ରାଜ୍ୟସଭାରେ ୱକଫ୍ ସପକ୍ଷରେ ମତ ଦେଲେ ବିଜେଡି ସାଂସଦ ସସ୍ମିତ ପାତ୍ର

ବିବାଦୀୟ ୱାକଫ୍ ବିଲ୍ ସଂଶୋଧନ ବିଲ୍ ସଂସଦର ଉଭୟ ଗୃହରେ ପାରିତ ହୋଇଯାଇଛି । ଦୁଇ ଦିନରେ ବ୍ୟାପକ ଆଲୋଚନା ପରେ ଶେଷରେ ବିଲ ପାରିତ ହୋଇଛି । ବିଲକୁ ଏବେ ରାଷ୍ଟ୍ରପତିଙ୍କ ନିକଟକୁ ପଠାଯିବ। ରାଷ୍ଟ୍ରପତିଙ୍କ ଅନୁମୋଦନ ପରେ ଏହା ଆଇନରେ ପରିଣତ ହେବ।

ରାଜ୍ୟସଭାରେ ବିଲ୍ ସପକ୍ଷରେ ୧୨୮ଟି ଭୋଟ୍ ପଡ଼ିଥିବାବେଳେ ବିପକ୍ଷରେ ୯୫ଟି ଭୋଟ୍ ପଡ଼ିଥିବା ବେଳେ ୱକଫ୍ ସଂଶୋଧନ ବିଲ ସପକ୍ଷରେ ଭୋଟ୍ ଦେଇଛି ବିଜୁ ଜନତା ଦଳ। ଏ ନେଇ ସୂଚନା ଦେଇଛନ୍ତି ବିଜେଡି ରାଜ୍ୟସଭା ସାଂସଦ ତଥା ଦଳର ମୁଖପାତ୍ର ସସ୍ମିତ ପାତ୍ର । ସେହିପରି ଦଳର ଅନ୍ୟ କିଛି ସାଂସଦ ମଧ୍ୟ ବିଲ୍ ସପକ୍ଷରେ ମତଦାନ କରିଥିବା ଜଣାପଡିଛି ।

ପୂର୍ବରୁ ଏହି ବିଲ୍ କୁ ଦଳ ବିରୋଧ କରିବ ବୋଲି ଘୋଷଣା କରିଥିଲା। ସସ୍ମିତ ପାତ୍ର ଏହି ବିଲରେ ଅନେକ ସଂଶୋଧନର ଆବଶ୍ୟକତା ଥିବା କହିଥିଲେ । କିଛିଟା ପ୍ରାବଧାନ ଉଚିତ ନୁହେଁ ଏବଂ ଏହା ଅଳ୍ପ ସଂଖ୍ୟଙ୍କ ସପକ୍ଷରେ ନୁହେଁ ବୋଲି ସେ ମତ ରଖିଥିଲେ । ସେହିପରି ସାଂସଦ ମୁନ୍ନା ଖାଁ ମଧ୍ୟ ତୀବ୍ର ସମାଲୋଚନା କରିଥିଲେ । କିନ୍ତୁ କିନ୍ତୁ ପରବର୍ତ୍ତି ସମୟରେ ଦଳର ଆଭିମୁଖ୍ୟରେ ପରିବର୍ତ୍ତନ ଘଟିଥିଲା। ସସ୍ମିତ ପାତ୍ର ପୁଣି ଏକ୍ସରେ ସୂଚନା ଦେଇଥିଲେ ଯେ ସମସ୍ତ ସଦସ୍ୟ ନିଜ ବିବେକ ଅନୁଯାୟୀ ମତ ଦେଇ ପାରିବେ ଏବଂ ଦଳ କୌଣସି ହ୍ୱିପ ଜାରି କରି ନାହିଁ ।