Bhubaneswar Traffic Advisory: ଭୁବନେଶ୍ୱରରେ ସ୍ୱାଧୀନତା ଦିବସ ପରେଡ୍ ପାଇଁ ଟ୍ରାଫିକ କଟକଣା ଜାରି

ରାଜଧାନୀ ଭୁବନେଶ୍ୱରରେ ଅନୁଷ୍ଠିତ ହେବାକୁ ଥିବା ରାଜ୍ୟସ୍ତରୀୟ ସ୍ୱାଧୀନତା ଦିବସ ପରେଡ୍‌-୨୦୨୬ ପାଇଁ କମିଶନରେଟ୍ ପୋଲିସ ପକ୍ଷରୁ ଏକ ବିସ୍ତୃତ ଟ୍ରାଫିକ ଆଡଭାଇଜରି ଜାରି କରାଯାଇଛି। ପରେଡ୍ ଅଭ୍ୟାସ ଏବଂ ମୁଖ୍ୟ ଉତ୍ସବ ସମୟରେ ମହାତ୍ମା ଗାନ୍ଧୀ ମାର୍ଗ ଓ ଏହାର ଆଖପାଖ ରାସ୍ତାରେ ଯାନବାହନ ଚଳାଚଳ ଉପରେ କଟକଣା ଏବଂ ରୁଟ୍ ଡାଇଭର୍ସନ କରାଯାଇଛି।

ବିଜ୍ଞପ୍ତି ଅନୁଯାୟୀ, ଅଗଷ୍ଟ ୧୧ ଏବଂ ୧୨ ତାରିଖ ଦିନ ଅପରାହ୍ନ ୨.୩୦ ରୁ ସନ୍ଧ୍ୟା ୬ଟା ପର୍ଯ୍ୟନ୍ତ, ଅଗଷ୍ଟ ୧୩ ତାରିଖ ସକାଳ ୮.୩୦ ରୁ ୧୧.୩୦ ପର୍ଯ୍ୟନ୍ତ ଏବଂ ଅଗଷ୍ଟ ୧୫ ତାରିଖ ସକାଳ ୬ଟାରୁ ପରେଡ୍ ସମାପ୍ତ ହେବା ପର୍ଯ୍ୟନ୍ତ ଏହି କଟକଣା ବଳବତ୍ତର ରହିବ।

ପ୍ରମୁଖ ଟ୍ରାଫିକ କଟକଣାଗୁଡ଼ିକ:

୧. ଭାରୀ ଯାନବାହନ: ରାମ ମନ୍ଦିର କିମ୍ବା ରାଜମହଲ ପାର୍ଶ୍ୱରୁ ମାଷ୍ଟର କ୍ୟାଣ୍ଟିନ ଛକ ଆଡ଼କୁ କୌଣସି ଭାରୀ ଯାନବାହନ ପ୍ରବେଶ କରିପାରିବେ ନାହିଁ।

୨. ଦୁଇ ଚକିଆ ଓ ହାଲୁକା ଯାନ: ରାଜମହଲ ପାର୍ଶ୍ୱରୁ ଆସୁଥିବା ଦୁଇ ଚକିଆ ଏବଂ ହାଲୁକା ମୋଟର ଯାନଗୁଡ଼ିକ ମାଷ୍ଟର କ୍ୟାଣ୍ଟିନ ଛକ ଦେଇ ରାମ ମନ୍ଦିର ଆଡ଼କୁ ଯାଇପାରିବେ। କିନ୍ତୁ ପରେଡ୍ ବା ଉତ୍ସବ ଶେଷ ନହେବା ପର୍ଯ୍ୟନ୍ତ ମାଷ୍ଟର କ୍ୟାଣ୍ଟିନ ଛକରୁ ପିଏମଜି (PMG) ଛକ ଆଡ଼କୁ ଯିବାକୁ ଅନୁମତି ମିଳିବ ନାହିଁ।

