Nuapada Bypoll: ନୂଆପଡା ଉପନିର୍ବାଚନରେ ବ୍ୟବହାର ହେବ ବାୟୁସେନାର ବିମାନ

ନୂଆପଡା ଉପନିର୍ବାଚନରେ ବ୍ୟବହାର ହେବ ବାୟୁସେନାର ବିମାନ। ଏଥିପାଇଁ ଶନିବାର ଭାରତୀୟ ବାୟୁସେନାର ବିମାନ ପ୍ରଥମ ଥର ପାଇଁ ଗୋତମା ଏୟାରଷ୍ଟ୍ରିପରେ ନିରାପଦ ଅବତରଣ କରିଛି । ମାଓ ପ୍ରଭାବିତ ଅଂଚଳରେ ଥିବା ବୁଥକୁ ପୋଲିଂ ପାର୍ଟିକୁ ନେଇ ଯିବ ଏହି ବିମାନ।  ପ୍ରଥମ ଥର ପାଇଁ ରାତିରେ ଗୋତମା ଏୟାରଷ୍ଟ୍ରିପରେ ଅବତରଣ କରିଛି ବାୟୁସେନାର ବିମାନ। ନୂଆପଡ଼ା ଉପନିର୍ବାଚନରେ ସାମିଲ ପୋଲିଂ ପାର୍ଟିଗୁଡ଼ିକୁ ସହାୟତା କରିବ ଏହି ବିମାନ।

ଆଜି ବିମାନରେ ସନ୍ଧ୍ୟା ୭ଟାରୁ ବୁଥ ଯାତ୍ରା କରିବେ ପୋଲିଂ ପାର୍ଟି । ଆସନ୍ତାକାଲି ୧୧ ଟା ସୁଦ୍ଧା ବୁଥରେ ପହଁଚିବେ ପୋଲିଂ ପାର୍ଟି । ଏନେଇ ଡିସପୋଜାଲ ସେଣ୍ଟରରେ ସମସ୍ତ ପ୍ରସ୍ତୁତି ସରିଛି । ୩୮୫ଟି ବୁଥରେ ଭୋଟଗ୍ରହଣ କରାଯିବ ।  ଅତି ସମ୍ବେଦନଶୀଳ ବୁଥରେ ସୁରକ୍ଷ ବ୍ୟବସ୍ଥା କଡ଼ାକଡ଼ି କରାଯିବ ।  ନକ୍ସଲ ପ୍ରଭାବିତ ଅଞ୍ଚଳର ୮ଟି ବୁଥକୁ ହେଲିକପ୍ଟର ଯୋଗେ ଯିବେ ପୋଲିଂ ପାର୍ଟି ।  ଡିସପୋସାଲ ସେଣ୍ଟରରେ ୩୭ ଟି କାଉଣ୍ଟର କରାଯାଇଛି  ।

ଏବେ ପୋଲିଂ ଦଳକୁ ନୂଆପଡ଼ା ଫେରାଇ ଆଣିବା ପାଇଁ କୌଣସି ସମସ୍ୟା ନଥିବା ଜଣାପଡିଛି। ଅଧିକ ଗୁରୁତ୍ୱପୂର୍ଣ୍ଣ କଥା ହେଉଛି ଇଭିଏମ୍ ରାତିରେ ମଧ୍ଯ ସୁରକ୍ଷିତ ଭାବରେ ନୂଆପଡ଼ାରେ ପହଞ୍ଚିପାରିବେ ।  ଏହି ସଫଳତା ପାଇଁ ଜିଲ୍ଲାପାଳ ସଂପୃକ୍ତ ବିଭାଗମାନଙ୍କୁ ଧନ୍ୟବାଦ ଜଣାଇଛନ୍ତି ।

ପ୍ରୋଟୋକଲ ଅନୁସାରେ ଆଗରୁ ଗୋତମା ହେଲିପ୍ୟାଡ୍ ହେଲିକପ୍ଟରର ରାତ୍ରି ଅବତରଣ ପରିଚାଳନା ପାଇଁ ସକ୍ଷମ ନଥିଲା। ଏଥିପାଇଁ NGV ବା ରାତ୍ରି ଗଗଲ୍ ଭିଜନ୍ ସଜ୍ଜିତ IR ଲାଇଟ୍ ର ଆବଶ୍ୟକତା ଥିଲା । ଏହାକୁ ବିମାନର ପାଇଲଟ୍ ଅନ୍ଧାର ରାତି ଆକାଶରେ ୫ କିଲୋମିଟର ପର୍ଯ୍ୟନ୍ତ ପରିସରରୁ ଚିହ୍ନଟ କରିପାରିବେ। ଏହି ଅସୁବିଧାକୁ ଲକ୍ଷ୍ୟ ରଖି ଜିଲ୍ଲାପାଳ ତଥା ଜିଲ୍ଲା ନିର୍ବାଚନ ଅଧିକାରୀ ମଧୁସୂଦନ ଦାଶ ପୂର୍ତ୍ତ ବିଭାଗକୁ ଏହାର ସମାଧାନ ପାଇଁ ନିର୍ଦ୍ଦେଶ ଦେଇଥିଲେ । ଫଳରେ ବିଶେଷଜ୍ଞ ମାର୍ଗଦର୍ଶନରେ ଏବଂ ରାଜ୍ୟ ନିର୍ବାଚନ ଶାଖା ସହିତ ସମନ୍ୱୟ ରଖି ଶଶାଙ୍କ ଶେଖର ଶୁକ୍ଳା, ଅଧୀକ୍ଷଣ ଯନ୍ତ୍ରୀ, ପୂର୍ତ୍ତ ବିଭାଗ, ଖରିଆର ଏହାର ସଫଳ ପରିଚାଳନା କରିଥିଲେ। ଏନଜିଭି ଲାଇଟ୍ ଗୁଡ଼ିକୁ ଦୁଇ ଦିନ ମଧ୍ୟରେ ଦିଲ୍ଲୀରୁ ଶୀଘ୍ର ମଗାଯାଇଥିଲା ଯେଉଁଥିରେ ଟେକ୍ନିସିଆନ୍ ମାନଙ୍କ ଏକ ଦଳ ମଧ୍ୟ ସାମିଲ ଥିଲା। ଶନିବାର ରାତି ୮ଟାରେ ଲାଇଟ୍ ସବୁର ପରୀକ୍ଷଣ କରି ଗୋତମା ହେଲିପ୍ୟାଡରେ ସ୍ଥାପନ କରାଯାଇଥିଲା।

ଏହାପରେ ବାୟୁସେନା ବିମାନ ରାତି ୮.୧୦ ଘଣ୍ଟା ସମୟରେ ଗୋତମା ଏୟାରଷ୍ଟ୍ରିପରେ ଏକ ସଫଳ ପରୀକ୍ଷଣ ଅବତରଣ କରିପାରିଥିଲା। ଏହା ନୂଆପଡ଼ା ଜିଲ୍ଲା ଏବଂ ଗୋତମା ଏୟାରଷ୍ଟ୍ରିପ୍ ପାଇଁ ବାୟୁସେନାର ପ୍ରଥମ ସଫଳ ରାତ୍ରୀକାଳୀନ ଅବତରଣ ଥିଲା।