କପିଲ ଶର୍ମା ସହ ଆଉ ୩ ଜଣ ବଲିଉଡ କଳାକାରଙ୍କୁ ଆସିଲା ହତ୍ୟା ଧାମକ 

ବଲିଉଡର ନାମିଦାମୀ କଳାକାରଙ୍କୁ ଆସିଲା ହତ୍ୟା ଧମକ । ପ୍ରସିଦ୍ଧ ହାସ୍ୟ ଅଭିନେତା କମେଡି କିଙ୍ଗ୍ କପିଲ ଶର୍ମା ଏବଂ ବଲିଉଡ ଅଭିନେତା ରାଜପାଲ ଯାଦବ, କୋରିଓଗ୍ରାଫର ରେମୋ ଡିସୁଜା ଏବଂ ହାସ୍ୟ ଅଭିନେତ୍ରୀ ସୁଗନ୍ଧା ମିଶ୍ରଙ୍କୁ ଦିଆଯାଇଛି ହତ୍ୟା ଧମକ  । ଏହି କଳାକାରମାନଙ୍କୁ ଏକ ଇମେଲ୍ ମାଧ୍ୟମରେ ହତ୍ୟା ଧମକ ମିଳିଛି। ଇ-ମେଲ୍ ପାକିସ୍ତାନରୁ ଆସିଥିବା ଜଣାଯାଇଛି ।

ଏ ନେଇ କପିଲ ଶର୍ମା ଥାନାର ଦ୍ୱାରସ୍ଥ ହୋଇଛନ୍ତି । ସେ ମୁମ୍ବାଇର ଆମ୍ବୋଲି ପୋଲିସ ନିକଟରେ ଏଫ୍ଆଇଆର୍ ଦାଖଲ କରିଛନ୍ତି । ଆଜି କପିଲ ଶର୍ମାଙ୍କୁ ବିଷ୍ଣୁ ନାମରେ ଏକ ହତ୍ୟା କରିବା ନେଇ ଧମକ ପୂର୍ଣ୍ଣ ଇ-ମେଲ ଆସିଥିଲା । ଧମକକୁ ହାଲୁକାଭାବେ ନ ନେବାକୁ କୁହାଯାଇଛି । ଯଦି ୮ ଘଣ୍ଟା ଭିତରେ ଦାବି ପୂରଣ ନ ହୁଏ ତେବେ ପରିଣତି ଭୟାନକ ହେବ । ଇ-ମେଲ୍ ପାଇବା ପରେ କପିଲ ଥାନାରେ ଅଭିଯୋଗ କରିଛନ୍ତି ।

ଇମେଲରେ ଲେଖା ଯାଇଛି, “ଆମେ ଆପଣଙ୍କର ବର୍ତ୍ତମାନ କରିଥିବା ସମସ୍ତ କାମ ଉପରେ ନଜର ରଖିଛୁ। ଏହି ବିଷୟକୁ ଆପଣଙ୍କ ଦୃଷ୍ଟିକୁ ଆଣିବା ଗୁରୁତ୍ୱପୂର୍ଣ୍ଣ । ଏହା କୌଣସି ପବ୍ଲିସିଟି ଷ୍ଟଣ୍ଟ କିମ୍ବା ହଇରାଣ କରିବା ପାଇଁ ନୁହେଁ । ଦୟାକରି ଏହି ମେସେଜକୁ ଗମ୍ଭୀରତାର ସହ ନିଅନ୍ତୁ, ଯଦି ଆପଣ ଆମର ଦାବି ପୂରଣ ନକରନ୍ତି ତେବେ ଗମ୍ଭୀର ପରିଣାମ ଭୋଗିବାକୁ ପ୍ରସ୍ତୁତ ରୁହନ୍ତୁ । ଯଦି ଆମେ ଆଗାମୀ ୮ ଘଣ୍ଟା ମଧ୍ୟରେ କୌଣସି ଉତ୍ତର ନପାଇବୁ, ତେବେ ଆମେ ଆବଶ୍ୟକୀୟ କାର୍ଯ୍ୟାନୁଷ୍ଠାନ ଗ୍ରହଣ କରିବୁ।”

କପିଲ ଶର୍ମାଙ୍କ ସହିତ ବିଭିନ୍ନ କମେଡ଼ି ଶୋରେ ନଜର ଆସୁଥିବା ସୁଗନ୍ଧା ମିଶ୍ରଙ୍କୁ ମଧ୍ୟ ହତ୍ୟା ଧମକ ଆସିଛି । ସେହିପରି ଏହି ମାମଲାରେ ଅଭିନେତା ରାଜପାଲ ଯାଦବ ଏବଂ ରେମୋ ଡିସୁଜା ମଧ୍ୟ ସମାନ ପ୍ରସଙ୍ଗରେ ଅଭିଯୋଗ ଦାଖଲ କରିଛନ୍ତି । ପୋଲିସ ଏହି ମାମଲାର ତଦନ୍ତ ଆରମ୍ଭ କରିଛି । ପୋଲିସ ଏପର୍ଯ୍ୟନ୍ତ ଦାୟୀ ବ୍ୟକ୍ତିଙ୍କୁ ଚିହ୍ନଟ କରିନାହିଁ ।

ଅମ୍ବୋଲି ପୋଲିସ ବିଏନ୍ଏସ୍ ଧାରା ୩୫୧(୩)ରେ ମାମଲା ରୁଜୁ କରିଛି । ବିଷ୍ଣୁ ନାମରେ ଦସ୍ତଖତ ଥିବା ମେଲ୍ ଆସିଛି । ମେଲ୍ ଆଇଡି (don99284@gmail.com) ପାକିସ୍ତାନରୁ ଆସିଛି ବୋଲି ପୋଲିସ କହିଛି ।