ସମ୍ଭାବ୍ୟ ବାତ୍ୟା ‘ଅକ୍‌ଭାନ୍’ ଓଡ଼ିଶା ଉପକୂଳ ଆଡ଼କୁ ମାଡ଼ି ଆସୁଥିବା ବେଳେ ଏହାର ପ୍ରଭାବ ଦେଖିବାକୁ ମିଳିଛି। ପାଗରେ ଅଚାନକ ପରିବର୍ତ୍ତନ ଏବଂ ପ୍ରବଳ ପବନର ଆଶଙ୍କା କରି ଇଣ୍ଡିଗୋ ଏୟାରଲାଇନ୍ସ ଭୁବନେଶ୍ୱରସ୍ଥିତ ବିଜୁ ପଟ୍ଟନାୟକ ଆନ୍ତର୍ଜାତୀୟ ବିମାନବନ୍ଦରରୁ ନିଜର ୪ଟି ବିମାନ ଉଡ଼ାଣ ବାତିଲ କରିବାକୁ ନିଷ୍ପତ୍ତି ନେଇଛି।

ବାତିଲ ହୋଇଥିବା ବିମାନଗୁଡ଼ିକ ମଧ୍ୟରେ ଭୁବନେଶ୍ୱରରୁ କୋଲକାତା ଅଭିମୁଖେ ଯାଉଥିବା ତିନୋଟି ବିମାନ ଭୁବନେଶ୍ୱରରୁ କୋଲକାତା ଯାଉଥିବା 6E 7432,  ଭୁବନେଶ୍ୱରରୁ କୋଲକାତା ଯାଉଥିବା 6E 7434 ଏବଂ ଭୁବନେଶ୍ୱରରୁ କୋଲକାତା ଯାଉଥିବା 6E 7436 ଓ ଭୁବନେଶ୍ୱରରୁ ଆହ୍ଲାବାଦ ଯାଉଥିବା 6E 7723 ସାମିଲ ହୋଇଛି ।

ଇଣ୍ଡିଗୋ ପକ୍ଷରୁ ଏହି ବାତିଲ ସମ୍ପର୍କରେ ସୂଚନା ଦିଆଯାଇଛି, ଯେଉଁଥିରେ ଖରାପ ପାଗ ଯୋଗୁଁ ଛୋଟ ଏଟିଆର୍  ବିମାନଗୁଡ଼ିକ ପ୍ରଭାବିତ ହୋଇଥିବା କୁହାଯାଇଛି। ପ୍ରବଳ ପାର୍ଶ୍ୱ ପବନ, କମ୍ ଦୃଶ୍ୟମାନତା ଏବଂ ଅଶାନ୍ତ ପାଗ ପ୍ରତି ଏଟିଆର୍ ବିମାନ ଅଧିକ ସମ୍ବେଦନଶୀଳ ହୋଇଥିବାରୁ, ବାତ୍ୟା ଓଡ଼ିଶା ଉପକୂଳ ଆଡ଼କୁ ମାଡ଼ି ଆସୁଥିବା ବେଳେ ଏହି ରୁଟ୍‌ଗୁଡ଼ିକର ସେବା ପ୍ରଥମେ ପ୍ରଭାବିତ ହୋଇଛି।

ଏହି ବିମାନ ବାତିଲ ଯୋଗୁଁ ଭୁବନେଶ୍ୱରରୁ କୋଲକାତା ଏବଂ ଆହ୍ଲାବାଦ ଭଳି ଦୁଇଟି ପ୍ରମୁଖ ଓ ବ୍ୟସ୍ତବହୁଳ ରୁଟ୍‌ରେ ଯାତ୍ରା କରୁଥିବା ଯାତ୍ରୀମାନେ ଅସୁବିଧାର ସମ୍ମୁଖୀନ ହୋଇଛନ୍ତି। ବାତ୍ୟା ‘ଅକ୍‌ଭାନ୍’ ପ୍ରଭାବରେ ଉପକୂଳ ଓଡ଼ିଶାରେ ପ୍ରବଳ ବର୍ଷା ଏବଂ ଝଟକା ପବନ ଲାଗି ରହିଥିବାରୁ ବିମାନ ଚଳାଚଳ ଉପରେ କଡ଼ା ନଜର ରଖାଯାଇଛି।

ବିମାନବନ୍ଦରକୁ ଯିବା ପୂର୍ବରୁ ଯାତ୍ରୀମାନଙ୍କୁ ନିଜ ବିମାନର ସ୍ଥିତି ଯାଞ୍ଚ କରିବାକୁ ପରାମର୍ଶ ଦିଆଯାଇଛି। ଏଥିସହ ଟିକେଟ୍ ପୁନଃନିର୍ଦ୍ଧାରଣ ଏବଂ ରିଫଣ୍ଡ ସମ୍ପର୍କିତ ସଦ୍ୟତମ ସୂଚନା ପାଇଁ ବିମାନ ସଂସ୍ଥା ସହିତ ଯୋଗାଯୋଗରେ ରହିବାକୁ କୁହାଯାଇଛି।

Leave a Reply

Your email address will not be published. Required fields are marked *