India Asian Games medal tally 2026: ଏସିଆନ୍ ଗେମ୍ସ ୨୦୨୬: ୮୫ଟି ପଦକ ସହ ଅଭିଯାନ ଶେଷ କଲା ଭାରତ

ଜାପାନର ଆଇଚି-ନାଗୋୟାଠାରେ ଆୟୋଜିତ ଏସିଆନ୍ ଗେମ୍ସରେ ଭାରତର ସଫଳ ଅଭିଯାନ ଉତ୍ସବ ସହ ଶେଷ ହୋଇଛି। ଏସୀୟ କ୍ରୀଡ଼ାରେ ଭାରତୀୟ କ୍ରୀଡ଼ାବିତ୍‌ମାନେ ସେମାନଙ୍କର ଅସାଧାରଣ ପ୍ରଦର୍ଶନ ବଳରେ ବିଶ୍ୱ ଦରବାରରେ ଦେଶର ନାମକୁ ନୂଆ ଉଚ୍ଚତାକୁ ନେଇଯାଇଛନ୍ତି। ଏଥିରେ ଭାରତ ମୋଟ ୮୫ଟି ପଦକ ଜିତି ପଦକ ତାଲିକାର ଚତୁର୍ଥ ସ୍ଥାନ ଅଧିକାର କରିପାରିଛି। ସେମଧ୍ୟରେ ୨୧ଟି ସ୍ବର୍ଣ୍ଣ ପଦକ ଥିବା ବେଳେ, ୨୭ରୁ ରୌପ୍ୟ ଓ ୩୭ଟି କାଂସ୍ୟ ପଦକ ରହିଛି । ଭାରତୀୟ ଖେଳାଳିମାନେ ଚମତ୍କାର ପ୍ରଦର୍ଶନ କରି ଏହି ସଫଳତା ହାସଲ କରିଛନ୍ତି ।

ଭାରତୀୟ ମହିଳା ଓ ପୁରୁଷ କ୍ରିକେଟ୍ ଟିମ୍, କବାଡ଼ି ଦଳ ଏବଂ ହକି ଟିମ୍ ନିଜ ନିଜ ବିଭାଗରେ ଆକର୍ଷଣୀୟ ଖେଳ ପ୍ରଦର୍ଶନ କରି ସ୍ୱର୍ଣ୍ଣ ପଦକ କବଜା କରିଛନ୍ତି। ସେହିପରି ନିଶାଣବାଜି ଏବଂ ତୀରନ୍ଦାଜୀରେ ଭାରତୀୟ ଖେଳାଳିଙ୍କ ଦବଦବା ଦେଖିବାକୁ ମିଳିଥିଲା। ଟ୍ରାପ୍ ଶୁଟିଂରେ ନାରୁ ଧାଣ୍ଡା, ମିକ୍ସଡ୍ ଟିମ୍‌ରେ କମଲଜୀତ୍, ସୁରୁଚି ସିଂହ, କ୍ୟାନନ୍ ଚେନାଲ ଏବଂ ଆର୍ଚେରୀରେ ଜ୍ୟୋତି ସୁରେଖା, ଚିକିଥା ତନପାର୍ଥୀ, ସାହିଲ ଯାଦବ, ଅଙ୍କିତା ଭକତ, କୁମକୁମ ମହୋତ ପ୍ରମୁଖ ସ୍ୱର୍ଣ୍ଣ ଜିତି ଦେଶକୁ ଗୌରବାନ୍ୱିତ କରିଛନ୍ତି। ଟ୍ରାକ୍ ଆଣ୍ଡ ଫିଲ୍ଡରେ ମହିଳା ୪x୪୦୦ ମିଟର ରିଲେ ଦଳ କିରଣ ପାହାଲ, ପୂର୍ବମ୍ମା ଏମ୍‌ଆର୍, ପ୍ରାଚୀ ଚୌଧୁରୀ ଓ ବିଦ୍ୟା ରାମରାଜଙ୍କ ନେତୃତ୍ୱରେ ସ୍ୱର୍ଣ୍ଣ ସଫଳତା ହାସଲ କରିଛି । ସେହିପରି କୁସ୍ତିରେ ଅମନ ସେହରାୱତ ଓ ସୁଜିତ କଲକଲ, ବକ୍ସିଂରେ ଲଭଲିନା ବୋର୍ଗୋହେନ୍ ଏବଂ ଗଲ୍ଫରେ ପ୍ରଣବୀ ଉର୍ସ ସ୍ୱର୍ଣ୍ଣ ପଦକ ହାସଲ କରି ନିଜର ଦକ୍ଷତା ପ୍ରମାଣିତ କରିଛନ୍ତି।

କେବଳ ସ୍ୱର୍ଣ୍ଣ ନୁହେଁ, ବରଂ ରୌପ୍ୟ ଓ କାଂସ୍ୟ ପଦକରେ ମଧ୍ୟ ଭାରତର ପଲ୍ଲା ଭାରି ରହିଥିଲା। ପଦକ ତାଲିକାକୁ ଲକ୍ଷ୍ୟ କଲେ ଆଥଲେଟିକ୍ସ ବିଭାଗରୁ ଭାରତ ସର୍ବାଧିକ ୨୪ଟି ପଦକ (୧ ସ୍ୱର୍ଣ୍ଣ, ୯ ରୌପ୍ୟ, ୧୪ କାଂସ୍ୟ) ହାସଲ କରିଥିବା ବେଳେ ଶୁଟିଂରୁ ୧୫ଟି, ଆର୍ଚେରୀରୁ ୯ଟି, ବକ୍ସିଂରୁ ୬ଟି ଏବଂ କୁସ୍ତିରୁ ୬ଟି ପଦକ ମିଳିଛି। ଏଥିସହିତ ସ୍କ୍ୱାଶ୍, ଗଲ୍ଫ, ବ୍ୟାଡମିଣ୍ଟନ୍, ଟେବୁଲ ଟେନିସ୍ ଓ ସେଲିଂ ଆଦି କ୍ରୀଡ଼ାରୁ ମଧ୍ୟ ଭାରତୀୟ ଆଥଲେଟ୍‌ମାନେ ଅନେକ ପଦକ ସାଉଣ୍ଟିବାରେ ସଫଳ ହୋଇଛନ୍ତି।