ସାଇବର୍ କାଫେରେ ଆରଆଇ ପରୀକ୍ଷାକୁ ନେଇ ବିବାଦ

ଓଡ଼ିଶା ସବ୍ ଅର୍ଡିନେଟ୍ ଷ୍ଟାଫ୍ ସିଲେକ୍ସନ କମିଶନ ଓଏସ୍ଏସ୍ଏସସି ଦ୍ୱାରା ପରିଚାଳିତ ରାଜସ୍ବ ନିରୀକ୍ଷକ (ଆରଆଇ), ଆଇସିଡିଏସ୍ ସୁପରଭାଇଜର, ଏଆରଆଇ, ଅମିନ ଓ ଏସ୍ଏଫ୍ଏସ୍ ପଦବୀରେ ନିଯୁକ୍ତି ପାଇଁ ପରୀକ୍ଷା କେନ୍ଦ୍ର ଥିବା ଭୁବନେଶ୍ୱରର ଏକ ସାଇବର କାଫେରେ ଉତ୍ତେଜନା ପ୍ରକାଶ ପାଇଛି। ଭୁବନେଶ୍ବର ନୟାପଲ୍ଲୀ ଅଞ୍ଚଳର କେନ୍ଦ୍ରରେ ପରୀକ୍ଷା ପରିଚାଳନାରେ ବିଳମ୍ବ ଓ ଅନ୍ୟାନ୍ୟ ଅନିୟମିତତାକୁ ନେଇ ବହୁ ପରୀକ୍ଷାର୍ଥୀ ହଙ୍ଗାମା କରିଥିଲେ। ମିଳିଥିବା ସୂଚନା ଅନୁଯାୟୀ, ଜଣେ ତୃତୀୟ ପକ୍ଷ ବିକ୍ରେତା ସାଇବର କାଫେକୁ ପରୀକ୍ଷା କେନ୍ଦ୍ର ଭାବେ ଚୟନ କରିଥିବା ବେଳେ ଆଜି ୩ଟି ସିଫ୍ଟରେ ପରୀକ୍ଷା ହେବାର ଥିଲା।

ଆମର ରିପୋର୍ଟିଂ ସମୟ ଅପରାହ୍ନ ୧.୩୦ ଥିଲା ଏବଂ ଅପରାହ୍ନ ୩.୩୦ରେ ପରୀକ୍ଷା ଆରମ୍ଭ ହେବାର ଥିଲା । ତେବେ ଦ୍ବିତୀୟ ସିଫ୍ଟ ପରୀକ୍ଷା ଆଶାୟୀମାନେ ଆମ ଟାଇମ୍ ସ୍ଲଟରେ ପ୍ରବେଶ କରୁଥିଲେ। ଆମକୁ କୁହାଯାଇଥିଲା ଯେ ଆମର ପରୀକ୍ଷା ବିଳମ୍ବ ହେବ। ଯଦି ଆମେ ଅପରାହ୍ନ ୧ଟାରେ ପରୀକ୍ଷା ଦେବାକୁ ଆସିଛୁ, ତେବେ ଆମେ ଏତେ ସମୟ ଅପେକ୍ଷା କରିପାରିବୁ କେମିତି ବୋଲି ଜଣେ ଆଶାୟୀ ପ୍ରଶ୍ନ କରିଛନ୍ତି।