Lalu Yadav Family Feud: ତୀବ୍ର ହେଲା ଲାଲୁଙ୍କ ପରିବାର ବିବାଦ; କିଡନୀ ପ୍ରତିରୋପଣ ଉପରେ ଅପମାନ ଅଭିଯୋଗ ଆଣିଲେ ରୋହିଣୀ ଆଚାର୍ଯ୍ୟ

ବିହାର ବିଧାନସଭା ନିର୍ବାଚନର ଫଳାଫଳକୁ ୨୪ ଘଣ୍ଟା ନ ବିତିଣୁ ଲାଲୁ ଯାଦବଙ୍କ ଝିଅ ରୋହିଣୀ ରାଜନୀତି ଓ ପରିବାର ଉଭୟ ଛାଡିବାକୁ ଘୋଷଣା କରିଛନ୍ତି । ଏକ୍ସରେ ପୋଷ୍ଟ କରି ରୋହିଣୀ ଏହି ଘୋଷଣା କରିଛି । ଏପରିକି ରୋହିଣୀଙ୍କ ଉପରକୁ ତେଜସ୍ବୀ ଚପଲ ଫୋପାଡିଥିବା କୁହାଯାଉଛି। ଗତକାଲି ରାଜନୀତିରୁ ସନ୍ନ୍ୟାସ ନେବା ସହ ଲାଲୁ ପରିବାରଠାରୁ ନିଜକୁ ଦୂରେଇଥିଲେ ରୋହିଣୀ।

ଗତକାଲି ରୋହିଣୀ କହିଥିଲେ- ଜଣେ ଝିଅ, ଜଣେ ଭଉଣୀ, ଜଣେ ବିବାହିତ ମହିଳା, ଜଣେ ମାଆଙ୍କୁ ଅପମାନିତ କରାଯାଇଥିଲା, ତାଙ୍କ ଉପରେ ଘୃଣ୍ୟ ଗାଳି ଦିଆଯାଇଥିଲା, ତାଙ୍କୁ ମାରିବା ପାଇଁ ଚପଲ ଉଠାଇ ଦିଆଯାଇଥିଲା। ମୁଁ ମୋର ଆତ୍ମସମ୍ମାନ ସହିତ ସାଲିସ କରିନଥିଲି, ମୁଁ ସତ୍ୟକୁ ତ୍ୟାଗ କରିନଥିଲି, ଏବଂ କେବଳ ଏହି କାରଣରୁ ମୋତେ ଏହି ଅପମାନ ସହ୍ୟ କରିବାକୁ ପଡିଲା। ଗତକାଲି, ଜଣେ ଝିଅ ବାଧ୍ୟ ହୋଇ ତାଙ୍କ କାନ୍ଦୁଥିବା ପିତାମାତା ଏବଂ ଭଉଣୀମାନଙ୍କୁ ଛାଡ଼ି ଚାଲିଗଲା; ସେମାନେ ମୋତେ ମୋ ମାତୃଘରୁ ଚିରି ଫୋପାଡ଼ି ଦେଲେ। ସେମାନେ ମୋତେ ଅନାଥ କରିଦେଲେ। ତୁମେମାନେ କେବେ ମୋ ରାସ୍ତାରେ ନ ଚାଲ, କୌଣସି ପରିବାରରେ କେବେ ରୋହିଣୀ ଭଳି ଝିଅ-ଭଉଣୀ ନ ଥାଉ।”

ବାପାଙ୍କୁ କିଡନୀ ଦାନ ପ୍ରସଙ୍ଗରେ ସେ ତେଜସ୍ବୀଙ୍କୁ କଟାକ୍ଷ କରିଥିବାବେଳେ ତାଙ୍କ ଭଗବାନରୂପୀ ବାପାଙ୍କ ଜୀବନ ଲାଗି କିଡନୀ ଦାନ କରିଥିବା ସେ କହିଛନ୍ତି।

ଦ୍ୱିତୀୟ ପୋଷ୍ଟରେ, ରୋହିଣୀ ୨୦୨୨ ମସିହାରେ ତାଙ୍କ ପିତାଙ୍କୁ ତାଙ୍କର କିଡନୀ ଦାନ ବିଷୟରେ ଉଲ୍ଲେଖ କରିଥିଲେ ଏବଂ ଅଭିଯୋଗ କରିଥିଲେ ଯେ ଏହା ବିଷୟରେ ବ୍ୟକ୍ତିଗତ ଏବଂ ଆପତ୍ତିଜନକ ମନ୍ତବ୍ୟ ଦିଆଯାଇଥିଲା। ସେ ଲେଖିଛନ୍ତି ଯେ ତାଙ୍କ ପିତାଙ୍କ ଶରୀରରେ “ଏକ ମଇଳା କିଡନୀ” ଲଗାଇବା ପାଇଁ ତାଙ୍କୁ ଉପହାସ କରାଯାଇଥିଲା ଏବଂ ପ୍ରତିରୋପଣ ପାଇଁ “ଲକ୍ଷ ଲକ୍ଷ ଟଙ୍କା ନେଇ ଟିକେଟ୍ କିଣିଥିଲେ” ବୋଲି ଅଭିଯୋଗ କରାଯାଇଥିଲା। ସେ ଆହୁରି ପୋଷ୍ଟ କରିଥିଲେ, “ଯଦି ତୁମ ବାପାମାଆଙ୍କ ଘରେ ପୁଅ କିମ୍ବା ଭାଇ ଅଛି, ତେବେ … ତୁମ ଭାଇକୁ କୁହ ଯେ ସେ ନିଜେ କିମ୍ବା ତାଙ୍କ ହରିୟାଣବୀ ବନ୍ଧୁଙ୍କଠାରୁ କିଡନୀ ପ୍ରତିରୋପଣ କରାଇବେ।

ରୋହିଣୀ ନିଜର ଏହି ପୋଷ୍ଟରେ ସଞ୍ଜୟ ଯାଦବଙ୍କ ଉପରେ ଗମ୍ଭୀର ଆରୋପ ଲଗାଇଛନ୍ତି । ରୋହିଣୀ ଲେଖିଛନ୍ତି ସଞ୍ଜୟ ଯାଦବ ଓ ରମିଜ ତାଙ୍କୁ ଏମିତି ଘୋଷଣା କରିବାକୁ ବାଧ୍ୟ କରିଛନ୍ତି । ରୋହିଣୀ କେବଳ ରାଜନୀତି ଛାଡିବା କଥା କହିଥିଲେ । କିନ୍ତୁ କିଛି ସମୟ ପରେ ଏହାକୁ ଏଡିଟ୍ କରି ସଞ୍ଜୟ ଯାଦବ ଓ ରମିଜଙ୍କ ଉପରେ ଆରୋପ ଲଗାଇଛନ୍ତି । ଉଲ୍ଲେଖନୀୟ ରୋହିଣୀଙ୍କ ସଞ୍ଜୟ ଯାଦବଙ୍କ ସହ ପୂର୍ବରୁ ମତଭେଦ ଚାଲିଥିଲା । ବିହାର ଅଧିକାର ଯାତ୍ରାରେ ଏହା ସ୍ପଷ୍ଟ ଦେଖିବାକୁ ମିଳିଥିଲା ।

ଅନ୍ୟପଟେ ବିହାରରେ ଆରଜେଡିର ଏହି ପରାଜୟ ଲାଗି ରୋହିଣୀ ଆଚାର୍ଯ୍ୟ ହିଁ ଦାୟୀ ବୋଲି କହିଛନ୍ତି ତେଜସ୍ବୀ।