ନୂଆପଡ଼ା ଉପନିର୍ବାଚନରେ ପ୍ରଚାର କରୁଥିବା ଉପମୁଖ୍ୟମନ୍ତ୍ରୀ ତଥା ମହିଳା, ଶିଶୁ ବିକାଶ ଓ ମିଶନଶକ୍ତି ମନ୍ତ୍ରୀ ପ୍ରଭାତୀ ପରିଡ଼ା ନିର୍ବାଚନ ଆଚରଣ ବିଧିର ଖୋଲା ଉଲ୍ଲଙ୍ଘନ କରିଥିବା ତଥ୍ୟ ଓ ପ୍ରମାଣ ସହ ଅଭିଯୋଗ କରିଛି ବିଜେଡି । ଆଜି ବିଜୁ ଜନତା ଦଳର ଏକ ପ୍ରତିନିଧି ମଣ୍ଡଳୀ ମୁଖ୍ୟ ନିର୍ବାଚନ ଅଧିକାରୀଙ୍କୁ ସାକ୍ଷାତ କରି ସିଆରପି ସଂଘର ରାଜ୍ୟ ସଭାପତି ଲକି ହୋତାଙ୍କ ଅଡ଼ିଓ କ୍ଲିପ୍ ପ୍ରଦାନ କରିଛି । ଏହି ଅଡ଼ିଓ କ୍ଲିପ୍ ରେ ହୋତା ସିଆରପି ସଂଘର ସମସ୍ତ ସଦସ୍ୟାଙ୍କୁ କହିଛନ୍ତି ଯେ, ନୂଆପଡ଼ା ଗସ୍ତ ଅବସରରେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ାଙ୍କ ସହ ସାକ୍ଷାତ କରି ସଂଘର ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା କରିଥିଲେ । ଏହି ଆଲୋଚନା ବେଳେ ସିଆରପି ମାନଙ୍କର ବ୍ଲକରେ କଟାଯାଉଥିବା ଇନସେଣ୍ଟିଭ ଅର୍ଥରାଶିକୁ ଆଉ କଟାଯିବନି, ଯଦି କାହାର କଟାଯାଏ, ତାହେଲେ ବ୍ୟକ୍ତିଗତ ଭାବେ ଉପମୁଖ୍ୟମନ୍ତ୍ରୀ ନିଜେ ଏହି ଅର୍ଥ ଦେବେ ବୋଲି କହିଥିଲେ । କିଛି ସିଆରପି ସଦସ୍ୟାଙ୍କ ଉପସ୍ଥିତିରେ ଉପମୁଖ୍ୟମନ୍ତ୍ରୀ ପରିଡ଼ା ସିଆରପି ମାନଙ୍କର ବକେୟା ଦରମା ଠାରୁ ଆରମ୍ଭ କରି ସମସ୍ତ ଦାବି ପୂରଣ କରାଯିବ ବୋଲି ଘୋଷଣା କରିଥିଲେ । କ୍ଷମତାକୁ ଆସିବାର ୧୬ ମାସ ମଧ୍ୟରେ ମିଶନଶକ୍ତି ବିଭାଗର ପୁନଃଗଠନ ନାମରେ ସିଆରପି, ଏମବିକେ ଓ ମିଶନଶକ୍ତି କର୍ମକର୍ତ୍ତାମାନେ ସର୍ବାଧିକ ନିର୍ଯାତିତ ହୋଇ ଆନ୍ଦୋଳନ କରୁଥିବା ବେଳେ ନୂଆପଡ଼ା ଉପନିର୍ବାଚରେ ଶାସକ ବିଜେପି ଦଳ ପ୍ରାର୍ଥୀଙ୍କ ସପକ୍ଷରେ ଭୋଟ୍ ହାତେଇବା ପାଇଁ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ାଙ୍କ ଏଭଳି ଖୋଲାଖୋଲି ଆଦର୍ଶ ଆଚରଣ ବିଧିର ଉଲ୍ଲଙ୍ଘନକୁ ନେଇ ବିଜୁ ଜନତା ଦଳ ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ପ୍ରତିବାଦ କରିବା ସହ ନିରପେକ୍ଷ ତଦନ୍ତ କରି ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛି । ସମଗ୍ର ରାଜ୍ୟରେ ମିଶନଶକ୍ତି କର୍ମକର୍ତ୍ତା ଓ ମହିଳା ସଶକ୍ତିକରଣ ଲାଗି ଦିନରାତି ଏକ କରି କାର୍ଯ୍ୟ କରୁଥିବା ସିଆରପି, ଏମବିକେ ମାନେ ରାଜ୍ୟ ବିଜେପି ସରକାର ଦ୍ୱାରା ସର୍ବାଧିକ ନିର୍ଯାତିତ ହୋଇଆସିଛନ୍ତି । କେବଳ ଉପନିର୍ବାଚନରେ ଏସଏଚଜି ମହିଳା ସମର୍ଥନ ହାସଲ କରିବା ପାଇଁ ବିଜେପି ଦଳର ଏହି ଚାଲ କେବେ ହେଲେ ସଫଳ ହେବ ନାହିଁ । ବାରମ୍ବାର ଆନ୍ଦୋଳନ କରି ଆସୁଥିଲେ ମଧ୍ୟ କର୍ଣ୍ଣପାତ କରୁନଥିବା ବିଜେପି ସରକାର ଆଜି ନୂଆପଡ଼ାରେ ଯାଇ ନିଜେ ପକେଟରୁ ଅର୍ଥ ଭରଣା କରିବେ ବୋଲି ଉପମୁଖ୍ୟମନ୍ତ୍ରୀ କହିବା ହାସ୍ୟାସ୍ପଦ ଏବଂ ନୂଆପଡ଼ାର ମା’ମାନେ ଏହାକୁ କେବେ ହେଲେ ଗ୍ରହଣ କରିବେ ନାହିଁ । ଦଳର ମୁଖପାତ୍ର ତଥା ମିଡିଆ ସଂଯୋଜକ ଡ଼ ଲେନିନ ମହାନ୍ତିଙ୍କ ନେତୃତ୍ୱରେ ଏହି ପ୍ରତିନିଧି ମଣ୍ଡଳୀରେ ମୁଖପାତ୍ର ତୁମ୍ବନାଥ ପଣ୍ଡା, ମିହିର ରାୟ, ଲୋରା ମହାପାତ୍ର, ଜ୍ୟୋତ୍ସ୍ନାମୟୀ ପରିଡ଼ା, ଆଂଶୁ ତ୍ରିପାଠୀ, ରୀତାଞ୍ଜଳି ପ୍ରଧାନ, ଶ୍ରୀମତୀ ଇଲା ସ୍ୱାଇଁ ପ୍ରମୁଖ ସାମିଲ ଥିଲେ । Post navigation Nuapada Bypoll: ଆସନ୍ନ ବାତ୍ୟା ଓ ଉପନିର୍ବାଚନ ପୂର୍ବରୁ ଡିଆଇଜିଙ୍କ ଛୁଟିରେ ଯିବାକୁ ନେଇ ପ୍ରଶ୍ନ ଉଠାଇଲା ବିଜେଡି Cyclone Montha: ବାତ୍ୟା ‘ମୋନ୍ଥା’ର ଲ୍ୟାଣ୍ଡଫଲ୍ ପ୍ରକ୍ରିୟା ଆରମ୍ଭ
