ମନୋଜଙ୍କ ସିଏମଓ ପ୍ରବେଶରେ ବାଧକ ସାଜୁଥିଲା କିଏ ?

ମଙ୍ଗଳବାର ଦି’ଟା ଜବରଦସ୍ତ ନିଷ୍ପତି ନେଇଚନ୍ତି ମୋହନ ବାବୁ । ବରିଷ୍ଠ ଆଇଏଏସ୍ ଅଧିକାରୀ ବିଷ୍ଣୁପଦ ସେଠୀ ସିବିଆଇ ଜେରାରେ ପଡିବା ପରେ ସମସ୍ତେ ଆଙ୍ଗୁଳି ଦେଖାଉଥିଲେ ସିଏମଙ୍କ ଆଡକୁ । କାହିଁକି କଠୋର ନିଷ୍ପତି ନେଉନାହାଁନ୍ତି ମୋହନ ? ହେଲେ ସିଏମ ଯେ ଠିକ ସମୟରେ ନେଇପାରନ୍ତି ଠିକ ନିଷ୍ପତି ତାହା ମୋହନ ପ୍ରମାଣ କରିଦେଲେ । ବିଷ୍ଣୁପଦଙ୍କୁ ସିବିଆଇ ଜେରା କରିବା ଆଗରୁ ତାଙ୍କୁ ସବୁ ବିଭାଗର ପ୍ରମୁଖ ସଚିବ ପଦରୁ ବିଦା କରିଦେଇଚନ୍ତି ସେ। ଏବେ ସେ ଅଭିଯୋଗ ଓ ପେନସନ ବିଭାଗରେ ଓଏସଡି ଭାବେ କାର୍ଯ୍ୟ କରିବେ । ସିବିଆଇ ତଦନ୍ତରୁ ଯାହା ବାହାରିବ ତା’ପରେ ସରକାର ନେବେ ଚୂଡାନ୍ତ ନିଷ୍ପତି ।

ଦ୍ବିତୀୟ ନିଷ୍ପତିଟି ମିଶ୍ର ପ୍ରତିକ୍ରିୟା ସୃଷ୍ଟି କରୁଚି । ମନୋଜ ସାହୁ ଶେଷରେ ସିଏମଓରେ ନିଯୁକ୍ତି ପାଇଚନ୍ତି । ତାଙ୍କୁ ମୋହନଙ୍କ ସତନ୍ତ୍ର ସଚିବ ଭାବେ ନିଯୁକ୍ତି ମିଳିଚି। କିନ୍ତୁ ଆଉ ଏକ ବଡ ପ୍ରଶ୍ନ ଠିଆ ହେଲାଣି ଆମ ସାମ୍ନାରେ। ନଭେମ୍ବର ୧୬ ତାରିଖରେ କେନ୍ଦ୍ର ସରକାର ଏକ ତ୍ବରିତ ନିଷ୍ପତି ନେଲେ । ପୂର୍ବାଞ୍ଚଳ ଓ କେନ୍ଦ୍ରଶାସିତ ଅଞ୍ଚଳର ଆଇଏଏସ କ୍ୟାଡର ଓଡ଼ିଆ ପୁଅ ମନୋଜ ସାହୁଙ୍କ କ୍ୟାଡର ପରିବର୍ତନ ହେଇଗଲା । ସେ ହେଇଗଲେ ଓଡ଼ିଶା କ୍ୟାଡରର ଆଇଏଏସ ଅଧିକାରୀ। ଥିଲେ ଉପ-ନିର୍ବାଚନ କମିଶନର । ବଡ ସାମ୍ବିଧାନିକ ପଦବୀ । ତାଙ୍କୁ ତୁରନ୍ତ ସେଥିରୁ ପଦମୁକ୍ତ କରାଗଲା । କୁଲିଂ ପିରିୟଡ ଥାଏ। ତାକୁ ମଧ୍ୟ କେନ୍ଦ୍ର ସରକାର କୋହଳ କରିଦେଲେ । ଅର୍ଥାତ ଓଡ଼ିଶା ଯିବେ। ତୁରନ୍ତ କାର୍ଯ୍ୟରେ ଯୋଗଦେଇ ମୋହନ ସରକାରଙ୍କୁ ସହାୟତା କରିବେ । ନହେଲେ ଏତେ ନିଷ୍ପତି ତ୍ବରିତ ଢଙ୍ଗରେ ନିଆଯାଏ କି ?

କେନ୍ଦ୍ର ସରକାର ସିନା କାମ ବଢାଇ ଦେଲେ, କିନ୍ତୁ ଏଠି ସବୁ ଜିନିଷ ତ କଚ୍ଛପ ଢଙ୍ଗରେ ଚାଲେ । ମନୋଜଙ୍କୁ ନେଇ କିଛି ବଡ କ୍ଷମତାଲିପ୍‌ସୁ ଅଧିକାରୀ ଚିନ୍ତିତ ହେଇପଡିଲେ । ଜଣେ ବଡ ନେତା ବି ସନ୍ଦେହ କଲେ । ମନୋଜ ଯଦି ସିଏମଓରେ ସ୍ଥାନ ପାଇବେ, ତେବେ ସବୁ ଖବର ପିଏମଓକୁ ପଳାଇବ । ଏମିତିରେ ମନୋଜ ପିଏମ ମୋଦୀଙ୍କ ଗୁଡବୁକରେ ଅଛନ୍ତି । ଏଣୁ ଗୋଟିଏ ଆଇଏଏସ୍ ଗୋଷ୍ଠୀ ଲାଗିପଡିଲେ ଯେ, ମନୋଜ ସଚିବାଳୟକୁ ଯାଅନ୍ତୁ କିନ୍ତୁ ସିଏମଓକୁ ଆସନ୍ତୁ ନାହିଁ । ଅନ୍ୟ କୌଣସି ବିଭାଗ ସମ୍ଭାଳନ୍ତୁ। ଯଉଁମାନଙ୍କ ସାର୍ଥ ବିଗିଡିବ ବୋଲି ଆଶଙ୍କା ହଉଥିଲା ସେଇମାନେ ହିଁ ମାସେରୁ ଅଧିକ କାଳ ଝୁଲେଇ ଦେଇଥିଲେ ମନୋଜଙ୍କୁ। ଶେଷରେ କିନ୍ତୁ ମୋହନ ନେତା-ଅଧିକାରୀଙ୍କ ଚାପରୁ ନିଜକୁ ବାହାର କରିନେଲେ। ମନୋଜଙ୍କୁ ମୋହନଙ୍କ ସତନ୍ତ୍ର ସଚିବ ଭାବେ ନିଯୁକ୍ତି ମିଳିଲା । ଆଶା କରୁଚୁ ମନୋଜ ସିଏମଓରେ ଚାଲିଥିବା ଚକ୍ରାନ୍ତକୁ ଭଲ ଭାବେ ବୁଝି ସଠିକ ପରାମର୍ଶ ଦେବେ ମୋହନଙ୍କୁ।