ନୀତି ଆୟୋଗ ବୈଠକରେ ଜାଣନ୍ତୁ କଣ ରହିଛି ଓଡ଼ିଶା ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଦାବି

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଆଜି ନୂଆଦିଲ୍ଲୀରେ ନୀତି ଆୟୋଗର ନବମ ଗଭର୍ଣ୍ଣି କାଉନସିଲ ବୈଠକ ଆରମ୍ଭ ହୋଇଛି। ଗୁରୁତ୍ବପୂର୍ଣ୍ଣ ବୈଠକରେ ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀ ମାନେ ସାମିଲ ହୋଇଛନ୍ତି। ଆଜିର ବୈଠକରେ ବିକଶିତ ଭାରତ ୨୦୪୭ ଉପରେ ଥିବା ଦୃଷ୍ଟିକୋଣ ବା ଫୋକସ୍ ଉପରେ ଚର୍ଚ୍ଚା କରାଯାଇଛି। ୨୦୪୭ ବିକଶିତ ଭାରତ ଲକ୍ଷ୍ୟ ହାସଲରେ ରାଜ୍ୟ ଗୁଡିକର ଭୂମିକା ଉପରେ ମଧ୍ୟ ଚର୍ଚ୍ଚା ହେଇଥିବା ବେଳେ ଓଡ଼ିଶା ରାଜ୍ୟର ବିକାଶ ପାଇ ବିଭିନ୍ନ ଦାବି ଓ ସମସ୍ୟା ସମ୍ପର୍କରେ ଦୃଷ୍ଟି ଆକର୍ଷଣ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝି ।

ମୁଖ୍ୟମନ୍ତ୍ରୀ କରିଥିବା ଦାବି ଗୁଡ଼ିକ ହେଲା

ମୁଖ୍ୟମନ୍ତ୍ରୀ କହିଛନ୍ତି ୪୮୦ କିଲୋମିଟରର ଓଡିଶାର ଲମ୍ବା ଉପକୂଳବର୍ତ୍ତୀ ଅଞ୍ଚଳକୁ ଉପଯୋଗ କରିବାକୁ, ଆମେ ବନ୍ଦର ନେତୃତ୍ୱର ବିକାଶର ମଡେଲ୍ ଗ୍ରହଣ କରିବୁ, ଯାହା ଆମକୁ ପୂର୍ବ ଏବଂ ଦକ୍ଷିଣ ପୂର୍ବ ଏସିଆର ପ୍ରବେଶ ଦ୍ୱାର ଏବଂ ପଡୋଶୀ ଦେଶ ଅବରୋଧିତ ରାଜ୍ୟଗୁଡିକ ପାଇଁ ଏକ ବନ୍ଦର ଭାବରେ ସ୍ଥାନିତ କରିବ । ତେଣୁ ଧାମରା ଏବଂ ଗୋପାଳପୁରର ବିଦ୍ୟମାନ ବନ୍ଦରଗୁଡିକୁ ଘେରି ରହିଥିବା ଅଞ୍ଚଳରେ ବୃହତ ଆକାରର ବନ୍ଦର ଭିତ୍ତିକ ଶିଳ୍ପାଞ୍ଚଳ ପ୍ରତିଷ୍ଠା ପାଇଁ ସହାୟତା ଆବଶ୍ୟକ । ଅସ୍ତରଙ୍ଗ, ପାଲୁର, ବାହୁଡ଼ା ଓ ସୁବର୍ଣ୍ଣରେଖାର ଲବଣାଂଶ ଠାରେ ଗ୍ରୀନ୍ ଫିଲ୍ଡ ବନ୍ଦରଗୁଡିକର ବିକାଶ କରିବା । ଏହି ପରିପ୍ରେକ୍ଷୀରେ, ଗଞ୍ଜାମ ଜିଲ୍ଲାର କେନ୍ଦ୍ର ସରକାରଙ୍କ ଅଧୀନରେ ଥିବା ପ୍ରାୟ ୪୩୦୦ ଏକରର ଲବଣାଂଶ ଜମି ରାଜ୍ୟ ଅଧିନକୁ ଦେବାକୁ ଦାବି କରିଛନ୍ତି ।

