ରମେଶଙ୍କ ପାଦତଳେ ପ୍ରଶାସନ ଓ ବିଜୁ ଜନତା ଦଳ

ଯେଉଁ ରମେଶ ଜେନାଙ୍କୁ ଜେଲ୍‌ରେ ପୁରାଇ ଭାରି ଦହଗଞ୍ଜ କରିଥିଲେ, ଯେଉଁ ରମେଶ ଜେନାଙ୍କୁ ବିଭିନ୍ନ ମାମଲାରେ ଛନ୍ଦି ଜଣେ ଅପରାଧୀ ବୋଲି ଲୋକଙ୍କ ଆଗରେ ଦେଖାଇବାକୁ ଚେଷ୍ଟା କରୁଥିଲେ, ସେହି ସାନଖେମୁଣ୍ଡି ବିଧାୟକଙ୍କ ଗୋଡ଼ତଳେ ପଡ଼ିଛନ୍ତି ପ୍ରଶାସନ ଓ ବିଜୁ ଜନତା ଦଳ । ସେମାନଙ୍କର ଗୋଟିଏ ଅନୁରୋଧ ଆମ ଦଳକୁ ଆସନ୍ତୁ, ଆମକୁ ପ୍ରଦୀପ ପାଣିଗ୍ରାହୀଙ୍କ ଠାରୁ ରକ୍ଷା କରନ୍ତୁ । ଆପଣଙ୍କ ସବୁ ଦାବି ଆମେ ମାନିନେବୁ ।

ଏମିତି ବିଚିତ୍ର ଦୃଶ୍ୟ ଅନ୍ୟ କେଉଁଠି ଦେଖାଯାଏ ନାହିଁ । ରମେଶ ଜେନା ହେଉଛନ୍ତି ସାନଖେମୁଣ୍ଡି ବିଧାୟକ । ସେ ଜଣେ ବାହୁବଳୀ ବିଧାୟକ ମଧ୍ୟ । ତାଙ୍କୁ ବିଭିନ୍ନ ମାମଲାରେ ଛନ୍ଦି ଥିଲେ ସରକାର । ଭୁବନେଶ୍ୱରସ୍ଥିତ ତାଙ୍କ ବାସଭବନରୁ କିଛି ଅପରାଧୀଙ୍କୁ ଧରି ତାକୁ ବଡ଼ଢଙ୍ଗରେ ପ୍ରଚାର କରାଯାଇଥିଲା । ରମେଶ ଦୀର୍ଘଦିନ ଜେଲ୍‌ରେ ଥିଲେ ।

ପାଣ୍ଡିଆନଙ୍କ ପରମ ଶତ୍ରୁ ପ୍ରଦୀପ ପାଣିଗ୍ରାହୀଙ୍କୁ ଭାରତୀୟ ଜନତା ପାର୍ଟି ବ୍ରହ୍ମପୁରରୁ ଲୋକସଭା ପ୍ରାର୍ଥୀ ଘୋଷଣା ପରେ ଏତେ ଛାନିଆ ହୋଇପଡ଼ିଛନ୍ତି ଯେ ବିଜେଡି ନେତୃତ୍ୱ, ସେମାନେ ଭଲଭାବେ ବୁଝିସାରିଛନ୍ତି ଚନ୍ଦ୍ରଶେଖର ସାହୁଙ୍କ ଦ୍ୱାରା ପ୍ରଦୀପଙ୍କୁ ରୋକିବା ଆଦୌ ସମ୍ଭବ ନୁହେଁ   । ବୁଧବାର ସକାଳେ ରମେଶ ଜେନାଙ୍କ ଘରେ ବିଜେଡି ର କିଛି ବରିଷ୍ଠ ନେତାମାନେ ପହଞ୍ଚିଥିଲେ । କିନ୍ତୁ ରମେଶ ସେମାନଙ୍କୁ ସେଠାରୁ ଘଉଡ଼ାଇ ଦେଇଥିଲେ । ଅପରାହ୍ଣରେ ଜିଲାର ତୁଙ୍ଗ ପ୍ରଶାସନିକ ଅଧିକାରୀମାନେ ପହଞ୍ଚିଥିଲେ ରମେଶଙ୍କ ଘରେ । ତାଙ୍କୁ ନେହୁରା ହୋଇଥିଲେ, କହିଥିଲେ ଆମେ ତୁମର ସବୁ ଦାବି ମାନିନେବୁ । ତୁମେ ବିଜଦରେ ଯୋଗଦିଅ ।

ବାହୁବଳୀ ରମେଶ ଖାଲି ନିଜ ନିର୍ବାଚନ ମଣ୍ଡଳୀ ନୁହେଁ ବରଂ ମୋହନା ଏବଂ ବ୍ରହ୍ମପୁରରେ କିଏ ପ୍ରାର୍ଥୀ ହେବ ତାହା ସ୍ଥିର କରନ୍ତୁ । ଏବେ ପ୍ରଦୀପଙ୍କ ପାଇଁ ରମେଶଙ୍କ ନିକଟରେ ପୂରା ଆତ୍ମସମର୍ପଣ କରିଛି ପ୍ରଶାସନ ଏବଂ ବିଜଦ ।

ତେବେ ପ୍ରଶାସନ କ’ଣ ବିଜୁ ଜନତା ଦଳର ଏଜେଣ୍ଟ? ସେମାନେ କ’ଣ ଦଳ ପାଇଁ ପ୍ରାର୍ଥୀ ଖୋଜିବେ? ଏଇ ଚର୍ଚ୍ଚା ଏବେ ଖାଲି ସାନଖେମୁନ୍ଦି ନୁହେଁ ଗଞ୍ଜାମ ଜିଲା ସାରା ଚାଲିଛି । ଖୁବ୍‌ ସମ୍ଭବତଃ ବିଜୁ ଜନତା ଦଳରେ ରମେଶ ସାମିଲ ହୋଇପାରନ୍ତି ।

ଜମି କାରବାର ଏବଂ ଜମି ଦୁର୍ନୀତି ମାମଲାରେ ରମେଶଙ୍କ ନାଁ ଅଛି । ପରବର୍ତ୍ତୀ କାଳରେ ପ୍ରବର୍ତ୍ତନ ନିଦେ୍ର୍ଦଶାଳୟ (ଇଡି) ରମେଶଙ୍କ ଗର୍ଦ୍ଦନକୁ ଧରିବ ନାହିଁ ତ?