ବିଦେଶରେ ଗଲା ସ୍ୱାମୀଙ୍କ ଜୀବନ, ଗର୍ଭବତୀ ସ୍ତ୍ରୀଙ୍କ ଆଖିରୁ ଶୁଖୁନି ଲୁହ

ପାଦ ତଳୁ ମାଟି ଧସିଯାଇଛି…ମୁଣ୍ଡ ଉପରକୁ ଛିଡ଼ିପଡ଼ିଛି ଆକାଶ… ଜୀବିକା ପାଇଁ ବିଦେଶ ଯାଇ ଭେଣ୍ଡିଆ ପୁଅ ଯେତେବେଳେ ଜୀବନ ହରାଇଛି, ଆଉ ବା ଏହି ପରିବାର ପାଖରେ କ’ଣ ଅଛି । ଲୁହ ଆଉ ଶୋକ ଭିତରେ ଜଡ଼ସଡ଼ ପତ୍ନୀ ସହ ବୃଦ୍ଧ ବାପା-ମା’ । କୋହ ଆଉ ଲୁହରେ ବତୁରି ଯାଇଛି ଗଞ୍ଜାମ ଜିଲ୍ଲା ପୁରୁଷୋତ୍ତମପୁର ବ୍ଲକ ରଣଝାଲି ଗାଁ ।

ସର୍ବଗ୍ରାସୀ ନିଆଁ କେଉଁଠି ଥିଲା କେଜାଣି, କୁଏତରେ ରୋଜଗାରିଆ ଭେଣ୍ଡିଆ ପୁଅ ସନ୍ତୋଷ ଗୌଡ଼ଙ୍କ ଜୀବନ ନେଇଗଲା ଅଦିନରେ । ବୟସ କହିଲେ ମାତ୍ର ୩୮ ବର୍ଷ । ଆଜିକୁ ୨ ବର୍ଷ ହେଲା, କୁଏତର ମଙ୍ଗାଫ ସହରର ଏକ ସପିଂ ମଲରେ କାମ କରୁଥିଲେ । ଆଉ ସେହି ରୋଜଗାର ଟଙ୍କାରେ ଗତ ମାର୍ଚ୍ଚରେ ବାପାଙ୍କ ହାର୍ଟ ଅପରେସନ୍ କରିବା ସହ ପୁଣି ବାହୁଡ଼ି ଯାଇଥିଲେ କୁଏତକୁ ।

କିନ୍ତୁ ବୁଧବାରର କାଳରାତିରେ ଘଟିଥିବା ଅଗ୍ନିକାଣ୍ଡରେ ଜଳିପୋଡ଼ି ପ୍ରାଣ ହରାଇଲେ ସନ୍ତୋଷ । ଅନ୍ୟ ଏକ ଘଟଣାକ୍ରମରେ ପତି-ପତ୍ନୀଙ୍କର ସୁଖର ସଂସାର ଚାଲିଥିଲା । କେତେ ଫଟୋ ଉଠାଉଥିଲେ, ଖୁସି ମନଉଥିଲେ । ଜୀବନରେ ଆଉ କେବେ ଫଟୋ ଉଠାଇ ପାରିବେନି ଏହି ଦମ୍ପତ୍ତି । କାରଣ ଜୀବିକା ପାଇଁ ଦରିଆପାରିକୁ ଯାଇ ଆରପାରିକୁ ଚାଲିଯାଇଛନ୍ତି ସ୍ୱାମୀ ।

୭ ମାସର ଗର୍ଭବତୀ ଥିବା ପତ୍ନୀକୁ ନିସଙ୍ଗ କରି ବାହୁଡ଼ି ଯାଇଛନ୍ତି ଅଫେରା ବାଟ ଦେଇ । ଏ ହେଲେ କଟକ ତିଗିରିଆ ଥାନା କରଡ଼ାପଲ୍ଲୀର ୩୩ ବର୍ଷିୟ ମହମ୍ମଦ ଜହୁର । କୁଏତ ମଙ୍ଗଫ୍ ସହରର ଏକ ଘରୋଇ କମ୍ପାନୀରେ କାମ କରୁଥିଲେ ସିବିଲ୍ ଲାବୋରାଟୋରୀ ଟେକ୍ନିସିଆନ ଭାବେ ।

ବୁଧବାର ଭୋର ସମୟର କଥା । ମସଜିଦରେ ନମାଜ ପାଠପରେ ସେହି ଅଭିଶପ୍ତ କୋଠାର ୫ ମହଲାରେ ଥିବା ନିଜ ରୁମକୁ ଫେରୁଥିଲେ । ଠିକ୍ ସେହି ସମୟରେ ଲାଗି ଯାଇଥିଲା ନିଆଁ । ଏହାଦେଖି ରୁମରେ ଶୋଇଥିବା ଅନ୍ୟ ସାଥୀଙ୍କୁ ଜହୁର ନିଦରୁ ଉଠାଇବାକୁ ଚେଷ୍ଟା କରିଥିଲେ ।