ସପ୍ତଦଶ ଓଡ଼ିଶା ବିଧାନସଭାର ବିଧାୟକମାନଙ୍କ ପାଇଁ ଆୟୋଜିତ ଦିନିକିଆ ଅଭିମୁଖୀକରଣ ବା ପ୍ରଶିକ୍ଷଣ କାର୍ଯ୍ୟକ୍ରମ ସୋମବାର ଉଦଯାପିତ ହୋଇଯାଇଛି । ଏଥିରେ ଅଧ୍ୟକ୍ଷତା କରି ବାଚସ୍ପତି ସୁରମା ପାଢୀ କହିଲେ ଯେ, ବିଧାନସଭା ଅଧିବେଶନ କେବଳ ବୈଠକରେ ସୀମିତ ନୁହେଁ, ଏଠାରେ ଆଲୋଚନାର ଗୁଣବତ୍ତା ଓ ସୁଫଳ ଯେପରି ଜନସାଧାରଣଙ୍କ ନିକଟରେ ପହଂଚିବ, ତାହା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ତଥ୍ୟବିହୀନ ଯୁକ୍ତି ଅପେକ୍ଷା ତଥ୍ୟ ସମୃଦ୍ଧ ଆଲୋଚନା ଅତ୍ୟନ୍ତ ଜରୁରୀ । ଏଥିପାଇଁ ନିରନ୍ତର ଶିକ୍ଷା, ସଂସ୍କାର ଏବଂ ନିଜର ଜ୍ଞାନକୁ ସମୟୋପଯୋଗୀ ଭାବେ ପରିବର୍ତ୍ତନ କରିବାର ଆବଶ୍ୟକତା ରହିଛି ।

ବିଧାନସଭା ଗୃହ ଚଳାଇବା ପାଇଁ ସମସ୍ତଙ୍କର ଧୈର୍ଯ୍ୟ, ଶୃଙ୍ଖଳା ଓ ପାରସ୍ପରିକ ସହଯୋଗିତା ଲୋଡ଼ା ବୋଲି ପ୍ରକାଶ କରିବା ସହ ଜନସେବାରେ ସମସ୍ତଙ୍କୁ ସଚ୍ଚୋଟତା ଓ ନୈତିକତା ବଜାୟ ରଖିବାକୁ ନିଜ ଅଭିଭାଷଣରେ ସେ କହିଥିଲେ । ଦୂରଦୃଷ୍ଟିସମ୍ପନ୍ନ ନୀତି ପ୍ରସ୍ତୁତି, ଗଠନମୂଳକ ଆଲୋଚନା ଓ ସହମତିଭିତ୍ତିକ ନିଷ୍ପତ୍ତି ସହ ଜନକଲ୍ୟାଣକାରୀ ପଦକ୍ଷେପ ଉପରେ ସେ ଦଳ ମତ ନିର୍ବିଶେଷରେ ମାନ୍ୟବର ବିଧାୟକଙ୍କ ସହଯୋଗ ଲୋଡ଼ିଥିଲେ ।

ଉପ-ମୁଖ୍ୟମନ୍ତ୍ରୀ ପ୍ରଭାତୀ ପରିଡା ମୁଖ୍ୟ ଅତିଥି ଭାବେ ଯୋଗ ଦେଇ କହିଲେ ଯେ, ଆଜିର ଏହି ପ୍ରଶିକ୍ଷଣ ବିଧାୟକମାନଙ୍କ ପାଇଁ ଉପାଦେୟ ହୋଇଛି । ବିଧାନସଭା କେବଳ ଆଇନ ପ୍ରଣୟନ ନୁହେଁ, ଲୋକମାନଙ୍କର ଆଶା, ଆକାଂକ୍ଷାକୁ ପ୍ରକାଶ କରିବାର ଏକ ମାଧ୍ୟମ । ଆଜିର ପ୍ରଶିକ୍ଷଣ କାର୍ଯ୍ୟକ୍ରମରେ ଭାରତର ଉପ-ରାଷ୍ଟ୍ରପତିଙ୍କ ଯୋଗଦାନ ଆମ ପାଇଁ ଗୌରବମୟ ଇତିହାସ ସୃଷ୍ଟି କରିଛି ବୋଲି ସେ କହିଥିଲେ । ଚଳିତ ବିଧାନସଭାରେ ବିଭିନ୍ନ ଦଳର ବହୁ ନବାଗତ ବିଧାୟକ ନିର୍ବାଚିତ ହୋଇ ଆସିଥିବା ବେଳେ ସେମାନଙ୍କର ପ୍ରଦର୍ଶନ ଖୁବ ଉତ୍ସାହପଦ ଓ ଉଚ୍ଚକୋଟୀର ରହିଛି । ସେମାନଙ୍କ ଉପରେ ଜନସାଧାରଣଙ୍କର ବହୁ ଆଶା ଓ ଆକାଂକ୍ଷା ରହିଛି ।

