ଢେଙ୍କାନାଳରେ ଲଜ୍ଜା; ଅସହାୟ ଯୁବତୀଙ୍କୁ ଗଣଦୁଷ୍କର୍ମ

ଢେଙ୍କାନାଳ ସଦର ଥାନା ଭାପୁର ଫାଣ୍ଡି ଅଞ୍ଚଳରୁ ଏକ ଲୋମହର୍ଷଣକାରୀ ଘଟଣା ସାମ୍ନାକୁ ଆସିଛି। ରାତି ୧୦ଟା ବାଜିଲେ ଯୁବତୀଙ୍କ ପାଇଁ କାଳ ରାତି ଆରମ୍ଭ ହୋଇ ଯାଉଥିଲା। ପାଶବିକ ପ୍ରବୃତ୍ତିର ୬ ଜଣ ଯୁବକ ଆସି ୨୨ ବର୍ଷୀୟ ଯୁବତୀଙ୍କୁ ଘରର ଛାତ ଉପରକୁ ନେଇ ରାତି ୨ଟା ଯାଏ ଜଣଙ୍କ ପରେ ଜଣେ ବଳାତ୍କାର କରୁଥିଲେ। ଯୁବତୀ ଅନ୍ତଃସତ୍ତ୍ଵା ହେବା ପରେ ବି ବଳାହାର କରିଚାଲିଥିଲେ । ଯୁବତୀ ଜଣଙ୍କ ଏବେ ୭ ମାସର ଗର୍ଭବତୀ । ଏ ବିଷୟରେ ଖବର ମିଳିବା ପରେ ତାଙ୍କୁ ଉଦ୍ଧାର କରାଯାଇ ସଖା କେନ୍ଦ୍ରରେ ୨ଦିନ ହେଲା ରଖାଯାଇ କାଉନସେଲିଂ କରାଯାଉଛି। ଏହି ଘଟଣାରେ ୩ ଜଣଙ୍କୁ ଅଟକ ରଖି ସଦର ଥାନା ପୋଲିସ ପଚରାଉଚରା କରୁଛି। ଏସପିଙ୍କ ତତ୍ତ୍ୱାବଧାନରେ ଜଣେ ଡିଏସପି ଘଟଣାର ତଦନ୍ତ କରୁଛନ୍ତି।

ଯୁବତୀଙ୍କ ବାପା ଘରଜ୍ବାଇଁ ହୋଇ ଶ୍ୱଶୁର ଘରେ ରହୁଥିଲେ। ମା’ଙ୍କ ମୃତ୍ୟୁ ହୋଇଥିବା ବେଳେ ସମ୍ପର୍କୀୟମାନେ ଜମି ଛଡ଼ାଇନେଲେ । ତାଙ୍କ ବାପା ବିଭିନ୍ନ ଚାପରେ ପଡି ମାନସିକ ବିକାରଗ୍ରସ୍ତ ହେବା ପରେ କିଛିବର୍ଷ ହେଲା ବାପ-ଝିଅ ଅଙ୍ଗନବାଡ଼ି କେନ୍ଦ୍ରରେ ରହୁଥିଲେ। ଘର କବାଟ ଭିତରୁ ବନ୍ଦ ହେଉନଥିବାରୁ ରାତି ହେଲେ ଗାଁ’ର ଯୁବକମାନେ ଆସି ବଳାତ୍କାର କରୁଥିଲେ।

ଘଟଣା ସମ୍ପର୍କରେ ଗାଁ ଲୋକ କିଛି କିଛି ଜାଣିଥିଲେ ବି ଯୁବତୀଙ୍କୁ ପାଗଳ ବୋଲି କହି ଏଡାଇ ଯାଉଥିବା ଯୁବତୀ ଅଭିଯୋଗ କରିଛନ୍ତି । ଏପରିକି ବଳାତ୍କାର କରୁଥିବା ଯୁବକଙ୍କ ଘରକୁ ଯାଇ ଅଭିଯୋଗ କଲେ ବି କିଛି ଲାଭ ହେଉନଥିଲା । କୌଣସି ସୂତ୍ରରୁ ଖବର ପାଇ ଢେଙ୍କାନାଳ ସଖୀ କେନ୍ଦ୍ର ପକ୍ଷରୁ ଯୁବତୀଙ୍କୁ ଉଦ୍ଧାର କରାଯାଇଛି। ତାଙ୍କର ଡାକ୍ତରୀ ପରୀକ୍ଷା ପରେ ଗର୍ଭବତୀ ଥିବା ଜଣାପଡିଥିଲା।