ଖରିଫ ବିପଣନ ଋତୁ (KMS) 2026-27 ଋତୁ ପାଇଁ ଚାଲୁଥିବା ଖରିଫ ଧାନ କିଣା ପ୍ରକ୍ରିୟାରେ ଭଦ୍ରକ ଜିଲ୍ଲାର କିଛି ମହିଳା ସ୍ୱୟଂ ସହାୟକ ଗୋଷ୍ଠୀଙ୍କୁ ସାମିଲ ହେବାକୁ ଓଡ଼ିଶା ହାଇକୋର୍ଟ ଅନୁମତି ଦେଇଛନ୍ତି । ବିଚାରପତି ବିରଜା ପ୍ରସନ୍ନ ଶତପଥୀ ନବୀନ କିରଣ ମହିଳା SHG ଓ ଅନ୍ୟମାନଙ୍କ ଦ୍ୱାରା ଦାଖଲ ହୋଇଥିବା ରିଟ ଆବେଦନର ଶୁଣାଣି କରି ଏହି ଅନ୍ତରୀଣ ଆଦେଶ ଦେଇଛନ୍ତି। ରାଜ୍ୟ ସରକାର ନ୍ୟୁନତମ ଭିତ୍ତିଭୂମି ନଥିବା SHG ମାନଙ୍କୁ ଧାନ କ୍ରୟ କେନ୍ଦ୍ର ଭାବେ କାର୍ଯ୍ୟ କରିବାକୁ ବାରଣ କରିଥିବା ନିଷ୍ପତ୍ତିକୁ ଆବେଦନକାରୀମାନେ ଚ୍ୟାଲେଞ୍ଜ କରିଥିଲେ । ସେପ୍ଟେମ୍ବର 24, 2025 ଓ ଡିସେମ୍ବର 4, 2025 ତାରିଖର ସରକାରୀ ଆଦେଶ ଅନୁଯାୟୀ, PCSAP ଆପରେ ତାଲିକାଭୁକ୍ତ ଓ ମୌଳିକ ସୁବିଧା ଥିବା ଧାନ କ୍ରୟ କେନ୍ଦ୍ରମାନଙ୍କୁ ହିଁ ଅନୁମତି ମିଳିବ । ରାଜ୍ୟ ସରକାରଙ୍କ ଓକିଲ କହିଥିଲେ ଯେ ଆବେଦନକାରୀ SHG ମାନଙ୍କ ପାଖରେ ଆବଶ୍ୟକ ଭିତ୍ତିଭୂମି ନଥିବାରୁ ସେମାନଙ୍କୁ ଚଳିତ ଋତୁରୁ ବାଦ ଦିଆଯାଇଛି । ହେଲେ ଆବେଦନକାରୀଙ୍କ ଓକିଲ କହିଥିଲେ ଯେ ଏହି SHG ମାନେ 2019 ମସିହାରୁ ଧାନ କିଣାରେ ସାମିଲ ହୋଇଆସୁଛନ୍ତି ଏବଂ ଏଯାବତ କୌଣସି ଅଭିଯୋଗ ନାହିଁ । ସେମାନଙ୍କୁ ବାଦ ଦେବା ପୂର୍ବରୁ କଲେକ୍ଟରଙ୍କ ତରଫରୁ କୌଣସି ଯାଞ୍ଚ କିମ୍ବା ପୂର୍ବ ସୂଚନା ମଧ୍ୟ ଦିଆଯାଇନଥିଲା ବୋଲି ସେମାନେ ଅଭିଯୋଗ କରିଥିଲେ । ଉଭୟ ପକ୍ଷର ଯୁକ୍ତି ଶୁଣିବା ପରେ କୋର୍ଟ SHG ମାନଙ୍କୁ ବାଦ ଦେବାର କାରଣ ଦର୍ଶାଇ ବିସ୍ତୃତ ସତ୍ୟପାଠ ଦାଖଲ କରିବାକୁ ଅତିରିକ୍ତ ସରକାରୀ ଓକିଲଙ୍କୁ ନିର୍ଦ୍ଦେଶ ଦେଇଛନ୍ତି । ପରବର୍ତ୍ତୀ ଶୁଣାଣି ପର୍ଯ୍ୟନ୍ତ କୋର୍ଟ ଏହି SHG ମାନଙ୍କୁ KMS 2026-27 ଋତୁର ଖାରିଫ ଧାନ କିଣାରେ ଅଂଶଗ୍ରହଣ କରିବାକୁ ଅନୁମତି ଦେଇଛନ୍ତି।ଏହି ମାମଲାର ପରବର୍ତ୍ତୀ ଶୁଣାଣି ସେପ୍ଟେମ୍ବର 7, 2026 ରୁ ଆରମ୍ଭ ହେଉଥିବା ସପ୍ତାହରେ ହେବ । Post navigation Independence Day 2026: ସ୍ୱାଧୀନତା ଦିବସ-୨୦୨୬ ଅବସରରେ ମୁଖ୍ୟମନ୍ତ୍ରୀଙ୍କ ଅଭିଭାଷଣ Independence Day 2026: ଗାନ୍ଧୀ ମାର୍ଗରେ ଧୂମଧାମରେ ପାଳିତ ହେଲା ସ୍ୱାଧୀନତା ଦିବସ
