ଆହତ ପୋଲିସ କର୍ମଚାରୀଙ୍କୁ ଭେଟିଲେ ମନମୋହନ ସାମଲ

ରାଜନୀତିରେ ହିଂସାର ସ୍ଥାନ ନାହିଁ । ଅପରାଧୀମାନଙ୍କୁ ପ୍ରଥମେ ରାଜନୀତିରେ ସ୍ଥାନ ଦେଇଥିଲା କଂଗ୍ରେସ ଦଳ । ବାସ୍ତବରେ ରାଜନୀତିରେ ଅପରାଧିକରଣର ସ୍ରଷ୍ଟା ହେଉଛି କଂଗ୍ରେସ ଦଳ । ବିଧାନସଭା ଘେରାଓ ନାଁରେ ଯୋଜନାବଦ୍ଧ ଭାବେ ଗୁଣ୍ଡାଗର୍ଦ୍ଦି ଜରିଆରେ ଆତଙ୍କ ସୃଷ୍ଟି କରି କଂଗ୍ରେସ ଦଳ ଆଜି ଯେଉଁ ଆଇନଶୃଙ୍ଖଳା ପରିସ୍ଥିତି ଉପୁଜାଇଛି, ତାହା ଅତ୍ୟନ୍ତ ଲଜ୍ଜାଜନକ ଏବଂ ଭାରତୀୟ ଜନତା ପାର୍ଟୀ ଏହାକୁ ଘୋର ନିନ୍ଦା କରୁଛି ବୋଲି ରାଜ୍ୟ ସଭାପତି ମନମୋହନ ସାମଲ କହିଛନ୍ତି ।

କଂଗ୍ରେସର ବିଧାନସଭା ଘେରାଓ ସମୟରେ ତୁମୁଳ ହିଂସାକାଣ୍ଡକୁ ନେଇ ଦୃଢ ନିନ୍ଦା କରିଛନ୍ତି ରାଜ୍ୟ ସଭାପତି ସାମଲ । ଓଡିଶାବାସୀଙ୍କ ଦ୍ୱାରା ପ୍ରତ୍ୟାଖାନ ହେବା ପରେ କଂଗ୍ରେସ ଦଳ ହତାଶ ଓ ନିରାଶ ହୋଇପଡିଛି । ନିଜ ମୂଳ ବିଚାରଧାରାରୁ ଓହରି ଯାଇ ଅଶାନ୍ତି, ହିଂସା ଓ ବିଶୃଙ୍ଖଳାକୁ ଆପଣାଇ ଶସ୍ତା ରାଜନୀତି କରୁଛି କଂଗ୍ରେସ ଦଳ । ଆଜି ବିକ୍ଷୋଭ ସମୟରେ କଂଗ୍ରେସ କର୍ମୀଙ୍କ ଢେଲା ମାଡ ଓ ଚେୟାର ମାଡରେ ଅନେକ ସଂଖ୍ୟାରେ ପୋଲିସ କର୍ମଚାରୀ ଓ ସାମ୍ବାଦିକ ଗୁରୁତର ଭାବେ ଆହତ ହୋଇ ଡାକ୍ତରଖାନାରେ ଚିକିତ୍ସିତ ହେଉଛନ୍ତି । ବିଶେଷ ଭାବେ କାର୍ଯ୍ୟରତ ସାମ୍ବାଦିକ ଶ୍ରୀ ପ୍ରଭାତ ବିଷୋୟୀ ଏବଂ ପୋଲିସ କର୍ମଚାରୀଙ୍କ ଉପରେ ମରଣାନ୍ତକ ଆକ୍ରମଣକୁ ଅତ୍ୟନ୍ତ ଘୃଣ୍ୟ କାର୍ଯ୍ୟ ବୋଲି ସାମଲ କହିଛନ୍ତି ।

ସାମଲ ଡାକ୍ତରଖାନାକୁ ଯାଇ ଚିକିତ୍ସିତ ହେଉଥିବା ସାମ୍ବାଦିକ ଓ ପୋଲିସ କର୍ମଚାରୀଙ୍କୁ ଭେଟି ତାଙ୍କ ସ୍ୱାସ୍ଥ୍ୟବସ୍ଥା ପଚାରି ବୁଝିବା ସହିତ ଡାକ୍ତରଖାନା କର୍ତୃପକ୍ଷଙ୍କ ସହିତ ସେମାନଙ୍କ ଚିକିତ୍ସା ସମ୍ବନ୍ଧରେ ବିସ୍ତୃତ ଆଲୋଚନା କରିଥିଲେ । ଏଥି ସହ ସମସ୍ତ ଚିକିତ୍ସିତଙ୍କ ଆଶୁ ଆରୋଗ୍ୟ କାମନା କରିଛନ୍ତି ।