ଉଦଯାପନୀ ଅଧିବେଶନରେ ସଂସଦୀୟ ବ୍ୟାପାର ମନ୍ତ୍ରୀ ଡ. ମୁକେଶ ମହାଲିଙ୍ଗ ଯୋଗଦେଇ କହିଥିଲେ ଯେ, ସପ୍ତଦଶ ବିଧାନସଭାର ବିଧାୟକମାନଙ୍କ ପାଇଁ ଉଦ୍ଦିଷ୍ଟ ଏହି ଅଭିମୁଖୀକରଣ କାର୍ଯ୍ୟକ୍ରମ ସେମାନଙ୍କୁ ନିଶ୍ଚିତ ଭାବେ ଅନୁପ୍ରାଣିତ କରିଛି l ବହୁ ପ୍ରସଙ୍ଗରେ ବିଧାନସଭାର କାର୍ଯ୍ୟ ପ୍ରଣାଳୀ ସମ୍ପର୍କରେ ସେମାନେ ଜିଜ୍ଞାସା ପ୍ରକାଶ କରିଛନ୍ତି ଏବଂ ବହୁ ସନ୍ଦେହ ମୋଚନ କରିଛନ୍ତି l ଏହି କାର୍ଯ୍ୟକ୍ରମ ସମସ୍ତଙ୍କୁ ଦୂରଦର୍ଶୀ ଓ ଆଗାମୀ ଦିନରେ ଜଣେ ଜଣେ ଆହୁରି ଭଲ ବିଧାୟକ ହେବା ସହିତ ବିଧାନସଭାର କାର୍ଯ୍ୟକୁ ଅଧିକ ଦକ୍ଷ ଓ ପ୍ରଭାବୀ କରିବାରେ ସହାୟକ ହେବ ବୋଲି ସେ ଦୃଢୋକ୍ତି ପ୍ରକାଶ କରିଥିଲେ l

କାର୍ଯ୍ୟକ୍ରମ ଶେଷରେ ଉପବାଚସ୍ପତି ଭବାନୀ ଶଙ୍କର ଭୋଇ ଧନ୍ୟବାଦ ଅର୍ପଣ କରିଥିଲେ । ଏହି ଅବସରରେ ରାଜ୍ୟ ମନ୍ତ୍ରୀ ମଣ୍ଡଳର ସଦସ୍ୟ, ମାନ୍ୟବର ସାଂସଦ, ମାନ୍ୟବର ବିଧାୟକ ସକ୍ରିୟ ଅଂଶଗ୍ରହଣ କରିଥିଲେ । ଏହି କାର୍ଯ୍ୟକ୍ରମରେ ବିଧାନସଭାର ସଚିବ ସତ୍ୟବ୍ରତ ରାଉତ ଓ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।

ପ୍ରଶିକ୍ଷଣ କାର୍ଯ୍ୟକ୍ରମରେ ଦୁଇଟି ପ୍ରଶିକ୍ଷଣ ସମ୍ପାନ ଆୟୋଜିତ ହୋଇଥିଲା । ପ୍ରଥମ ଅଧିବେଶନରେ ବିଧାନସଭାର ବିଭିନ୍ନ କମିଟି ବ୍ୟବସ୍ଥା ମାଧ୍ୟମରେ କାର୍ଯ୍ୟପାଳିକାମାନଙ୍କର କାର୍ଯ୍ୟକୁ ବିଧାୟକମାନଙ୍କ ଦ୍ୱାରା ତଦାରଖ କରାଯିବା ସଂପର୍କରେ ଆଲୋଚନା ହୋଇଥିଲା । ବାଚସ୍ପତିଙ୍କ ଅଧ୍ୟକ୍ଷତାରେ ଆୟୋଜିତ ଏହି ଅଧିବେଶନରେ ଲୋକସଭାର ସାଂସଦ ଡଃ ଭର୍ତ୍ତୃହରି ମହତାବ, ଲୋକସଭା ସଚିବାଳୟର ପ୍ରାକ୍ତନ ଯୁଗ୍ମ ସଚିବ ଡଃ. ରୂପ ନାରାୟଣ ଦାସ ଏବଂ ଉପମୁଖ୍ୟ ସଚେତକ ଗୋବିନ୍ଦ ଚନ୍ଦ୍ର ଦାସ ଯୋଗଦେଇ ସଂସଦୀୟ ପରମ୍ପରାରେ ବିଭିନ୍ନ କମିଟିର ଗୁରୁତ୍ଵ ସମ୍ପର୍କରେ ଆଲୋଚନା କରିଥିଲେ । ଆଇନ ପ୍ରଣୟନ, ପ୍ରଶାସନିକ କାର୍ଯ୍ୟର ନିରୀକ୍ଷଣ ଓ ଅନୁଧ୍ୟାନ କରି ସରକାରଙ୍କୁ ପରାମର୍ଶ, ବଜେଟ ଅନୁଯାୟୀ ଖର୍ଚ୍ଚ ତଦାରଖ, ବିଧାନସଭାରେ ପ୍ରଶ୍ନୋତ୍ତର କାର୍ଯ୍ୟକ୍ରମରେ ଅଂଶଗ୍ରହଣ ଏବଂ କାର୍ଯ୍ୟପାଳିକାଙ୍କର ଉତ୍ତରଦାୟିତ୍ୱ ଉପରେ ସାଂସଦ ଡଃ ମହତାବ ଆଲୋକପାତ କରିଥିଲେ ।

ବାଚସ୍ପତିଙ୍କ ଅଧ୍ୟକ୍ଷତାରେ ଆୟୋଜିତ ଦ୍ଵିତୀୟ ଅଧିବେଶନରେ ଲୋକସଭା ସଚିବାଳୟର ପ୍ରାକ୍ତନ ନିର୍ଦ୍ଦେଶକ ଡଃ ଦୀପକ ଗୋସାଇଁ ଯୋଗ ଦେଇ ବିଧେୟକ ଓ ବଜେଟ ପ୍ରକ୍ରିୟା ସଂପର୍କରେ ବିସ୍ତୃତ ଆଲୋଚନା କରିଥିଲେ । ସରକାରୀ ମୁଖ୍ୟସଚେତକ ସରୋଜ କୁମାର ପ୍ରଧାନ କାର୍ଯ୍ୟକ୍ରମର ଆଭିମୁଖ୍ୟ ଉପରେ ପ୍ରାରମ୍ଭିକ ବକ୍ତବ୍ୟ ରଖିଥିଲେ ।

By Nirvay

Leave a Reply

Your email address will not be published. Required fields are marked *