ମହାପ୍ରଭୁ ଶ୍ରୀ ଜଗନ୍ନାଥଙ୍କ ପବିତ୍ର ସ୍ନାନଯାତ୍ରାକୁ ଦୃଷ୍ଟିରେ ରଖି ପୁରୀ ସହରରେ କଡ଼ା ସୁରକ୍ଷା ଓ ଟ୍ରାଫିକ କଟକଣା ଲାଗୁ କରାଯାଇଛି । ପ୍ରେସ୍ମିଟ୍ରେ ପୁରୀ ଏସ୍ପି ପ୍ରତୀକ ସିଂ ସମସ୍ତ ବ୍ୟବସ୍ଥା ସମ୍ପର୍କରେ ସୂଚନା ଦେଇଛନ୍ତି । ସ୍ନାନଯାତ୍ରା ସମୟରେ ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମକୁ ଦୃଷ୍ଟିରେ ରଖି ସହରର ଟ୍ରାଫିକ୍ ରୁଟ୍ ଓ ପାର୍କିଂକୁ ସମ୍ପୂର୍ଣ୍ଣ ପୁନଃନିର୍ଦ୍ଧାରିତ କରାଯାଇଛି । ଭୁବନେଶ୍ୱର ପଟୁ ଆସୁଥିବା ଗାଡ଼ିଗୁଡ଼ିକ ପାଇଁ ମାର୍କେଟ ଛକରେ ପାର୍କିଂ ବ୍ୟବସ୍ଥା କରାଯାଇଥିବା ବେଳେ ସମୁଦ୍ର କୂଳକୁ ଯାଉଥିବା ଶ୍ରଦ୍ଧାଳୁଙ୍କୁ ଦିଗବାରେଣୀ ନିକଟରେ ଗାଡ଼ି ରଖିବାକୁ ପଡ଼ିବ । ପୁରୀ ଅଭିମୁଖେ ଆସୁଥିବା ସମସ୍ତ ବସ୍କୁ ମାଳତୀପାଟପୁରରେ ଅଟକାଯିବ । ସେଠାରୁ ଶ୍ରଦ୍ଧାଳୁମାନେ ସିଟି ବସ୍ରେ ଶରଧାବାଲି ଏବଂ ଟୁରିଷ୍ଟ ବସ୍ରେ ତାଳବଣିଆ ପର୍ଯ୍ୟନ୍ତ ଆସିପାରିବେ । ସିଟି ରୋଡ୍ରେ କୌଣସି ବଡ଼ ବସ୍ ଚଳାଚଳ ଉପରେ ସମ୍ପୂର୍ଣ୍ଣ କଟକଣା ଲାଗିବ ଏବଂ ଶ୍ରୀମନ୍ଦିରକୁ ସଂଯୋଗ କରୁଥିବା ସମସ୍ତ ରାସ୍ତାରେ ଯାନବାହନ ପ୍ରବେଶ ନିଷିଦ୍ଧ ରହିବ । ଦର୍ଶନ ବ୍ୟବସ୍ଥାକୁ ଶୃଙ୍ଖଳିତ କରିବା ପାଇଁ ଶ୍ରଦ୍ଧାଳୁମାନେ ସିଂହଦ୍ୱାର ଦେଇ ଶ୍ରୀମନ୍ଦିରେ ପ୍ରବେଶ କରିବେ ଓ ଉତ୍ତର ଦ୍ୱାର ଦେଇ ପ୍ରସ୍ଥାନ କରିବେ । ସମ୍ପୂର୍ଣ୍ଣ ବଡ଼ଦାଣ୍ଡ ସମେତ ଶ୍ରୀମନ୍ଦିର ଚାରିପଟେ କଡ଼ା ସିସିଟିଭି ନଜର ରଖାଯାଇଛି । ଶ୍ରୀମନ୍ଦିର ଭିତରେ ୫୨ଟି ଓ ବାହାରେ ୨୫୦ଟି ସିସିଟିଭି କ୍ୟାମେରା ସହ ସହରର ବିଭିନ୍ନ ସମ୍ୱେଦନଶୀଳ ସ୍ଥାନରେ ଆଉ ୩୦ଟି କ୍ୟାମେରା ଜରିଆରେ ପୋଲିସ ୨୪ ଘଣ୍ଟିଆ ମନିଟରିଂ କରିବ । ଏସ୍ପି ପ୍ରତୀକ ସିଂ କହିଛନ୍ତି ଯେ ସ୍ନାନଯାତ୍ରା ସମୟରେ ଭିଡ଼ ନିୟନ୍ତ୍ରଣ ଓ ଶାନ୍ତିଶୃଙ୍ଖଳା ରକ୍ଷା ପାଇଁ ପୋଲିସ ପ୍ରଶାସନ ସମ୍ପୂର୍ଣ୍ଣ ପ୍ରସ୍ତୁତ । ସେ ଶ୍ରଦ୍ଧାଳୁମାନଙ୍କୁ ଟ୍ରାଫିକ ନିର୍ଦ୍ଦେଶନାମା ଓ ସୁରକ୍ଷା ନିୟମ ମାନିବାକୁ ଅନୁରୋଧ କରିଛନ୍ତି । ଆଇଜିପି ସେଣ୍ଟ୍ରାଲ୍ ରେଞ୍ଜ ଡକ୍ଟର ସତ୍ୟଜିତ୍ ନାୟକ ଏବଂ ପୁରୀ ଏସପି ପ୍ରତୀକ ସିଂହ ଜୁନ୍ ୨୯ ତାରିଖରେ ହେବାକୁ ଥିବା ଦେବସ୍ନାନ ପୂର୍ଣ୍ଣିମା ପାଇଁ ସୁରକ୍ଷା, ଟ୍ରାଫିକ୍ ଏବଂ ଭିଡ଼ ପରିଚାଳନା ବ୍ୟବସ୍ଥା ସମୀକ୍ଷା କରିଥିଲେ । ପ୍ରଭୁ ଜଗନ୍ନାଥ, ପ୍ରଭୁ ବଳଭଦ୍ର, ଦେବୀ ସୁଭଦ୍ରା ଏବଂ ସୁଦର୍ଶନଙ୍କ ସ୍ନାନ ଯାତ୍ରା ପାଇଁ ପ୍ରାୟ ୩-୪ ଲକ୍ଷ ଭକ୍ତ ପୁରୀ ଆସିବାର ଆଶା କରାଯାଉଛି । ଓଡିଶା ପୋଲିସ ବରିଷ୍ଠ ଅଧିକାରୀ ଏବଂ ସ୍ୱତନ୍ତ୍ର ୟୁନିଟ୍ ସହିତ ୭୯ ପ୍ଲାଟୁନ୍ ଫୋର୍ସ ମୁତୟନ କରିଛି, ଯେଉଁଥିରେ QAT, ସ୍ନିଫର କୁକୁର, ଛାତ ଉପରେ ନଜର ରଖିବା ଏବଂ ICCC ମନିଟରିଂ ଅନ୍ତର୍ଭୁକ୍ତ । ମହୋତ୍ସବର ସୁଗମ ଏବଂ ଶାନ୍ତିପୂର୍ଣ୍ଣ ପରିଚାଳନା ସୁନିଶ୍ଚିତ କରିବା ପାଇଁ ଟ୍ରାଫିକ୍, ପାର୍କିଂ, ଜରୁରୀକାଳୀନ ପ୍ରତିକ୍ରିୟା ଏବଂ ତୀର୍ଥଯାତ୍ରୀ ସହାୟତା ବ୍ୟବସ୍ଥା ବିସ୍ତୃତ କରାଯାଇଛି । Post navigation Amit Shah to confer ‘President’s Colour’ to Odisha Police Snana Purnima 2026: ଆଜି ରାତି ସାଢ଼େ ୧୦ଟାରୁ ସାଢ଼େ ୧୪ ଘଣ୍ଟା ଶ୍ରୀମନ୍ଦିରରେ ଶ୍ରୀଜିଉଙ୍କ ସାଧାରଣ ଦର୍ଶନ ବନ୍ଦ
