ଆଉ କେତେ ଦିନ ଲାଗିବ ସଭାପତି ଖୋଜା ?

ଜାନୁଆରୀ ସରିଥିଲା। ମାର୍ଚ୍ଚ ବି ସରିଲା । କିନ୍ତୁ ଭାରତୀୟ ଜନତା ପାର୍ଟିର ରାଜ୍ୟ ସଭାପତି ଖୋଜା ସରିଲା ନାହିଁ । କାହାକୁ ବିଶ୍ବାସ କରିବା ? ପ୍ରଭାରୀ ବିଜୟପାଲ ସିଂ ତୋମର ଜାନୁଆରୀ ଶେଷ ସୁଦ୍ଧା ରାଜ୍ୟ ଭାଜପାକୁ ନୂଆ ସଭାପତି ମିଳିବ ବୋଲି କହିଥିଲେ। ଏକଥା ଡିସେମ୍ବରରେ କହିଥିଲେ ତୋମର । ଫେବୃଆରୀରେ ରିଟର୍ଡିଂ ଅଫିସର ଦୁଇଦିନ ଭିତରେ ସଭାପତି ମନୋନୟନ ହେବ ବୋଲି କହିଥିଲେ । ମାର୍ଚ୍ଚ ଗଲା । କିନ୍ତୁ ଅସୁବିଧା କେଉଁଠି ?

ଓଡ଼ିଶାରେ ମନମୋହନ ସାମଲ ସଭାପତି ଅଛନ୍ତି । କିନ୍ତୁ ତାଙ୍କ କାର୍ଯ୍ୟକାଳ ପୂରିଗଲାଣି। ହେଲେ ତାଙ୍କ ଉତ୍ତରାଧିକାରୀ ସେ ନା ଆଉ କେହି ହେବେ, ସେହି ଅଡ଼ୁଆ ତୁଟୁ ନାହିଁ । ଏହା ଭିତରେ ଅନେକ ଥର ଭାଜପାର ଶୀର୍ଷ ନେତାମାନଙ୍କର ବୈଠକ ବସିଥିଲେ ହେଁ ଯେଉଁ ଅଡୁଆକୁ ସେଇ ଅଡ଼ୁଆ। ସଂଘ ଓ ଭାଜପା ଭିତରେ ବୋଧହୁଏ କୌଣସି ବୁଝାମଣା ହୋଇପାରୁ ନାହିଁ। ଏହାର ଅର୍ଥ ହେଲା ଶାସକ ଦଳ ଗୋଷ୍ଠୀ ବିବାଦରେ ସଂକ୍ରମିତ ହୋଇଛି। ପୂର୍ବରୁ କେବେ ସଭାପତି ନିର୍ବାଚନକୁ ନେଇ ଏତେ ଟଣାଟଣି ଓ ବିଳମ୍ବ ହୋଇ ନଥିଲା।

ଏପ୍ରିଲ ୬ ତାରିଖ ଭାଜପାର ପ୍ରତିଷ୍ଠା ଦିବସ। ସେହିଦିନ ରାମନବମୀ। ଆଶା କରାଯାଉଛି, ଏହା ପରେପରେ ଉଭୟ ରାଷ୍ଟ୍ରୀୟ ଓ ରାଜ୍ୟ ଭାଜପା ମୁଖ୍ୟଙ୍କ ନାମ ଘୋଷଣା କରାଯିବ । ୧୨ ତାରିଖରେ ଜେପି ନଜ୍ଜା ଓଡ଼ିଶା ଆସୁଛନ୍ତି । ଆୟୁଷ୍ମାନ ଭାରତ ଯୋଜନା ବାବଦରେ ସେ କିଛି ମହତ୍ତ୍ୱପୂର୍ଣ୍ଣ ଘୋଷଣ କରିପାରନ୍ତି।