୮୨ ବର୍ଷରେ ପାଦ ଦେଲେ ବରିଷ୍ଠ କଂଗ୍ରେସ ନେତା ସୁର ରାଉତରାୟ; ଧୁମଧାମରେ ପାଳନ କଲେ ଜନ୍ମଦିନ

୮୨ ବର୍ଷ ବୟସରେ ପାଦ ଦେଇଛନ୍ତି ବରିଷ୍ଠ କଂଗ୍ରେସ ନେତା ସୁର ରାଉତରାୟ। ପ୍ରତିବର୍ଷ ଭଳି ଆଜି ମଧ୍ୟ ସେ ବେଶ ଧୁମଧାମରେ ନିଜ ଜନ୍ମଦିନ ପାଳିଛନ୍ତି। ମୁକୁଟ ପିନ୍ଧି, ଫୁଲମାଳ ପକାଇ ଶୁଭେଚ୍ଛା ଦେଉଥିବା ଲୋକଙ୍କୁ କୁଣ୍ଢେଇ ପକାଉଛନ୍ତି । ଭଜନ ସହ ଖାଇବା ବ୍ୟବସ୍ଥା ବି କରିଛନ୍ତି । ଜନ୍ମଦିନର ଶୁଭେଚ୍ଛା ଜଣାଇବାକୁ ବାସଭବନରେ ଶୁଭେଚ୍ଛଙ୍କ ଭିଡ ଜମିଛି । ଏହି ସମୟରେ ବଡ଼ ପୁଅ ବିଧାୟକ ଓ ସାନ ପୁଅ ସାଂସଦ ହେବା ତାଙ୍କର ସବୁଠାରୁ ଇଚ୍ଛା ବୋଲି କହିଛନ୍ତି ସୁର।

ସୂଚନା ଯୋଗ୍ୟ; ଆଜି ବରିଷ୍ଠ କଂଗ୍ରେସ ନେତା ସୁର ରାଉତରାୟଙ୍କ ଜନ୍ମଦିନ । ‘ମାଡି ଚାଲ’ ଡାଇଲଗ ସାଙ୍ଗକୁ , ‘ଓଃ ବିୟୁଟିଫୁଲ୍’ ଆଉ କେତେବେଳେ ପୁଣି ‘ରେଡି ତ’ ଏହି ସବୁ ଡାଇଲଗ କହି ସୋସିଆଲ ମିଡ଼ିଆର ସବୁବେଳେ ଚହଳ ପକାଇଥାନ୍ତି ସୁର ରାଉତରାୟ । ଯେତେବେଳେ ଯାହା ବି କୁହନ୍ତି ଏକଦମ ରୋକଠୋକ ।

ବିଜେବି କଲେଜରେ ପାଠ ପଢ଼ୁଥିବା ବେଳେ ସୁରେଶ ନିଜର ଛାତ୍ର ରାଜନୀତିରୁ କ୍ୟାରିଅର ଆରମ୍ଭ କରିଥିଲେ । ୧୯୭୭ ମସିହାରେ ପ୍ରଥମ ଥର ପାଇଁ ସେ ଜଟଣୀ ନିର୍ବାଚନ ମଣ୍ଡଳୀରୁ ନିର୍ବାଚନ ଜିତି ବିଧାନସଭାକୁ ନିର୍ବାଚିତ ହୋଇଥିଲେ । ସେହି ସମୟରେ ସେ ଜନତା ଦଳରୁ ଟିକେଟ ପାଇ ନିର୍ବାଚନ ଲଢ଼ିଥିଲେ ଓ ଏହା ପରେ ଆରମ୍ଭ କରିଥିଲେ କଂଗ୍ରେସ ରାଜନୀତି । ପରେ କଂଗ୍ରେସ ଟିକେଟରେ ୧୯୮୦, ୧୯୮୫, ୧୯୯୫ , ୨୦୦୦ ଏବଂ ୨୦୧୯ରେ ନିର୍ବାଚିତ ହୋଇଥିଲେ । ୧୯୭୭ରୁ ଜଟଣୀକୁ ନିଜ କବଜାରେ ରଖିଥିବା ସୁରେଶ ରାଉତରାୟ ସେଠାରୁ ୧୦ଥର ନିର୍ବାଚନ ଲଢ଼ି ୬ ଥର ବିଧାୟକ ହୋଇଥିଲେ ।