ମାଛ କଲା ମାଲାମାଲ: ଜାଲରେ ପଡ଼ିଲା ୧ କୋଟି ଟଙ୍କାର ୯୦ଟି ତେଲିଆ ଭୋଳା ମାଛ

ରାତାରାତି କୋଟିପତି ହେଲେ ମାଛଧରାଳୀ। ଜାଲରେ ପଡ଼ିଲା ୧ କୋଟି ଟଙ୍କାର ୯୦ଟି ତେଲିଆ ଭୋଳା ମାଛ । ଓଡିଶା ସୀମାନ୍ତବର୍ତ୍ତୀ ପଶ୍ଚିମବଙ୍ଗ ଦୀଘା ମୁହାଣରେ ମତ୍ସ୍ୟଜୀବୀଙ୍କ ଜାଲରେ ପଡ଼ିଲା ତେଲିଆ ଭୋଳା ମାଛ । ପ୍ରତି ମାଛର ଓଜନ ୩୦ରୁ ୩୫ କେଜି । ପ୍ରାୟ ଏକ କୋଟି ଟଙ୍କାରେ ମାଛ ସବୁ ନିଲାମ କରାଯାଇଛି । କୋଲକାତାର ଏକ ଫାର୍ମା କମ୍ପାନୀ ଏହି ମାଛକୁ ପ୍ରାୟ ୧ କୋଟିରେ କିଣିଛି । ଏହି ମାଛର ପିତ୍ତ ଓ ଅନ୍ୟାନ୍ୟ ଅଂଶ ଔଷଧ ତିଆରିରେ ବ୍ୟବହାର ହୋଇଥାଏ ।

ସୂଚନା ଯୋଗ୍ୟ; ଗତକାଲି ଓଡିଶା ସୀମାନ୍ତବର୍ତ୍ତୀ ପଶ୍ଚିମବଙ୍ଗ ଦୀଘା କିଛି ମତ୍ସ୍ଯଜୀବୀ ଗଭୀର ସମୁଦ୍ରକୁ ମାଛ ମାରିବା ପାଇଁ ଯାଇଥିବା ବେଳେ ଜାଲରେ ତେଲିଆ ଭୋଲା ମାଛ ପଡ଼ିଥିଲେ । ମାଛ ଦେଖିବା ଲାଗି ଉତ୍ସୁକ ମତ୍ସ୍ୟଜୀବୀ ଓ ପର୍ଯ୍ୟଟକଙ୍କ ଅସମ୍ଭବ ଭିଡ଼ ଜମିଛି । ପ୍ରତିଥର ପରି ଏଥର ମଧ୍ୟ ଗୋଟିଏ ନୁହେଁକି ଦୁଇଟା ନୁହେଁ, ୯୦ଟି ତେଲିଆ ଶିଳା ମାଛ ଧରା ପଡ଼ିଛି ।

ଏହି ମାଛର ପିତ୍ତ ଓ ଅନ୍ୟ ଅଂଶ ଜୀବନ ରକ୍ଷାକାରୀ ଔଷଧ ଓ ପ୍ରସାଧନ ସାମଗ୍ରୀ ତିଆରିରେ ବ୍ୟବହୃତ ହୋଇଥାଏ । ଏହି ମାଛ ବିଦେଶକୁ ମଧ୍ୟ ରପ୍ତାନି କରାଯାଇ ଥାଏ, ସେଥିପାଇଁ ତେଲିଆ ଭୋଲା ମାଛର ବେଶ ଚାହିଦା ରହିଛି ।

ବିଶେଷଜ୍ଞମାନେ ଉଲ୍ଲେଖ କରିଛନ୍ତି ଯେ ତେଲିଆ ଭୋଳା ସାଧାରଣତଃ ଗଭୀର ସମୁଦ୍ର ଜଳରେ ମିଳିଥାଏ ଏବଂ ସମୁଦ୍ର ପର୍ବତ ନିକଟରେ ବହୁତ କମ୍ ଧରାଯାଏ। ମାଛର ମୂଲ୍ୟ ଏହାର ଲିଙ୍ଗ, ଆକାର ଏବଂ ଓଜନ ଦ୍ୱାରା ନିର୍ଣ୍ଣୟ କରାଯାଏ।