ରାଜ୍ୟରେ ବିପର୍ଯ୍ୟସ୍ତ ରେଳ ଚଳାଚଳ ଓ ଯାତ୍ରୀଙ୍କ ଦୁର୍ଦ୍ଦଶାକୁ ନେଇ କେନ୍ଦ୍ର ସରକାର ଏବଂ ରେଳ ମନ୍ତ୍ରଣାଳୟ ଉପରେ ତୀବ୍ର ବର୍ଷିଛି ପ୍ରଦେଶ କଂଗ୍ରେସ। ଓଡ଼ିଶାରୁ ରେଳବାଇ ପ୍ରତିବର୍ଷ ହଜାର ହଜାର କୋଟି ଟଙ୍କାର ରାଜସ୍ୱ ଆଦାୟ କରୁଥିବା ବେଳେ, ରାଜ୍ୟର ସାଧାରଣ ଯାତ୍ରୀଙ୍କୁ ସର୍ବନିମ୍ନ ସେବା ଯୋଗାଇବାରେ ସମ୍ପୂର୍ଣ୍ଣ ବିଫଳ ହୋଇଛି। ସୋମବାର କଂଗ୍ରେସ ଭବନଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ପିସିସି ଗଣମାଧ୍ୟମ ବିଭାଗ ଅଧ୍ୟକ୍ଷ ଅରବିନ୍ଦ ଦାସ ଏହି ଅଭିଯୋଗ ଆଣିବା ସହ ରେଳବାଇର କାର୍ଯ୍ୟଶୈଳୀ ଉପରେ ପ୍ରଶ୍ନ ଉଠାଇଛନ୍ତି। ବର୍ତ୍ତମାନ ସମୟରେ ଓଡ଼ିଶା ଦେଇ ଚଳାଚଳ କରୁଥିବା ଅଧିକାଂଶ ଯାତ୍ରୀବାହୀ ଟ୍ରେନ୍ ନିୟମିତ ଭାବେ ବିଳମ୍ବରେ ଚାଲୁଥିବାରୁ ଯାତ୍ରୀମାନେ ଘୋର ଅସୁବିଧାର ସମ୍ମୁଖୀନ ହେଉଛନ୍ତି। ମାଲ ପରିବହନକୁ ଅଧିକ ଗୁରୁତ୍ବ ଦେଇ ଯାତ୍ରୀବାହୀ ଟ୍ରେନ୍ଗୁଡ଼ିକୁ ଅବହେଳା କରାଯାଉଥିବାରୁ ସେଗୁଡ଼ିକ ଘଣ୍ଟାଘଣ୍ଟା ବିଳମ୍ବରେ ଚାଲୁଛି ବୋଲି ପିସିସି ଗଣମାଧ୍ୟମ ବିଭାଗ ଅଧ୍ୟକ୍ଷ ଅରବିନ୍ଦ ଦାସ ଅଭିଯୋଗ କରିଛନ୍ତି। ସେ ଆଉ ମଧ୍ୟ କହିଛନ୍ତି ୨୦୨୬-୨୭ ଆର୍ଥିକ ବର୍ଷର ଅଗଷ୍ଟ ମାସ ପର୍ଯ୍ୟନ୍ତ ପୂର୍ବତଟ ରେଳପଥ (East Coast Railway) ଅଧୀନରେ ମାତ୍ର ୪୩.