ଶଙ୍ଖ ଭବନରେ ବିଜେଡି ନେତ୍ରୀଙ୍କ ହାତାହାତି; ମୁଖପାତ୍ର ଇପ୍‌ସିତା ସାହୁଙ୍କୁ ମାଡ଼

ବିଜେଡିର ପ୍ରତିଷ୍ଠା ଦିବସ ଅବସରରେ ଶଙ୍ଖ ଭବନରେ ବିଜେଡି ନେତ୍ରୀଙ୍କ ମଧ୍ୟରେ ହାତାହାତି ହୋଇଥିବା ଖବର ସାମ୍ନାକୁ ଆସିଛି । ବିଜେଡି ଯୁବନେତ୍ରୀ ତଥା ମୁଖପାତ୍ର ଇପ୍‌ସିତା ସାହୁଙ୍କୁ ଅନ୍ୟ ମହିଳା କର୍ମୀ ସର୍ବସମ୍ମୁଖରେ ଚାପୁଡ଼ା ମାରିଛନ୍ତି । କିନ୍ତୁ ପ୍ରଥମେ ଇପ୍‌ସିତା ହିଁ ମାଡ଼ ମାରିଥିଲେ ବୋଲି ଜଣାପଡ଼ିଛି ।

ପଛରେ ବସିଥିବା କିଛି ମହିଳା ନେତ୍ରୀଙ୍କ ସମ୍ମୁଖରେ ଇପ୍‌ସିତା କିଛି ଚେୟାର ପକାଇଥିଲେ । ଏହି ଘଟଣାକୁ ନେଇ ବିଜୁ ମହିଳା ଜନତା ଦଳର ଅନୁଗୁଳ ଜିଲ୍ଲା ପ୍ରଭାରୀ ପୁଷ୍ପାଞ୍ଜଳି ରଣା ଓ ବିଜେଡି ସାଧାରଣ ସମ୍ପାଦିକା ସୁମିତ୍ରା ଜେନା ଓ ବିଜେଡି ମୁଖପାତ୍ର ଇପ୍‌ସିତା ସାହୁଙ୍କ ମଧ୍ୟରେ ବଚସା ଓ ମାରପିଟ ହୋଇଥିଲା ।

ବିଜେଡି ସଭାପତି ନବୀନ ପଟ୍ଟନାୟକ ସଭାସ୍ଥଳ ଛାଡ଼ି ଚାଲିଯିବା ପରେ ଏହି ଘଟଣା ଘଟିଥିଲା ।

ତେବେ ବିଜୁ ଜନତା ଦଳ ପକ୍ଷରୁ ଏ ସମ୍ବନ୍ଧରେ କିଛି ପ୍ରତିକ୍ରିୟା ଆସିନାହିଁ । କେଉଁ କାରଣରୁ ଏହା ଘଟିଛି ଏପର୍ଯ୍ୟନ୍ତ ସମ୍ପୁର୍ଣ୍ଣ ସୂଚନା ମିଳିପାରିନାହିଁ ।