ହସ୍ପିଟାଲରେ ଚିକିତ୍ସିତ ଆହତ ପୋଲିସଙ୍କୁ ଭେଟିଲେ ଏସିପି ଓ ଡିସିପି

ଆଜି ରଣଭୂମି ପାଲଟି ଯାଇଥିଲା ରାଜଧାନୀ ରାଜ ରାସ୍ତା। ଲୋୟର ପିଏମଜି ପାଲଟିଥିଲା ରଣ କ୍ଷେତ୍ର। କଂଗ୍ରେସ ବିକ୍ଷୋଭବେଳେ ତୁମୁଳ କାଣ୍ଡ ହୋଇଛି । ଲୋୟର୍ ପିଏମଜିରେ ଆନ୍ଦୋଳନକାରୀମାନେ ସଭା ସ୍ଥଳକୁ ଧସେଇ ପଶିବାକୁ ଉଦ୍ୟମ କରୁଥିବାବେଳେ ପୋଲିସ ଅଟକାଇବାକୁ ଚେଷ୍ଟା କରିଥିଲା । ଏହି ସମୟରେ ରଣ କ୍ଷେତ୍ର ପାଲଟିଥିଲା ଗାନ୍ଧୀ ମାର୍ଗ । ସ୍ଥିତି ଅଣାୟତ ହେବାରୁ ପୋଲିସ ବାଧ୍ୟ ହୋଇ ପାଣି ଏବଂ ଲୁହ ବୁହା ଗ୍ୟାସ ପ୍ରୟୋଗ କରିଥିଲା । ବିକ୍ଷୋଭକାରୀ ଅଣ୍ଡା, ଟମାଟୋ, ଢେଲା ମାଡ଼ କରିଥିଲେ । ଏମିତିକି ସଭାରେ ଥିବା ଚେୟାର ପିଙ୍ଗିବା ଆରମ୍ଭ କରିଥିଲେ ।

ଯେଉଁଥିରେ ପୋଲିସ କର୍ମଚାରୀଙ୍କ ସମେତ ସାମ୍ୱାଦିକ ବି ଆହତ ହୋଇଛନ୍ତି। କିଛି ପୁଲିସ୍ କର୍ମଚାରୀ ଜଣଙ୍କର ମୁଣ୍ଡ ଫାଟି ଯାଇଥିବା ବେଳେ, ଆଉ କିଛି ଜଣଙ୍କ ଦେହରେ ଗଭୀର ଆଘାତ ଲାଗିଛି। ୧୫ ଜଣ ପୋଲିସ ଆହତ ହୋଇଥିବା ବେଳେ ସେମାନଙ୍କ ଭିତରୁ ୪ ଗୁରୁତର ରହିଥିବା ଜଣାପଡିଛି । ଜଣେ କାର୍ଯ୍ୟରତ ସାମ୍ୱାଦିକ ମଧ୍ୟ ଆହତ ହୋଇ ହସ୍ପିଟାଲରେ ଭର୍ତ୍ତି ହୋଇଛନ୍ତି। ତାଙ୍କ ମୁଣ୍ଡରେ ଗଭୀର ଆଘାତ ଲାଗିଛି। ଏହା ସହ କଂଗ୍ରେସ କର୍ମୀ ମଧ୍ୟ ଆହତ ହୋଇ ହସ୍ପିଟାଲରେ ଚିକିତ୍ସିତ ହେଉଛନ୍ତି।

ଏହାରି ମଧ୍ୟରେ ଚିକିତ୍ସିତ ହେଉଥିବା ଆହତ ପୋଲିସ କର୍ମଚାରୀଙ୍କୁ ଭେଟିଛନ୍ତି ଅତିରିକ୍ତ ପୋଲିସ କମିଶନର ଓ ଭୁବନେଶ୍ବର ଡିସିପି ।