୩. ହାଉସିଂ ବୋର୍ଡ ପାର୍ଶ୍ୱରୁ: ହାଉସିଂ ବୋର୍ଡ ପାର୍ଶ୍ୱରୁ ରବୀନ୍ଦ୍ର ମଣ୍ଡପ ଆଡ଼କୁ ଯାଉଥିବା ଯାନବାହନଗୁଡ଼ିକୁ କେଶରୀ ଟକିଜ୍ କ୍ରସିଂ ନିକଟରେ ଡାଇଭର୍ଟ (ମୋଡ଼ି ଦିଆଯିବ) କରାଯିବ।

୪. ଏଜି ଛକ ପାର୍ଶ୍ୱରୁ: ଏଜି ଛକରୁ ପିଏମଜି ଛକ ଆଡ଼କୁ ଯାଉଥିବା ଗାଡ଼ିଗୁଡ଼ିକୁ ଜୟଦେବ ଭବନ ଛକଠାରୁ ଇଡ୍‌କଲ୍ (IDCOL) ଅଡିଟୋରିୟମ ପାର୍ଶ୍ୱକୁ ଡାଇଭର୍ଟ କରାଯିବ।

୫. ୧୨୦ ବାଟାଲିୟନ ପାର୍ଶ୍ୱରୁ: ୧୨୦ ବାଟାଲିୟନ ଛକ ପାର୍ଶ୍ୱରୁ ଆସୁଥିବା ଗାଡ଼ିଗୁଡ଼ିକୁ ଏମଏଲଏ (MLA) କଲୋନୀ କ୍ରସିଂଠାରୁ ୟୁନିଟ୍-୪ ଆଡ଼କୁ ଡାଇଭର୍ଟ କରାଯିବ।

୬. ମହାତ୍ମା ଗାନ୍ଧୀ ମାର୍ଗ ସିଲ୍: ମହାତ୍ମା ଗାନ୍ଧୀ ମାର୍ଗକୁ ସଂଯୋଗ କରୁଥିବା ସମସ୍ତ ଗଳି ବା ଲେନ୍‌କୁ ଯାନବାହନ ଚଳାଚଳ ପାଇଁ ସମ୍ପୂର୍ଣ୍ଣ ସିଲ୍ କରାଯିବ। କେବଳ ପଦଯାତ୍ରୀମାନଙ୍କୁ ହିଁ ମହାତ୍ମା ଗାନ୍ଧୀ ମାର୍ଗ ଆଡ଼କୁ ଯିବାକୁ ଅନୁମତି ଦିଆଯିବ।

ସେହିପରି ପରେଡ୍ ସମୟରେ ଗାଡ଼ି ପାର୍କିଂ ପାଇଁ କମିଶନରେଟ୍ ପୋଲିସ ପକ୍ଷରୁ ୭ଟି ସ୍ଥାନ ଚିହ୍ନଟ କରାଯାଇଛି । ସେଗୁଡ଼ିକ ହେଲା ରେଳ ଷ୍ଟେସନ ନିକଟରେ ଥିବା ବିଡିଏ (BDA) ବସ୍ ଷ୍ଟାଣ୍ଡ । କଂଗ୍ରେସ ଭବନ ସମ୍ମୁଖରେ ଥିବା ଖୋଲା ସ୍ଥାନ ।ଇଡ୍‌କଲ୍ (IDCOL) ଅଡିଟୋରିୟମ ସମ୍ମୁଖରେ ଥିବା ଖୋଲା ସ୍ଥାନ । ଜୟଦେବ ଭବନ ସମ୍ମୁଖରେ ଥିବା ଖୋଲା ସ୍ଥାନ।ୟୁନିଟ୍-୩ ରେ ଥିବା ଏସବିଆଇ (SBI) ସମ୍ମୁଖରେ ଥିବା ଖୋଲା ସ୍ଥାନ । ରବୀନ୍ଦ୍ର ମଣ୍ଡପ ଭିତରେ ଥିବା ଖୋଲା ସ୍ଥାନ। ୟୁନିଟ୍-୨ ବାଳିକା ଉଚ୍ଚ ବିଦ୍ୟାଳୟ ପଡ଼ିଆ ।