ବିଶ୍ୱ କୁସ୍ତି ଚାମ୍ପିୟନଶିପ୍ରେ ଭାରତୀୟ ମହିଳା କୁସ୍ତିଯୋଦ୍ଧା କାଜଲ ଧୋଚକ ଓ ନୀଲମ ସିରୋହି ୨ଟି ରୌପ୍ୟ ପଦକ ଜିତିଛନ୍ତି । ନିଜ ନିଜ ବର୍ଗର ଫାଇନାଲରେ ପରାଜିତ ହେବା ପରେ ଉଭୟ ରୌପ୍ୟ ପଦକ ସହ ଅଭିଯାନ ଶେଷ କରିଛନ୍ତି । ଭାରତୀୟ କୁସ୍ତି ମହାସଂଘ (WFI) ପକ୍ଷରୁ ଜାରି ପ୍ରେସ୍ ବିବୃତିରେ ଏହି ସୂଚନା ଦିଆଯାଇଛି । ୭୬ କିଲୋଗ୍ରାମ ବର୍ଗର ଫାଇନାଲରେ ୧୮ ବର୍ଷୀୟା କାଜଲ ଧୋଚକ ୟୁକ୍ରେନର ଅନାସ୍ତାସିଆ ଆଲପିଏଭାଙ୍କ ସହ ମୁକାବିଲା କରିଥିଲେ । ଦୁଇଥର U-20 ବିଶ୍ୱ ଚାମ୍ପିୟନ ହୋଇଥିବା କାଜଲ ନିଜର ପ୍ରଥମ ସିନିୟର ବିଶ୍ୱ ଚାମ୍ପିୟନଶିପ୍ରେ ଫାଇନାଲକୁ ଆସିଥିଲେ । ତେବେ ଏକ ରୋମାଞ୍ଚକ ମୁକାବିଲାରେ ସେ ୬-୮ରେ ପରାସ୍ତ ହୋଇ ରୌପ୍ୟ ପଦକ ପାଇଥିଲେ । ସେହିପରି ୫୦ କିଲୋଗ୍ରାମ ବର୍ଗର ଫାଇନାଲରେ ୨୬ ବର୍ଷୀୟା ନୀଲମ ସିରୋହି ଜାପାନର ଚାରିଥର ବିଶ୍ୱ ଚାମ୍ପିୟନ ୟୁଇ ସୁସାକିଙ୍କୁ ଭେଟିଥିଲେ । ଏହି ମୁକାବିଲାରେ ୦-୫ରେ ପଛରେ ଥିବାବେଳେ ନୀଲମ ପରାଜିତ ହୋଇଥିଲେ । ଏହି ଦୁଇଟି ପଦକ ଭାରତୀୟ କୁସ୍ତି ପାଇଁ ଏକ ନୂଆ ଉପଲବ୍ଧି । ବିଶ୍ୱ ଚାମ୍ପିୟନଶିପ୍ର ଗୋଟିଏ ସଂସ୍କରଣରେ ପ୍ରଥମ ଥର ପାଇଁ ଦୁଇଜଣ ଭାରତୀୟ ମହିଳା କୁସ୍ତିଯୋଦ୍ଧା ଫାଇନାଲରେ ପହଞ୍ଚିଛନ୍ତି । ଏହା ପୂର୍ବରୁ ୨୦୨୧ରେ ଅଂଶୁ ମଲିକ ବିଶ୍ୱ ଚାମ୍ପିୟନଶିପ୍ ଫାଇନାଲରେ ପହଞ୍ଚିବାରେ ପ୍ରଥମ ଭାରତୀୟ ମହିଳା ହୋଇଥିଲେ । ଗୁରୁବାର ମହିଳା କୁସ୍ତିର ଶେଷ ଦିନରେ ୫୫ କିଲୋଗ୍ରାମ ଓ ୫୯ କିଲୋଗ୍ରାମ ବର୍ଗର ମ୍ୟାଚ୍ ଅନୁଷ୍ଠିତ ହେବ । Post navigation Modi Targets Congress Over MLC Poll Results: ଏମଏଲସି ନିର୍ବାଚନ ଫଳାଫଳକୁ ନେଇ କଂଗ୍ରେସକୁ ମୋଦିଙ୍କ ଟାର୍ଗେଟ୍ SGFI Rugby Championship: SGFI ରଗବୀ ପ୍ରତିଯୋଗିତା: ୧୭ ବର୍ଷରୁ କମ୍ ବାଳିକା ଦଳ ଚମ୍ପିୟାନ ଓ ବାଳକ ବିଭାଗ ରନର୍ସ-ଅପ୍
