ପରୀକ୍ଷା ପେ ଚର୍ଚ୍ଚାରେ ପ୍ରଧାନମନ୍ତ୍ରୀଙ୍କ ବାର୍ତ୍ତା; ପଢନ୍ତୁ ପୁରା ଖବର

ଭୁବନେଶ୍ୱର: ପରୀକ୍ଷା ପୂର୍ବରୁ ଛାତ୍ରଛାତ୍ରୀ ଏବଂ ଅଭିଭାବକଙ୍କ ସହ କଥା ହେଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ‘ପରୀକ୍ଷା-ପେ ଚର୍ଚ୍ଚା’ କାର୍ଯ୍ୟକ୍ରମ ମାଧ୍ୟମରେ ପିଲାମାନଙ୍କ ମନର ଦ୍ୱନ୍ଦ୍ୱ ଦୂର କଲେ। ଏଥିସହ ପିଲାମାନେ କିପରି ଚାପମୁକ୍ତ ହୋଇ ପରୀକ୍ଷା ଦେବେ ସେଥିପାଇଁ ଟିପ୍ସ ଦେଇଛନ୍ତି ପ୍ରଧାନମନ୍ତ୍ରୀ।

ପରୀକ୍ଷା ହଲ୍‌ରେ କିପରି ଚାପ ମୁକ୍ତ ରହିବୁ ପ୍ରଶ୍ନରେ ପ୍ରଧାନମନ୍ତ୍ରୀ କହିଛନ୍ତି, ପରୀକ୍ଷା ହଲରେ ପ୍ରବେଶ ପରେ ନିଜ ଭିତରେ ହଜିଯାଆନ୍ତୁ। ପରୀକ୍ଷା ଆରମ୍ଭ ପୂର୍ବରୁ ପାଖରେ ଥିବା ବନ୍ଧୁଙ୍କ ସହ କଥାବାର୍ତ୍ତା ହୁଅନ୍ତୁ। ନିଜ ପାଇଁ ଛୋଟ ଲକ୍ଷ୍ୟ ନିର୍ଦ୍ଧାରଣ କରିବାକୁ ପରାମର୍ଶ ଦେଇଛନ୍ତି ପ୍ରଧାନମନ୍ତ୍ରୀ।

ପ୍ରଧାନମନ୍ତ୍ରୀ କହିଛନ୍ତି, ପ୍ରଥମରୁ ବଡ ଲକ୍ଷ୍ୟ ନିର୍ଦ୍ଧାରଣ କରି ଚାପ ନିଅନ୍ତୁ ନାହିଁ। ପ୍ରତିଯୋଗିତା ରହିବା ଜରୁରୀ, ବିନା ପ୍ରତିଯୋଗିତା ଓ ଆହ୍ୱାନରେ ଜୀବନ ପ୍ରେରଣାହୀନ। ହେଲେ ପ୍ରତିଯୋଗିତା ବନ୍ଧୁଙ୍କ ସହ ନୁହେଁ, ନିଜ ସହ କରନ୍ତୁ। ବନ୍ଧୁଙ୍କଠାରୁ ପ୍ରେରଣା ନିଅନ୍ତୁ, ଆଗକୁ ବଢନ୍ତୁ। ଈର୍ଷା, ଦ୍ୱେଷ ମନୋଭାବ ଆଣିବା ଆଦୌ ଉଚିତ୍ ନୁହେଁ ବୋଲି ପ୍ରଧାନମନ୍ତ୍ରୀ ପରାମର୍ଶ ଦେଇଛନ୍ତି।

ସେହିପରି, ଅଭିଭାବକଙ୍କୁ ଟିପ୍ସ ଦେଇ ପ୍ରଧାନମନ୍ତ୍ରୀ କହିଛନ୍ତି, କେବେ ହେଲେ ପିଲାମାନଙ୍କ ତୁଳନା ଅନ୍ୟ କାହା ସହ କରନ୍ତୁ ନାହିଁ। ତୁଳନା ଦ୍ୱାରା ପିଲାଙ୍କ ଭିତରେ ବିକୃତ ମନୋଭାବ ଆସିଥାଏ।