୪୦% ଟ୍ରେନ୍ ଠିକ୍ ସମୟରେ ଚଳାଚଳ କରିଛି। ଅର୍ଥାତ୍ ଅଧାରୁ ଅଧିକ ଟ୍ରେନ୍ ବିଳମ୍ବରେ ଚାଲିଛି। ଖଣିଜ ସମ୍ପଦ ଓ ଶିଳ୍ପ ସାମଗ୍ରୀ ପରିବହନରୁ ଅଧିକ ରାଜସ୍ୱ ଆଦାୟ କରିବା ଲକ୍ଷ୍ୟରେ ରେଳ କର୍ତ୍ତୃପକ୍ଷ ଯାତ୍ରୀବାହୀ ଟ୍ରେନ୍ଗୁଡ଼ିକୁ ବିଭିନ୍ନ ଷ୍ଟେସନରେ ଅଟକାଇ ମାଲବାହୀ (Goods) ଟ୍ରେନ୍ଗୁଡ଼ିକୁ ପ୍ରଥମେ ଛାଡ଼ୁଥିବା ନେଇ ଯାତ୍ରୀ ଓ ବିଭିନ୍ନ ସଂଗଠନ ପକ୍ଷରୁ ବାରମ୍ବାର ଅଭିଯୋଗ ହୋଇଆସୁଛି। ସ୍ୱତନ୍ତ୍ର ଫ୍ରେଟ୍ କରିଡର (Dedicated Freight Corridor) ଅଭାବରୁ ସାଧାରଣ ଯାତ୍ରୀମାନେ ଏହାର ଶିକାର ହେଉଛନ୍ତି। ଦୀର୍ଘ ଦିନ ଧରି ନିୟମିତ ବିଳମ୍ବ କାରଣରୁ ଦକ୍ଷିଣ-ପୂର୍ବ ରେଳପଥ (SER) ପକ୍ଷରୁ ହାଓଡ଼ା-କଣ୍ଟାବାଞ୍ଜି ଇସ୍ପାତ ଏକ୍ସପ୍ରେସ୍ (୨୨୮୬୧/୨୨୮୬୨) ଏବଂ ହାଓଡ଼ା-ଜୁନାଗଡ଼ ରୋଡ୍ ଇସ୍ପାତ ଏକ୍ସପ୍ରେସ୍ (୧୨୮୭୧/୧୨୮୭୨) ରୁ ‘ସୁପରଫାଷ୍ଟ’ (Superfast) ମାନ୍ୟତା ପ୍ରତ୍ୟାହାର କରି ସାଧାରଣ ଏକ୍ସପ୍ରେସ୍କୁ ଖସାଇ ଦିଆଯାଇଛି। ଏଥିପାଇଁ ଜାନୁଆରୀ ୧, ୨୦୨୭ ରୁ ଏହାର ନୂଆ ୫-ଅଙ୍କ ବିଶିଷ୍ଟ ନମ୍ବର (ଯଥାକ୍ରମେ ୧୮୦୭୩/୧୮୦୭୪ ଓ ୧୮୦୭୧/୧୮୦୭୨) ଲାଗୁ ହେବାକୁ ନିଷ୍ପତ୍ତି ହୋଇଛି। ଦୁର୍ଗ-ପୁରୀ-ଦୁର୍ଗ ଏକ୍ସପ୍ରେସ୍ର ନିୟମିତ ବିଳମ୍ବ: ଦୁର୍ଗ-ପୁରୀ ଏକ୍ସପ୍ରେସ୍ (୧୮୪୨୬) ଏବଂ ପୁରୀ-ଦୁର୍ଗ ଏକ୍ସପ୍ରେସ୍ (୧୮୪୨୫) ନିୟମିତ ବିଳମ୍ବ ପାଇଁ କୁଖ୍ୟାତି ଅର୍ଜନ କରିଛି। ଟ୍ରେନ୍ ଚଳାଚଳ ପରିସଂଖ୍ୟାନ ଅନୁଯାୟୀ, ୧୮୪୨୬ ଦୁର୍ଗ-ପୁରୀ ଏକ୍ସପ୍ରେସ୍ର ପୁରୀରେ ଠିକ୍ ସମୟରେ (୧୫ ମିନିଟ୍ ମଧ୍ୟରେ) ପହଞ୍ଚିବା ହାର ପ୍ରାୟ ୦% ରହିଛି ଏବଂ ଏହା ହାରାହାରି ୨ ଘଣ୍ଟା ୫୦ ମିନିଟ୍ରୁ ୩ ଘଣ୍ଟା ୪୦ ମିନିଟ୍ ପର୍ଯ୍ୟନ୍ତ ବିଳମ୍ବରେ ପହଞ୍ଚୁଛି। ସେହିପରି ଫେରନ୍ତା ୧୮୪୨୫ ପୁରୀ-ଦୁର୍ଗ ଏକ୍ସପ୍ରେସ୍ ସମ୍ବଲପୁର, ବଲାଙ୍ଗୀର ଓ ନୂଆପଡ଼ା ରୋଡ୍ ଆଦି ଷ୍ଟେସନରେ ହାରାହାରି ୨.