ସୌମ୍ୟ ରଞ୍ଜନ ବିଶ୍ୱାଳ ପାଇଲେ ପ୍ରଥମ ମନୀଷ ଯୁବ ପୁରସ୍କାର

ଆଜି ଭୁବନେଶ୍ୱର ସ୍ଥିତ ମେ ଫେୟାର ଠାରେ ଦୈନିକ ସମ୍ବାଦ ନିର୍ଭୟ ପକ୍ଷରୁ ଆୟୋଜିତ ‘ମନୀଷ ସ୍ମାରକୀ’ ନିର୍ଭୟ ଯୁବ ପୁରସ୍କାର କାର୍ଯ୍ୟକ୍ରମରେ ଯୁବ ପରିବେଶବିତ୍ ସୌମ୍ୟ ରଞ୍ଜନ ବିଶ୍ୱାଳଙ୍କୁ ପ୍ରଥମ ନିର୍ଭୟ ଯୁବ ପୁରସ୍କାର ପ୍ରଦାନ କରାଯାଇଛି ।

ପୁରୀ ଜିଲା ଅସ୍ତରଙ୍ଗର ସୌମ୍ୟ ରଞ୍ଜନ ବିଶ୍ୱାଳ ପରିବେଶ ଏବଂ ଅଲିଭ୍‌ ରିଡ୍‌ଲେ (ସାମୁଦ୍ରିକ କଇଁଛ)ଙ୍କ ସୁରକ୍ଷା ଉପରେ କାର୍ଯ୍ୟ କରୁଛନ୍ତି ।

ପ୍ରଥମେ ଏକ ଆଲୋଚନା ଚକ୍ର ଅନୁଷ୍ଠିତ ହୋଇଥିଲା । ଏହି ଆଲୋଚନା ଚକ୍ରରେ ପାଟକୁରା ବିଧାୟକ ଅରବିନ୍ଦ ମହାପାତ୍ର, ବିଶିଷ୍ଟ ଅଭିନେତ୍ରୀ ଅନୁ ଚୌଧୁରୀ, ଶିଳ୍ପ ଉଦ୍ୟୋଗୀ ପ୍ରିୟଙ୍କା ମହାନ୍ତି ଏବଂ ଓଡ଼ିଶାର ବିଖ୍ୟାତ ଟେନିସ ତାରକା ଚିନ୍ମୟ ପ୍ରଧାନ ମନୀଷ ଦାସଙ୍କ ପ୍ରତିମୂର୍ତ୍ତିରେ ଶ୍ରଦ୍ଧା ସୁମନ ଅର୍ପଣ କରିଥିଲେ ।

ଏହି କାର୍ଯ୍ୟକ୍ରମରେ ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ଉତ୍ତର ପ୍ରଦେଶର ସଫଳ ସାହିତ୍ୟିକା ନିରଜା ମାଧବ, ବିଶିଷ୍ଟ ବାଲୁକା କଳାଶିଳ୍ପୀ ପଦ୍ମଶ୍ରୀ ସୁଦର୍ଶନ ପଟ୍ଟନାୟକ, ନିର୍ଭୟ ସମ୍ପାଦକ ତଥା ବରିଷ୍ଠ ସାମ୍ବାଦିକ ନବୀନ ଦାସଙ୍କ ସହ ପ୍ରମୁଖ ଅତିଥି ବୃନ୍ଦ ଉପସ୍ଥିତ ଥିଲେ ।

ନିର୍ଭୟର ପ୍ରଥମ ଡମି କପି ୨୦୧୩ ଅକ୍ଷୟ ତୃତୀୟା ଦିନ ଛପା ଯାଇଥିଲା । ତେଣୁ ଆଜି, ପବିତ୍ର ଅକ୍ଷୟ ତୃତୀୟା ଦିନ ନିର୍ଭୟ ପରିବାର ତରଫରୁ ପ୍ରଥମ ‘ମନୀଷ ସ୍ମାରକୀ’ ନିର୍ଭୟ ଯୁବ ପୁରସ୍କାର ଉତ୍ସବ ପାଳନ କରାଯାଇଛି ।

ବରିଷ୍ଠ ସାମ୍ବାଦିକ ନବୀନ ଦାସଙ୍କ ପୁଅ ମନୀଷ ଅନୁରାଗଙ୍କ ସ୍ମୃତିରେ ନିର୍ଭୟ ପରିବାର ତରଫରୁ ପ୍ରତି ବର୍ଷ ଅକ୍ଷୟ ତୃତୀୟା ଦିନ ‘ମନିଷ ସ୍ମାରକୀ ଯୁବ ପୁରସ୍କାର’ ପ୍ରଦାନ କରାଯିବ । ୩୦ ବର୍ଷ ବୟସ ମଧ୍ୟରେ ସାହିତ୍ୟ, ପରିବେଶ, ସମାଜ ସେବା, କଳା ଏବଂ ଶିକ୍ଷା କ୍ଷେତ୍ର ରେ ବିଶେଷ ପାରଦର୍ଶିତା ଅର୍ଜନ କରିଥିବା ଜଣଙ୍କୁ ଏହା ଦିଆଯିବ ।