ଟାକୁଆ ପରେ ଉଠିଲାଣି ମିଲର୍ସଙ୍କୁ ଟଙ୍କା ମଗା ଅଭିଯୋଗ; ଯୋଗାଣ ମନ୍ତ୍ରୀଙ୍କ ଇସ୍ତଫା ଓ ଗିରଫ ଦାବି କଲା ବିଜଦ

କନ୍ଧମାଳ ଜିଲାରେ ଆମ୍ବ ଟାକୁଆ ଜାଉ ଖାଇବା ଘଟଣାଟି ଭାଜପା ସରକାର ସକାଶେ କଳାଦାଗ ହୋଇଛି। ବିଳମ୍ବରେ ହେଲେ ମଧ୍ୟ ମୁଖ୍ୟମନ୍ତ୍ରୀ ମୋହନଚରଣ ମାଝୀ ଘଟଣାର ଆରଡିସି ତଦନ୍ତ ପାଇଁ ନିର୍ଦ୍ଦେଶ ଦେଇ ସ୍ଥିତି ସମ୍ଭାଳିବାକୁ ଚେଷ୍ଟା କରିଛନ୍ତି । ଏହି ଘଟଣାରେ ଦୂଇଜଣଙ୍କର ମୃତ୍ୟୁ ଘଟିଛି। ଦୁଇଜଣ ମୃତ୍ୟୁ ସହ ସଂଗ୍ରାମ କରୁଛନ୍ତି । ଅନ୍ୟ ୪ ଜଣ ଚିକିତ୍ସିତ  ହେଉଛନ୍ତି । ବିଜେଡ଼ି ଏହାକୁ ନେଇ ପୁଣିଥରେ ମୋହନ ସରକାରଙ୍କୁ ଟାର୍ଗେଟ କରିଛି।

ଏହା ସହ ବିଜେପିକୁ ଟାର୍ଗେଟ କରି ବିଜେଡି କହିଛି, ମୋଦୀଙ୍କ ମାଗଣା ଚାଉଳ ଯୋଜନା ସତ୍ତ୍ୱେ କାହିଁ କି ଆଦିବାସୀ ପରିବାର ଆମ୍ବ ଟାକୁଆ ଉପରେ ନିର୍ଭର କରିବେ ? ମାଗଣାରେ ଚାଉଳ ପର୍ଯ୍ୟାପ୍ତ ପରିମାଣରେ ଉପଲବ୍ଧ । କିନ୍ତୁ ଦୁର୍ଗମ ଅଞ୍ଚଳରେ ଲୋକଙ୍କୁ ମାଗଣା ଚାଉଳ ଯୋଗାଇବା ଦାୟିତ୍ଵ ସରକାରଙ୍କର । ରାଜ୍ୟ ସରକାରଙ୍କ ପକ୍ଷରୁ ଯୋଗାଣ ବିଭାଗ ଚାଉଳ ବଣ୍ଟନ ଦାୟିତ୍ବରେ ଅଛି । କିନ୍ତୁ କନ୍ଧମାଳ ଜିଲ୍ଲାରେ ଯୋଗାଣ ବିଭାଗ ଲୋକଙ୍କୁ ଠିକ ସମୟରେ ମାଗଣା ଚାଉଳ ଦେବାରେ ଯେ ବିଫଳ ହୋଇଛନ୍ତି, ଏଥିରେ ସନ୍ଦେହ ନାହିଁ ।

ଅନ୍ୟପଟେ ଆମ୍ବ ଟାକୁଆ ଜାଉ ଖାଇ ଲୋକ ମୃତ୍ୟୁ ବରଣ କରିଥିବା ଘଟଣାକୁ ସମାଲୋଚନା କରି ଖାଦ୍ୟ ଯୋଗାଣ ଓ ଖାଉଟି କଲ୍ଯାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ରଙ୍କ ଇସ୍ତଫା ଓ ଗିରଫ ଦାବି କରିଛି । ଏହି ଏହି ଘଟଣା ଓଡ଼ିଶାର ଭାବମୂର୍ତ୍ତିକୁ ଖରାପ କରିଛି ବୋଲି କହିବା ସହ ୨୦୨୪ ଏଭଳି ଘଟଣା ଘଟିବା ଦୁର୍ଭାଗ୍ୟଜନକ ବୋଲି ବିଜଦ ନେତ୍ରୀ ଲେଖାଶ୍ରୀ ସାମନ୍ତସିଂହାର କହିଛନ୍ତି ।

ବିଜଦ ନେତ୍ରୀ ଲେଖାଶ୍ରୀ ସାମନ୍ତସିଂହାର କ‌ହିଛନ୍ତି ଯେ ଖାଦ୍ୟ ଯୋଗାଣ ମନ୍ତ୍ରୀ ନିଜ କର୍ତ୍ତବ୍ୟ ନିର୍ବାହ କରିବାରେ ବିଫଳ ହୋଇଛନ୍ତି । ତେଣୁ ଅପରାଧୀକ ଅବହେଳା ପାଇଁ ମନ୍ତ୍ରୀ ଇସ୍ତଫା ଦିଅନ୍ତୁ ଅବଂ ଲୋକଙ୍କ ମୃତ୍ୟୁ ଘଟଣାରେ ତାଙ୍କୁ ଗିରଫ କରିବା ପାଇଁ ପଦକ୍ଷେପ ନିଆଯାଉ।