ଶିକ୍ଷା ମନ୍ତ୍ରଣାଳୟ ଦ୍ୱାରା ଆୟୋଜିତ ପାରୀକ୍ଷା ପେ ଚର୍ଚ୍ଚାର ଆଜି ଥିଲା ସପ୍ତମ ସଂସ୍କରଣ। କୋଭିଡ କାରଣରୁ ଚତୁର୍ଥ ସଂସ୍କରଣ ଅନଲାଇନରେ ଅନୁଷ୍ଠିତ ହୋଇଥିଲା। ଆଜିର ପରୀକ୍ଷା ପେ ଚର୍ଚ୍ଚା ଦିଲ୍ଲୀର ଭାରତ ମଣ୍ଡପମରେ ଆୟୋଜିତ ହୋଇଥିଲା। ଏଥିରେ ୧୪ ଲକ୍ଷରୁ ଅଧିକ ଶିକ୍ଷକ, ୫ ଲକ୍ଷରୁ ଅଧିକ ଅଭିଭାବକ ଯୋଗ ଦେଇଥିଲେ।

ପ୍ରତ୍ୟେକ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳର ଦୁଇଜଣ ଛାତ୍ର ଏବଂ ଜଣେ ଶିକ୍ଷକଙ୍କୁ ନିମନ୍ତ୍ରଣ କରାଯାଇଥିଲା। ଏଥିସହ ବିଭିନ୍ନ ବିଦ୍ୟାଳୟର ଛାତ୍ରଛାତ୍ରୀ ଅନଲାଇନ ମାଧ୍ୟମରେ ପ୍ରଧାନମନ୍ତ୍ରୀଙ୍କୁ ସେମାନଙ୍କ ମନର ପ୍ରଶ୍ନ ପଚାରିଥିଲେ।

ମୋଦୀ କହିଛନ୍ତି ଯେ ଅନେକ ଲୋକ ଘଣ୍ଟା ଘଣ୍ଟା ଧରି ମୋବାଇଲ୍ ଫୋନ୍ ଦେଖିଥାନ୍ତି । ପିଲାମାନଙ୍କୁ ମୋବାଇଲ୍ ଦେଖିବାର ଏକ ନିର୍ଦ୍ଧିଷ୍ଟ ସମୟ ସ୍ଥିର କରିବାକୁ ସେ କହିଛନ୍ତି । ସବୁବେଳେ ମୋବାଇଲକୁ ଦେଖ ନାହିଁ ଏବଂ ଯଦି ଦେଖିବା ଆବଶ୍ୟକ ହୁଏ ତେବେ ପରିବାର ଲୋକଙ୍କୁ କୁହ । ପାଠ ବିଷୟରେ ମୋବାଇଲରେ ଖୋଜ । ମୋବାଇଲ ଦେଖିବା ସମୟ ସ୍ଥିର କର । ନଚେତ୍ ଆପଣଙ୍କ ପରିବାର ସଦସ୍ୟ ଭାବିବେ ଯେ ଆପଣ ସାଙ୍ଗମାନଙ୍କ ସହିତ ବ୍ୟସ୍ତ ଅଛନ୍ତି କିମ୍ବା ରିଲ୍ ଦେଖୁଛନ୍ତି ବୋଲି । ଏହାଦ୍ବାରା ସେମାନେ ଅସନ୍ତୁଷ୍ଟ ହେବେ ।

ସେ କହିଛନ୍ତି ଯେ ଏହା ଯେପରି ମୋବାଇଲ୍ ରିଚାର୍ଜ କରିବାକୁ ପଡିଥାଏ ସେହିଭଳି, ଏହି ଶରୀରକୁ ମଧ୍ୟ ରିଚାର୍ଜ କରାଯିବା ଉଚିତ୍ । ଏହା ହେଉଛି ଶରୀରର ଆବଶ୍ୟକତା । ସେ ପିଲାମାନଙ୍କୁ କହିଥିଲେ ଯେ ଯଦି ସେମାନଙ୍କୁ ପାଠ ପଢିବାକୁ ପଡ଼େ ତା ନୁହେଁ ଯେ ତୁମେ ଦିନସାରା ଖାଲି ପାଠ ପଢିବ । ଏମିତି ହେବା ଠିକ ନୁହେଁ । ଯଦି ତୁମକୁ ଖେଳିବାର ଅଛି ତା ଅର୍ଥ ନୁହେଁ ଯେ ତୁମେ ଦିନସାରା ଖେଳିବ । ଏହାମଧ୍ୟ ଠିକ ନୁହେଁ ଜୀବନରେ ସନ୍ତୁଳନ ରଖିବା ଜରୁରୀ, ତେଣୁ ଏକ ସୁସ୍ଥ ଶରୀର ଏବଂ ସୁସ୍ଥ ମନ ରହିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ବେଳେବେଳେ ବାହାରେ ବସି ସୂର୍ଯ୍ୟ କିରଣରେ ମଧ୍ୟ ପଢନ୍ତୁ । ସୂର୍ଯ୍ୟକିରଣ ମଧ୍ୟ ଆମକୁ ରିଚାର୍ଜ କରିଥାଏ ।