ବ୍ରହ୍ମପୁରରେ ବେଆଇନ ହୁକ୍କା ବାର୍ ଉପରେ ରେଡ୍

ବ୍ରହ୍ମପୁର ସହରରେ ବେଆଇନ ହୁକ୍କା ବାର୍ ଚଳାଉଥିବା ୮ଟି ହୋଟେଲ ଓ ରେଷ୍ଟୁରାଣ୍ଟରେ ଚଢାଉ କରିଛି ପୋଲିସ । ବେଆଇନ ହୁକ୍କା ବାର୍ ଉପରେ ଏକାଧିକ ଚଢାଉ କରି ହୁକା ପାତ୍ର, ତମାଖୁ ଉତ୍ପାଦ ଏବଂ ଅନ୍ୟାନ୍ୟ ଧୂମପାନ ସାମଗ୍ରୀ ଜବତ କରିଛି ବ୍ରହ୍ମପୁର ପୋଲିସ। ରେଷ୍ଟୁରାଣ୍ଟ ମାଲିକମାନେ ହୁକ୍କା ବାର ପରିଚାଳନା କିମ୍ବା ସାର୍ବଜନୀନ ସ୍ଥାନରେ ତମାଖୁ ଉତ୍ପାଦ ବିକ୍ରୟ କରିବା ପାଇଁ କୌଣସି ବୈଧ ଅନୁମତି କିମ୍ବା ଲାଇସେନ୍ସ ପ୍ରଦାନ କରିନଥିଲେ। ସେଥିପାଇଁ ସିଗାରେଟ୍ ଏବଂ ଅନ୍ୟାନ୍ୟ ତମାଖୁ ଉତ୍ପାଦ ଆଇନ ସମେତ ବିଭିନ୍ନ ଆଇନଗତ ବ୍ୟବସ୍ଥା ଅନୁଯାୟୀ ମାଲିକମାନଙ୍କ ବିରୁଦ୍ଧରେ ସାତଟି ଫୌଜଦାରୀ ମାମଲା ରୁଜୁ କରାଯାଇଛି ।

ସୂଚନା ଯୋଗ୍ୟ; ନାବାଳକମାନଙ୍କୁ ହୁକା ପରିବେଷଣ କରାଯିବା ସମ୍ପର୍କରେ ଚିନ୍ତିତ ଅଭିଭାବକ ଏବଂ ନାଗରିକଙ୍କ ଅନେକ ଅଭିଯୋଗ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରି, ପୋଲିସ ପକ୍ଷରୁ ମାର୍ଚ୍ଚ ୨୦ ରେ ଏକକାଳୀନ ଚଢାଉ କରାଯାଇଛି। ଏହି ଅଭିଯାନର ନେତୃତ୍ୱ ଟାଉନ ଏସଡିପିଓଙ୍କ ସହିତ ବ୍ରହ୍ମପୁର ଟାଉନ ଥାନା, ଗୋସାନିନୁଗାଁ ଥାନା, ବାରା ବଜାର ଥାନା ଏବଂ ବିଏନ ପୁର ଥାନାର ଆଇଆଇସିମାନେ ନେଇଥିଲେ।