ପୂର୍ବତନ ଭାରତୀୟ ସ୍ପିନର ରମେଶ ପାୱାରଙ୍କୁ ବିସିସିଆଇର ବରିଷ୍ଠ ପୁରୁଷ କ୍ରିକେଟ୍ ଚୟନ କମିଟିରେ ନିଯୁକ୍ତ କରାଯାଇଛି । ଅଶୋକ ମାଲହୋତ୍ରା ଓ ଜତିନ ପରାଞ୍ଜପେଙ୍କୁ ନେଇ ଗଠିତ କ୍ରିକେଟ୍ ପରାମର୍ଶଦାତା କମିଟି (CAC) ସର୍ବସମ୍ମତିକ୍ରମେ ତାଙ୍କ ନାମ ସୁପାରିସ କରିଥିଲା । ଗତ ସପ୍ତାହରେ ବିସିସିଆଇ ମୁଖ୍ୟାଳୟରେ ପ୍ରାର୍ଥୀମାନଙ୍କ ସାକ୍ଷାତକାର ହୋଇଥିଲା । ୪୮ ବର୍ଷୀୟ ରମେଶ ପାୱାର ୨୦୦୪ରୁ ୨୦୦୭ ମଧ୍ୟରେ ଭାରତ ପାଇଁ ୨ଟି ଟେଷ୍ଟ ଓ ୩୧ଟି ଦିନିକିଆ ମ୍ୟାଚ୍ ଖେଳିଥିଲେ । ଏହି ପଦ ପାଇଁ ୱାସିମ ଜାଫର, ସଲିଲ ଅଙ୍କୋଲା, ଜାକବ ମାର୍ଟିନ ଓ କନର ୱିଲିୟମ୍ସଙ୍କ ଭଳି ପୂର୍ବତନ ଖେଳାଳି ମଧ୍ୟ ଦୌଡ଼ରେ ଥିଲେ । ରମେଶ ପାୱାର କୋଚ୍ ଭାବେ ମଧ୍ୟ ସଫଳତା ପାଇଛନ୍ତି । ସେ ଦୁଇଥର ଭାରତୀୟ ମହିଳା କ୍ରିକେଟ୍ ଦଳର ମୁଖ୍ୟ କୋଚ୍ ଦାୟିତ୍ୱ ତୁଲାଇଥିଲେ । ତାଙ୍କ କୋଚିଂ ସମୟରେ ଭାରତ ଏସିଆ କପ୍ ଜିତିବା ସହ ୨୦୨୨ କମନୱେଲଥ ଗେମ୍ସରେ ରୌପ୍ୟ ପଦକ ହାସଲ କରିଥିଲା । ପରେ ତାଙ୍କୁ ବେଙ୍ଗାଲୁରୁସ୍ଥିତ ଜାତୀୟ କ୍ରିକେଟ୍ ଏକାଡେମୀ (ବର୍ତ୍ତମାନ ବିସିସିଆଇ ସେଣ୍ଟର ଅଫ୍ ଏକ୍ସିଲେନ୍ସ)କୁ ବଦଳି କରାଯାଇଥିଲା । ସେଠାରେ ସେ ସ୍ପିନ୍ ବୋଲିଂ କୋଚ୍ ଭାବେ କାମ କରିଥିଲେ । ଘରୋଇ କ୍ରିକେଟ୍ରେ ତାଙ୍କ କୋଚିଂରେ ମୁମ୍ବାଇ ବିଜୟ ହଜାରେ ଟ୍ରଫି ଜିତିଥିଲା । ଗତ ଦୁଇଟି ସିଜିନ୍ରେ ସେ ଗୁଜରାଟର ବରିଷ୍ଠ ପୁରୁଷ ଦଳର କୋଚ୍ ଥିଲେ । ଏହା ସହ ସଦ୍ୟ ସମାପ୍ତ ଦିନିକିଆ ସିରିଜ୍ରେ ସେ ଭାରତ ବିପକ୍ଷ ଅଷ୍ଟ୍ରେଲିଆର ୧୯ ବର୍ଷରୁ କମ୍ ଦଳର ପରାମର୍ଶଦାତା କୋଚ୍ ଭାବେ ମଧ୍ୟ କାମ କରିଥିଲେ । Post navigation Delhi Court Extends Judicial Custody of 2 CJP Leaders: CJP ନେତା ସୌରଭ ଦାସ ଓ ଆଶୁତୋଷ ରାଙ୍କାଙ୍କ ଜେଲ୍ ମିଆଦ ୨ ଦିନ ବୃଦ୍ଧି
