ୍ରମାଗତ ପଞ୍ଚମ କାର୍ଯ୍ୟଦିବସରେ ବିରୋଧୀ ବିଜେଡି ଓ କଂଗ୍ରେସ ବିଧାୟକମାନଙ୍କ ହଙ୍ଗାମା ଯୋଗୁଁ ଗୃହ କାର୍ଯ୍ୟ ବାଧାପ୍ରାପ୍ତ ହୋଇଛି। ପ୍ରଶ୍ନକାଳ ଆରମ୍ଭ ହେବା ମାତ୍ରେ ସକାଳ ୧୦.୩୦ରେ ବିରୋଧୀ ବିଧାୟକମାନେ କଳା ସ୍କାର୍ଫ ପିନ୍ଧି ଓ ହାତରେ ପ୍ଲାକାର୍ଡ ଧରି ଗୃହର ମଝି ଭାଗକୁ ଓହ୍ଲାଇ ହଟ୍ଟଗୋଳ କରିଥିଲେ। କିଛି ବିଧାୟକ ରିପୋର୍ଟରମାନଙ୍କ ଟେବୁଲ୍ ଉପରେ ଛିଡ଼ା ହୋଇଥିବା ବେଳେ ଆଉ କିଛି ବାଚସ୍ପତିଙ୍କ ପୋଡିୟମ୍ ନିକଟରେ ନାରାବାଜି କରିଥିଲେ। ବାଚସ୍ପତି ସୁରମା ପାଢ଼ୀ ସଭ୍ୟମାନଙ୍କୁ ଶାନ୍ତ ହେବାକୁ ଅନୁରୋଧ କରିଥିଲେ ମଧ୍ୟ କୌଣସି ସୁଫଳ ନମିଳିବାରୁ ମାତ୍ର ୭ ମିନିଟ୍ର କାର୍ଯ୍ୟକାରିତା ପରେ ଗୃହକୁ ୧୧.୩୦ ପର୍ଯ୍ୟନ୍ତ ମୁଲତବୀ ଘୋଷଣା କରାଯାଇଥିଲା। ପରେ ଗୃହ ପୁନର୍ବାର ଆରମ୍ଭ ହେବା ପରେ ବିଜେଡି ବିଧାୟକମାନେ ଗୃହରୁ ୱାକଆଉଟ୍ କରି ବିଧାନସଭା ବାହାରେ ଚାଲିଥିବା ଦଳୀୟ ବିକ୍ଷୋଭ ରାଲିରେ ଯୋଗ ଦେଇଥିଲେ। ଅପରପକ୍ଷରେ, କଂଗ୍ରେସ ବିଧାୟକମାନେ ଗୃହ ଭିତରେ ହଟ୍ଟଗୋଳ ଜାରି ରଖିଥିଲେ। ହଙ୍ଗାମା ନଥମିବାରୁ ବାଚସ୍ପତି ଗୃହକୁ ଅପରାହ୍ନ ୪ଟା ପର୍ଯ୍ୟନ୍ତ ମୁଲତବୀ ରଖିଛନ୍ତି। Post navigation Paneer Adulteration Crackdown: ପନିର ଓ ଛେନା ଅପମିଶ୍ରଣ ମାମଲା: ନିଆଳିରେ ୨୭୫ ଜଣଙ୍କ ନାଁରେ ହୋଇଛି ଏତଲା MMDR Amendment Act: MMDR ସଂଶୋଧନ ଆଇନ ବିରୋଧରେ ବିଜେଡିର ଆନ୍ଦୋଳନ: ଲୋୟର PMGରେ ଗର୍ଜିଲେ ହଜାର ହଜାର କର୍ମୀ
