ଅମିତ ଶାହ ଦ୍ଵିତୀୟ ଶ୍ରେଷ୍ଠ ପୋଲିସ ଷ୍ଟେସନ ଭାବେ ଗଞ୍ଜାମ ଜିଲ୍ଲା ପାଟପୁର ଥାନା କୁ କଲେ ସମ୍ମାନିତ

ଅଖିଳ ଭାରତୀୟ ଡିଜିପି/ଆଇଜିପି ସମ୍ମିଳନୀ-୨୦୨୪ ଆଜି ଭୁବନେଶ୍ୱରର ଲୋକ ସେବା ଭବନରେ ଆରମ୍ଭ ହୋଇଛି। ଏହି ସମ୍ମିଳନୀରେ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ଗଞ୍ଜାମ ଜିଲ୍ଲାର ପାଟପୁର ଥାନାକୁ ଦେଶର ଦ୍ୱିତୀୟ ଶ୍ରେଷ୍ଠ ଥାନା ଭାବେ ସମ୍ମାନିତ କରିଥିଲେ।

ରାଜ୍ଯ ଡିଜିପି ୱାଇ. ବି. ଖୁରାନିଆ ଏହି ସମ୍ମିଳନୀରେ ଯୋଗ ଦେଇ ଓଡ଼ିଶା ପୋଲିସ ପାଇଁ ଏହି ପୁରସ୍କାର ଗ୍ରହଣ କରି ଗର୍ବ ଓ ସମ୍ମାନ ବ୍ଯକ୍ତ କରିଥିଲେ। ଡି. ଜି. ପି. ଖୁରାନିଆଙ୍କ ତତ୍ତ୍ୱାବଧାନରେ, ପୋଲିସ ଷ୍ଟେସନ ଭିତ୍ତିଭୂମି ବିକାଶ କରିଥିଲା। ଏହି ଅବସରରେ ଡି. ଜି. ପି. ଖୁରାନିଆ ଗଞ୍ଜାମ ଏସ୍. ପି. ସୁଭେନ୍ଦୁ କୁମାର ପାତ୍ରଙ୍କ ସମେତ ରାଜ୍ଯ ଓ ଜିଲ୍ଲା ପୋଲିସର ଅଧିକାରୀ ଓ କର୍ମଚାରୀଙ୍କୁ ଅଭିନନ୍ଦନ ଜଣାଇଛନ୍ତି।

ଉଲ୍ଲେଖନୀୟ କଥା ହେଉଛି, କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରଣାଳୟ ପ୍ରତିବର୍ଷ ଅପରାଧ ହାର, ତଦନ୍ତ, ମାମଲାର ସମାଧାନ ଏବଂ ଜନସାଧାରଣଙ୍କୁ ଗୁଣାତ୍ମକ ସେବାର ବ୍ଯବସ୍ଥା ସମେତ ବିଭିନ୍ନ ମାନଦଣ୍ଡ ଆଧାରରେ ଶ୍ରେଷ୍ଠ ପୋଲିସ ଷ୍ଟେସନ ପୁରସ୍କାର ପାଇଁ ସାରା ଦେଶର ପୋଲିସ ଷ୍ଟେସନଗୁଡ଼ିକୁ ଚୟନ କରିଥାଏ।

ପାଟପୁର ପୋଲିସ ଷ୍ଟେସନ ଏହି ସମସ୍ତ ମାନଦଣ୍ଡରେ ଉତ୍କର୍ଷ ହାସଲ କରି ଏହାକୁ ଦ୍ୱିତୀୟ ଶ୍ରେଷ୍ଠ ପୋଲିସ ଷ୍ଟେସନ ଭାବରେ ପୁରସ୍କାର ପାଇଁ ଯୋଗ୍ଯ କରିଥିଲା | ପାଟପୁର ଥାନା ଆଇ. ଆଇ. ସି. ସବ୍ଯସାଚୀ ମଲ୍ଲ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀଙ୍କ ଠାରୁ ଏକ ପ୍ରଶସ୍ତି ପତ୍ର ସହିତ ଏହି ସମ୍ମାନଜନକ ପୁରସ୍କାର ଗ୍ରହଣ କରିଛନ୍ତି।