ସମ୍ବଲପୁର-ତାଳଚେର ରେଳପଥ ଦୋହରୀକରଣ ପ୍ରକଳ୍ପର ସ୍ୱତନ୍ତ୍ର ଜମି ଅଧିଗ୍ରହଣ ଅଧିକାରୀ ଅଜୟ କୁମାର ଗଡ଼ନାୟକ ଓଡ଼ିଶା ଭିଜିଲାନ୍ସ ଜାଲରେ ଛନ୍ଦି ହୋଇପଡ଼ିଛନ୍ତି। ଜଣେ ଜମିମାଲିକଙ୍କଠାରୁ ସେ ମୋଟ ୫ ଲକ୍ଷ ଟଙ୍କା ଲାଞ୍ଚ ଦାବି କରିଥିବା ଅଭିଯୋଗ ହୋଇଥିଲା। ସୂଚନା ଅନୁଯାୟୀ, ଅଭିଯୁକ୍ତ ଅଧିକାରୀ ଜମି ଅଧିଗ୍ରହଣ ବାବଦକୁ ୮୪,୬୨,୨୮୮ ଟଙ୍କା କ୍ଷତିପୂରଣ ମଞ୍ଜୁର କରିବା ଏବଂ ଭବିଷ୍ୟତର ତୃତୀୟ ରେଳପଥ ପ୍ରକଳ୍ପ କ୍ଷତିପୂରଣ କାର୍ଯ୍ୟରେ ଅନୁକୂଳ ପରିସ୍ଥିତି ସୃଷ୍ଟି କରିବା ପାଇଁ ମୋଟ ୫,୧୦,୦୦୦ ଟଙ୍କା ଲାଞ୍ଚ ମାଗିଥିଲେ। ଏହାପୂର୍ବରୁ ଗତ ଅକ୍ଟୋବର ୨୭, ୨୦୨୬ରେ ସେ ଅଭିଯୋଗକାରୀଙ୍କଠାରୁ ୨ ଲକ୍ଷ ଟଙ୍କା ବାବଦକୁ ନେଇସାରିଥିବା ବେଳେ ବାକି ୩.୧୦ ଲକ୍ଷ ଟଙ୍କା ପାଇଁ ଚାପ ପକାଉଥିଲେ। ଏପରିକି ଟଙ୍କା ଶୀଘ୍ର ନ ଦେଲେ ଭବିଷ୍ୟତରେ ଜମି ଅଧିଗ୍ରହଣ ପ୍ରକ୍ରିୟାରେ ବିଭିନ୍ନ ଅସୁବିଧା ସୃଷ୍ଟି କରିବେ ବୋଲି ସେ ଧମକ ମଧ୍ୟ ଦେଇଥିଲେ। ଅଧିକାରୀଙ୍କ ଏପରି ହଇରାଣଜାଲ ଏବଂ ବାରମ୍ବାର ଲାଞ୍ଚ ଦାବିକୁ ସହି ନ ପାରି ଅଭିଯୋଗକାରୀ ଜଣକ ଶେଷରେ ଭିଜିଲାନ୍ସର ଦ୍ୱାରସ୍ଥ ହୋଇଥିଲେ। ଅଭିଯୋଗକୁ ଭିତ୍ତି କରି ଭିଜିଲାନ୍ସ ଟିମ୍ ଏକ ଯୋଜନାବଦ୍ଧ ଜାଲ ବିଛାଇଥିଲା ଏବଂ ସୋମବାର ଦିନ ଅଧିକାରୀ ଜଣକ ବାକି ୩.୧୦ ଲକ୍ଷ ଟଙ୍କା ନେଉଥିବା ବେଳେ ତାଙ୍କୁ କାବୁ କରିଥିଲା। ତାଙ୍କ ନିକଟରୁ ସମସ୍ତ ଲାଞ୍ଚ ଟଙ୍କା ଜବତ କରାଯାଇଛି। ଏହି ସଫଳ ଟ୍ରାପ୍ ଅପେରସନ୍ ପରେ ଭିଜିଲାନ୍ସ ପକ୍ଷରୁ ଅଧିକାରୀଙ୍କ ସହିତ ଜଡ଼ିତ ତିନୋଟି ଭିନ୍ନ ସ୍ଥାନରେ ଏକକାଳୀନ ଚଢ଼ଉ କରାଯାଇ ଆୟ ବହିର୍ଭୂତ ସମ୍ପତ୍ତି ଠାବ ପାଇଁ ତଦନ୍ତ ଜାରି ରହିଛି। Post navigation Ganjam Fully Prepared For Disaster Response: ଗଞ୍ଜାମ ଜିଲ୍ଲାରେ ବିପର୍ଯ୍ୟୟ ମୁକାବିଲା ପାଇଁ ପ୍ରଶାସନ ସମ୍ପୂର୍ଣ୍ଣ ପ୍ରସ୍ତୁତ; ଏଯାଏଁ ୧.୫୧ ଲକ୍ଷରୁ ଅଧିକ ଲୋକ ସ୍ଥାନାନ୍ତରିତ