ଯେହେତୁ ଆମର ଭିତ୍ତିଭୂମି ନିର୍ମାଣ ପାଇଁ କାର୍ଯ୍ୟ କରୁଛୁ ଯେପରିକି ଇଣ୍ଡଷ୍ଟ୍ରିଆଲ୍ ପାର୍କ ଏବଂ କରିଡର, ବିଦ୍ୟୁତ୍ ଗ୍ରୀଡ୍, ରେଳ ଭିତ୍ତିଭୂମି ଏବଂ ବର୍ଦ୍ଧିତ ବାୟୁ ସଂଯୋଗ, ବିଭିନ୍ନ ଭିତ୍ତିଭୂମି ପ୍ରକଳ୍ପ ପାଇଁ କେନ୍ଦ୍ର ସରକାରଙ୍କ ତରଫରୁ ବଜେଟ୍ ଆବଣ୍ଟନ ଏବଂ ଶୀଘ୍ର କ୍ଲିୟରାନ୍ସ ଅତ୍ୟନ୍ତ ସହାୟକ ହେବ ବୋଲି ମୁଖ୍ୟମନ୍ତ୍ରୀ କହିଛନ୍ତି |

ମୁଖ୍ୟମନ୍ତ୍ରୀ ମୋହନ ମାଝୀ ଓଡିଶାରେ ପର୍ଯ୍ୟଟନର ବିକାଶ ପାଇଁ ସ୍ୱତନ୍ତ୍ର ଅନୁଦାନ ସହ ପିଏମ୍‌ଶ୍ରୀ ଅଧିନରେ ଓଡ଼ିଶାର ୮୦୦ ସ୍କୁଲର ବିକାଶ କରାଇବା ପାଇଁ ଦାବି କରିଛନ୍ତି । ବିପର୍ଯ୍ୟୟ ପରିଚାଳନା ଓ ଭିତ୍ତିଭୂମି ପାଇଁ ଆର୍ଥିକ ପାଣ୍ଠି ସହ ଟେଲିକମ, ଶକ୍ତି ଭିତ୍ତିଭୂମି ପାଇଁ ସହାୟତା ଦାବି ସହ ବ୍ୟାଙ୍କ ନଥିବା ଗ୍ରାମପଞ୍ଚାୟତରେ ଆର୍ଥିକ କାରବାରର ସୁବିଧା ରହୁ ବୋଲି ଦାବି କରିଛନ୍ତି ।

ଏହାସହିତ ପିଏମ ଜନଜାତି ଯୋଜନାରେ ଓଡ଼ିଶାର ଆଦିବାସୀଙ୍କ ବିକାଶ ସମେତ ଏଥିରେ ଶିକ୍ଷା, ସ୍ୱାସ୍ଥ୍ୟ ଓ ଜୀବିକାର ସୁଯୋଗ ସୃଷ୍ଟି କରିବା ପାଇଁ ଦାବି କରିଛନ୍ତି । ୨୦୩୬ ସୁଦ୍ଧା ବିକଶିତ ଓଡ଼ିଶା ଗଠନ ଲକ୍ଷ୍ୟ । ହାଇଡ୍ରୋ ଷ୍ଟୋରେଜ ଓ ସୋଲାର ପ୍ରୋଜେକ୍ଟ ସହ ସବୁଜ ଶକ୍ତି କ୍ଷେତ୍ରରେ କରିଡର ଦାବି କରାଯାଇଛି ।

ସେହିପରି ଓଡ଼ିଶା ଖଣିଜ ସମ୍ପଦରେ ଭରପୂର ହେତୁ ପୁଞ୍ଜିନିବେଶ କରିବା ପାଇଁ ରାଜ୍ୟରେ ରେଳ ସଂଯୋଗ ବଢ଼ାଇବା ସହ କାର୍ବନ ନିର୍ଗମନ କିପରି କମ୍ କରାଯାଇପାରିବ, ସେଥିପାଇଁ ସହାୟତା ଲୋଡ଼ିଛନ୍ତି ରାଜ୍ୟ ସରକାର।