୫ ରୁ ୩ ଘଣ୍ଟାରୁ ଅଧିକ ବିଳମ୍ବରେ ପହଞ୍ଚୁଥିବା ତଥ୍ୟରୁ ସ୍ପଷ୍ଟ ହେଉଛି। ଭାରତୀୟ ରେଳବାଇର ୧୮ଟି ଜୋନ୍ ମଧ୍ୟରେ ଯାତ୍ରୀବାହୀ ଟ୍ରେନ୍ର ସମୟାନୁବର୍ତ୍ତିତା (Punctuality) ଏବଂ ମାଲ ପରିବହନ (Freight Loading) ମଧ୍ୟରେ ଏକ ବଡ଼ ଧରଣର ଅସମାନତା ଦେଖିବାକୁ ମିଳୁଛି। ଓଡ଼ିଶା ଦେଇ ଯାଇଥିବା ରେଳ ଜୋନ୍ଗୁଡ଼ିକ ଦେଶର ସବୁଠାରୁ ଅଧିକ ରାଜସ୍ୱ ଦେଉଥିଲେ ମଧ୍ୟ ସମୟାନୁବର୍ତ୍ତିତା କ୍ଷେତ୍ରରେ ସର୍ବନିମ୍ନ ସ୍ଥାନରେ ରହିଛନ୍ତି। ପଶ୍ଚିମ ରେଳପଥ (WR)ର ସମୟାନୁବର୍ତ୍ତିତା ୯୫.୯୭% (୨୦୨୫-୨୬) ରହିଥିବା ବେଳେ ଉତ୍ତର-ପଶ୍ଚିମ ରେଳପଥ (NWR)ର ଏହା ୯୪.୮୦% (୨୦୨୬-୨୭), ସର୍ବଭାରତୀୟ ହାର (All India) ସମସ୍ତ ୧୮ଟି ଜୋନ୍ (୭୧ଟି ଡିଭିଜନ୍) ୭୫.୦୭% (ଅକ୍ଟୋବର ୨୦୨୬); ୭୭.୪୩% (୨୦୨୫-୨୬) ରହିଥିବା ଜଣାଯାଇଛି। ୨୦୨୫-୨୬ ଆର୍ଥିକ ବର୍ଷରେ ଭାରତୀୟ ରେଳବାଇ ମାଲ ପରିବହନରୁ ₹୧,୬୦,୯୮୭ କୋଟି ଆୟ କରିଛି। ଏଥିରେ ପୂର୍ବତଟ ରେଳପଥ (ECoR), SECR ଏବଂ SER ର ଯୋଗଦାନ ସର୍ବାଧିକ। କିନ୍ତୁ ପଶ୍ଚିମ ଓ ଉତ୍ତର ଭାରତରେ ଡେଡିକେଟେଡ୍ ଫ୍ରେଟ୍ କରିଡର (DFC) କାର୍ଯ୍ୟକ୍ଷମ ହୋଇଥିବାରୁ ସେଠାରେ ପଶ୍ଚିମ ରେଳପଥର ସମୟାନୁବର୍ତ୍ତିତା ୯୫.୯୭% ରହିଛି। ଅପରପକ୍ଷେ, ଓଡ଼ିଶାରେ ସ୍ୱତନ୍ତ୍ର ମାଲବାହୀ କରିଡର ନଥିବାରୁ ଗୋଟିଏ ଟ୍ରାକ୍ରେ ମାଲବାହୀ ଟ୍ରେନ୍କୁ ଅଗ୍ରାଧିକାର ଦିଆଯାଉଛି, ଯାହାଫଳରେ ECoR ର ସମୟାନୁବର୍ତ୍ତିତା ୪୩.୪୦% କୁ ଖସି ଆସିଛି। ସୁପରଫାଷ୍ଟ ଟ୍ରେନ୍ର ମାନ୍ୟତା ହ୍ରାସ (Relegation of Trains): ଦକ୍ଷିଣ-ପୂର୍ବ ରେଳପଥ (SER) ଅଧୀନରେ ଥିବା ହାଓଡ଼ା-କଣ୍ଟାବାଞ୍ଜି ଇସ୍ପାତ ଏକ୍ସପ୍ରେସ୍ (୨୨୮୬୧) ହାରାହାରି ୫ ରୁ ୬ ଘଣ୍ଟା (୩୫୭ ମିନିଟ୍) ବିଳମ୍ବରେ ଗନ୍ତବ୍ୟ ସ୍ଥଳରେ ପହଞ୍ଚୁଛି। ନିୟମ ଅନୁଯାୟୀ ସୁପରଫାଷ୍ଟ ଟ୍ରେନ୍ର ହାରାହାରି ବେଗ ଘଣ୍ଟା ପ୍ରତି ୫୫ କି.ମି. ରୁ ଅଧିକ ହେବା ଆବଶ୍ୟକ, କିନ୍ତୁ ମାଲବାହୀ ଟ୍ରେନ୍ ପାଇଁ ଏହାକୁ ଅଟକାଇ ରଖାଯାଉଥିବାରୁ ରେଳବାଇ ଏହାର ସୁପରଫାଷ୍ଟ ମାନ୍ୟତା ପ୍ରତ୍ୟାହାର କରି ସାଧାରଣ ଏକ୍ସପ୍ରେସ୍କୁ ଖସାଇ ଦେଇଛି। ଉପରୋକ୍ତ ପରିସଂଖ୍ୟାନରୁ ଏହା ସ୍ପଷ୍ଟ ହେଉଛି ଯେ ଦେଶର ଅନ୍ୟ ପ୍ରାନ୍ତ (ଯଥା ପଶ୍ଚିମ ଓ ଉତ୍ତର-ପଶ୍ଚିମ ରେଳପଥ) ତୁଳନାରେ ଓଡ଼ିଶା ଏବଂ ଏହାର ପଡ଼ୋଶୀ ଖଣିଜ ସମୃଦ୍ଧ ରେଳ ଜୋନ୍ଗୁଡ଼ିକ (ECoR, SER, SECR) ‘ଅଧିକ ରାଜସ୍ୱ, କିନ୍ତୁ ନିମ୍ନମାନର ଯାତ୍ରୀ ସେବା’ ନୀତିର ଶିକାର ହେଉଛନ୍ତି। ଓଡ଼ିଶାର ରେଳ ଯାତ୍ରୀମାନେ କେବଳ ଅସୁବିଧାର ସମ୍ମୁଖୀନ ହେଉନାହାନ୍ତି, ବରଂ ସମୟାନୁବର୍ତ୍ତିତା ଅଭାବରୁ ସୁପରଫାଷ୍ଟ ଭଳି ଗୁରୁତ୍ୱପୂର୍ଣ୍ଣ ଟ୍ରେନ୍ଗୁଡ଼ିକ ନିଜର ମାନ୍ୟତା ମଧ୍ୟ ହରାଉଛନ୍ତି। ଯାତ୍ରୀ ସେବାକୁ ପ୍ରାଥମିକତା ଦେଇ ଟ୍ରେନ୍ ଚଳାଚଳ ସ୍ୱାଭାବିକ କରିବାକୁ ସାଧାରଣରେ ଦାବି ହେଉଛି। ଓଡ଼ିଶା ଦେଇ ଯାଇଥିବା ତିନୋଟି ପ୍ରମୁଖ ରେଳ ଡିଭିଜନ୍ — ସମ୍ବଲପୁର (Sambalpur), ଖୋର୍ଦ୍ଧା ରୋଡ୍ (Khurda Road) ଏବଂ ଚକ୍ରଧରପୁର (Chakradharpur) — ଭାରତୀୟ ରେଳବାଇକୁ ସର୍ବାଧିକ ରାଜସ୍ୱ ଦେଉଥିବା ସତ୍ତ୍ୱେ, ଯାତ୍ରୀ ସେବା ଓ ଟ୍ରେନ୍ ଚଳାଚଳ କ୍ଷେତ୍ରରେ ଗମ୍ଭୀର ସମସ୍ୟା ଦେଇ ଗତି କରୁଛନ୍ତି। ଖୋର୍ଦ୍ଧା ରୋଡ୍ ଡିଭିଜନ୍ (Khurda Road Division – ECoR) ପୂର୍ବତଟ ରେଳପଥର ସବୁଠାରୁ ଅଧିକ ଆୟକାରୀ ଡିଭିଜନ୍, କିନ୍ତୁ ସମୟାନୁବର୍ତ୍ତିତା କ୍ଷେତ୍ରରେ ସବୁଠାରୁ ପଛରେ ରହିଛି। ୨୦୨୬-୨୭ ଆର୍ଥିକ ବର୍ଷର ଅଗଷ୍ଟ ସୁଦ୍ଧା ଖୋର୍ଦ୍ଧା ରୋଡ୍ ଡିଭିଜନ୍ରେ ମାତ୍ର ୪୦.୧୭% ଟ୍ରେନ୍ ଠିକ୍ ସମୟରେ ଚଳାଚଳ କରିଛି, ଯାହା ଦେଶର ୭୧ଟି ଡିଭିଜନ୍ ମଧ୍ୟରେ ସର୍ବନିମ୍ନ ସ୍ତରରେ ରହିଛି। ୨୦୨୬-୨୭ ର ପ୍ରଥମ ୬ ମାସରେ ଖୋର୍ଦ୍ଧା ଡିଭିଜନ୍ ଏକାକୀ ୮୭.୬୪ ମିଲିୟନ ଟନ୍ (MT) ମାଲ ପରିବହନ କରିଛି। ତାଳଚେର କୋଇଲା ଖଣି, ପାରାଦୀପ ବନ୍ଦର ଓ ଧାମରା ବନ୍ଦରକୁ ସଂଯୋଗ କରୁଥିବା ଲାଇନ୍ରେ ଅତ୍ୟଧିକ ମାଲବାହୀ ଟ୍ରେନ୍ ଚଳାଚଳ ଯୋଗୁଁ ହାଓଡ଼ା-ଚେନ୍ନାଇ ମୁଖ୍ୟ ଲାଇନ୍ ଓ କଟକ-ଅନୁଗୁଳ ରୁଟ୍ରେ ଯାତ୍ରୀବାହୀ ଟ୍ରେନ୍ ଘଣ୍ଟା ଘଣ୍ଟା ଅଟକି ରହୁଛି।ଅସମ୍ପୂର୍ଣ୍ଣ ପ୍ରକଳ୍ପ ଓ ବ୍ଲକ୍: ଖୋର୍ଦ୍ଧା-ବଲାଙ୍ଗୀର ରେଳପଥ ନିର୍ମାଣ କାର୍ଯ୍ୟରେ ମନ୍ଥରତା ଏବଂ ପାରାଦୀପ-ରହମା ଓ ମାଳତୀପାଟପୁର-ପୁରୀ ସେକ୍ସନରେ ବାରମ୍ବାର ନିରାପତ୍ତା ଜନିତ ବ୍ଲକ୍ (Safety/Non-Interlocking works) ଯୋଗୁଁ ନିୟମିତ ଭାବେ ପାସେଞ୍ଜର ଓ ମେମୁ ଟ୍ରେନ୍ ବାତିଲ୍ ହେଉଛି। ପଶ୍ଚିମ ଓ କେନ୍ଦ୍ରୀୟ ଓଡ଼ିଶାକୁ ସଂଯୋଗ କରୁଥିବା ଏହି ଡିଭିଜନ୍ରେ ଭିତ୍ତିଭୂମି ଅଭାବ ଏବଂ ‘ଆଉଟର୍ ସିଗନାଲ୍’ରେ ଟ୍ରେନ୍ ଅଟକାଇବା ଏକ ପ୍ରମୁଖ ସମସ୍ୟା। ସମ୍ବଲପୁର ଡିଭିଜନ୍ର ଲପଙ୍ଗା (Lapanga) ଏବଂ ଝାରସୁଗୁଡ଼ା-ସମ୍ବଲପୁର ସେକ୍ସନରେ ଶିଳ୍ପ ସଂସ୍ଥାଗୁଡ଼ିକର ମାଲବାହୀ ଟ୍ରେନ୍କୁ ବାଟ ଛାଡ଼ିବା ପାଇଁ ଅନେକ ସମୟରେ ସୁପରଫାଷ୍ଟ ଏକ୍ସପ୍ରେସ୍ ଟ୍ରେନ୍ଗୁଡ଼ିକୁ ଅଟକାଇ ରଖାଯାଉଛି। ୨୦୨୬-୨୭ ର ପ୍ରଥମ ୬ ମାସରେ ଏହି ଡିଭିଜନ୍ର ମାଲ ପରିବହନ ୭.୩% ବୃଦ୍ଧି ପାଇ ୧୩.୧୫ MT ରେ ପହଞ୍ଚିଛି। ଆନ୍ତଃ-ଜୋନ୍ ସମନ୍ୱୟ ଅଭାବ (Bottlenecks): ସମ୍ବଲପୁର ଡିଭିଜନ୍ ତିନୋଟି ଭିନ୍ନ ଭିନ୍ନ ରେଳ ଜୋନ୍ (ECoR, SECR ଏବଂ SER) ର ସୀମାରେ ଥିବାରୁ ଝାରସୁଗୁଡ଼ା, ଟିଟିଲାଗଡ଼ ଏବଂ ସମ୍ବଲପୁର ଜଙ୍କସନରେ ‘ଟ୍ରାଫିକ୍ ଜାମ୍’ ପରିସ୍ଥିତି ସୃଷ୍ଟି ହୁଏ। ଛତିଶଗଡ଼ (SECR) ପଟୁ ଆସୁଥିବା ଦୁର୍ଗ-ପୁରୀ ଏକ୍ସପ୍ରେସ୍ ଭଳି ଟ୍ରେନ୍ଗୁଡ଼ିକ ଏଠାରେ ଅଧିକ ବିଳମ୍ବିତ ହୁଅନ୍ତି। ସମ୍ବଲପୁର ଜଙ୍କସନକୁ ଅଣଦେଖା: ଅନେକ ଗୁରୁତ୍ୱପୂର୍ଣ୍ଣ ଦୂରଗାମୀ ଟ୍ରେନ୍କୁ ସମ୍ବଲପୁର ମୁଖ୍ୟ ଷ୍ଟେସନ ପରିବର୍ତ୍ତେ ସମ୍ବଲପୁର ସିଟି (Sambalpur City) ଦେଇ ବାଇପାସ୍ କରାଯାଉଥିବାରୁ ସ୍ଥାନୀୟ ଯାତ୍ରୀମାନେ ଅସୁବିଧାର ସମ୍ମୁଖୀନ ହେଉଛନ୍ତି। ରାଉରକେଲା ଓ ଝାରସୁଗୁଡ଼ା ଭଳି ଓଡ଼ିଶାର ପ୍ରମୁଖ ଶିଳ୍ପ ସହରଗୁଡ଼ିକ ଭୌଗୋଳିକ ଦୃଷ୍ଟିରୁ ଓଡ଼ିଶାରେ ଥିଲେ ମଧ୍ୟ ଏହାର ପ୍ରଶାସନିକ ମୁଖ୍ୟାଳୟ ଝାଡ଼ଖଣ୍ଡର ଚକ୍ରଧରପୁର ଓ କୋଲକାତା (SER) ରେ ରହିଛି। ଫଳରେ ଓଡ଼ିଶାର ଯାତ୍ରୀମାନଙ୍କ ଦାବି (ଯଥା- ରାଉରକେଲାରେ ନୂଆ ରେଳ ଡିଭିଜନ୍ ପ୍ରତିଷ୍ଠା ଓ ତାଳଚେର-ବିମଳାଗଡ଼ ଲାଇନ୍ର ତ୍ୱରିତ ନିର୍ମାଣ) ବାରମ୍ବାର ଅଣଦେଖା ହେଉଛି। ଏହି ସମସ୍ୟାର ସ୍ଥାୟୀ ସମାଧାନ ପାଇଁ ପୂର୍ବତଟ ଡେଡିକେଟେଡ୍ ଫ୍ରେଟ୍ କରିଡର (East Coast DFC) ର ତ୍ୱରିତ ନିର୍ମାଣ, ରାଉରକେଲା କିମ୍ବା ଝାରସୁଗୁଡ଼ାରେ ଏକ ନୂତନ ରେଳ ଡିଭିଜନ୍ ପ୍ରତିଷ୍ଠା ଏବଂ ତାଳଚେର-ବିମଳାଗଡ଼ ଓ ଖୋର୍ଦ୍ଧା-ବଲାଙ୍ଗୀର ରେଳପଥର ଶୀଘ୍ର ସମ୍ପୂର୍ଣ୍ଣତା ଏକାନ୍ତ ଅପରିହାର୍ଯ୍ୟ। ଆଜିର ସାମ୍ବାଦିକ ସମ୍ମିଳନୀରେ ପିସିସି ମୁଖପାତ୍ର ଜୟଶ୍ରୀ ପାତ୍ର ଯୋଗ ଦେଇ ତେଲକୋଇରେ ଦୁଷ୍କର୍ମର ଶିକାର ହୋଇ ଶେଷରେ ଦିନ ପରେ ପ୍ରାଣ ହରାଇଥିବା ବିଧବା ମହିଳାଙ୍କ ପାଇଁ ପିସିସି ପକ୍ଷରୁ ଶୋକପ୍ରକାଶ କରିବା ସଙ୍ଗେସଙ୍ଗେ ରାଜ୍ୟ ସରକାର ତୁରନ୍ତ ଆଇନଶୃଙ୍ଖଳା ପରିସ୍ଥିତି ସୁଧାରନ୍ତୁ ବୋଲି ଦାବି କରିଥିଲେ। ଅନ୍ୟ ପକ୍ଷରେ ସୋମବାର ଭୁବନେଶ୍ବରଠାରେ ବିଧାୟକମାନଙ୍କୁ ଉପରାଷ୍ଟ୍ରପତିଙ୍କ ପ୍ରଶିକ୍ଷଣ କାର୍ଯ୍ୟକ୍ରମରେ କଂଗ୍ରେସ ବିଧାୟକମାନେ ବର୍ଜନ କରିବା ନିଷ୍ପତ୍ତିକୁ ସ୍ବଗତ କରିଥିଲେ। ଆଗ ବିଜେପି ନିଜକୁ ଓ ବିଧାୟକମାନଙ୍କୁ ସଂସ୍କାରିତ କରୁ, ପରେ ଅନ୍ୟ ବିଧାୟକମାନଙ୍କୁ ପ୍ରଶିକ୍ଷଣ ଦେବ ବୋଲି ସେ ଆହ୍ବାନ ଦେଇଥିଲେ। Post navigation Cyclone Akvan: ସମ୍ଭାବ୍ୟ ବାତ୍ୟା ମୁକାବିଲା ପ୍ରସ୍ତୁତିର ସମୀକ୍ଷା କଲେ ସୁରେଶ ପୂଜାରୀ BJD Targets BJP Government: ଓଡ଼ିଶାବାସୀଙ୍କ ସ୍ୱାର୍ଥକୁ ଅଣଦେଖା କରୁଛି ବିଜେପି ସରକାର: ସୁଜାତା ରାଉତ