ଟ୍ରମ୍ପ୍‌ଙ୍କ ଅସ୍ତ୍ରବିରତି ଘୋଷଣା ଟ୍ବିଟ୍‌; କାଶ୍ମୀର ପ୍ରସଙ୍ଗ ଅନ୍ତର୍ଜାତୀୟକରଣ କରିବାକୁ ଉଦ୍ୟମ ହୋଇଛି: ସଚିନ ପାଇଲଟ୍‌

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ଘୋଷଣା କରାଯାଇଥିବା ଅସ୍ତ୍ରବିରତିକୁ ନେଇ ଆଜି ବଡ଼ ବୟାନ ଦେଇଛନ୍ତି ବରିଷ୍ଠ କଂଗ୍ରେସ ନେତା ସଚିନ ପାଇଲଟ। ସେ ସାମ୍ବାଦିକ ସମ୍ମିଳନୀରେ କହିଛନ୍ତି ଗତ ୨୪ ଘଣ୍ଟା ମଧ୍ୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ଘୋଷଣା କରାଯାଇଥିବା ଅସ୍ତ୍ରବିରତିକୁ ଭାରତ ସରକାର ଗ୍ରହଣ କରିବା ନୂତନ ଏବଂ ଆଶ୍ଚର୍ଯ୍ୟଜନକ ପଦକ୍ଷେପ। ଏହି ପରିସ୍ଥିତିର ଗମ୍ଭୀରତା ଉପରେ ଗୁରୁତ୍ୱାରୋପ କରି କହିଛନ୍ତି ଯେ ଜଣେ ଆମେରିକା ରାଷ୍ଟ୍ରପତି ସୋସିଆଲ ମିଡିଆ ମାଧ୍ୟମରେ ଏପରି ଅସ୍ତ୍ରବିରତି ଘୋଷଣା କରିବା ଅଭୂତପୂର୍ବ।

ତାଙ୍କର ସୋସିଆଲ ମିଡିଆ ପୋଷ୍ଟରେ ଆଶ୍ଚର୍ଯ୍ୟ । ଆମକୁ ତାଙ୍କ ସୋସିଆଲ ମିଡିଆ ଆକାଉଣ୍ଟରେ ସେ କ’ଣ ପୋଷ୍ଟ କରିଛନ୍ତି ତାହା ଉପରେ ମଧ୍ୟ ଧ୍ୟାନ ଦେବାକୁ ପଡିବ। ଭାରତ ଏବଂ ପାକିସ୍ତାନ ମଧ୍ୟରେ ପ୍ରସଙ୍ଗକୁ ଅନ୍ତର୍ଜାତୀୟକରଣ କରିବାର ପ୍ରୟାସ ଏକ ନୂତନ ଏବଂ ଆଶ୍ଚର୍ଯ୍ୟଜନକ ପଦକ୍ଷେପ । ତେଣୁ କଂଗ୍ରେସ ପାର୍ଟି ସ୍ବତନ୍ତ୍ର ସଂସଦ ଅଧିବେଶନ ପାଇଁ ଦାବି କରୁଛି ।

ଆମେ ୧୯୯୪ର ପ୍ରସ୍ତାବକୁ ପୁଣି ଥରେ ପାରିତ କରିବା ଦରକାର । ପାକିସ୍ତାନ ଅଧିକୃତ ଜମ୍ମୁ-କାଶ୍ମୀର ଭାରତର ଅବିଚ୍ଛେଦ୍ୟ ଅଙ୍ଗ । ଆମେ ଏହାକୁ ଫେରାଇ ଆଣିବା ପାଇଁ ଚେଷ୍ଟା କରିବା ଦରକାର। ଆମେ ସ୍ପଷ୍ଟ ଭାବରେ କହିଥିଲୁ ଯେ ପହଲଗାମରେ ହୋଇଥିବା ଆକ୍ରମଣ ଭାରତର ଆତ୍ମା ଉପରେ ଏକ ଆକ୍ରମଣ ଥିଲା, ଏବଂ ଏହାର କଡ଼ା ଜବାବ ଦେବା ଆବଶ୍ୟକ ଥିଲା। ଆମର ସଶସ୍ତ୍ର ବାହିନୀର କାର୍ଯ୍ୟ ଏବଂ ସେମାନେ ଆତଙ୍କବାଦୀ ଶିବିରଗୁଡ଼ିକୁ ଯେଉଁ ସଠିକତା ସହିତ ଟାର୍ଗେଟ କରିଥିଲେ, ସେଥିପାଇଁ ଆମେ ଗର୍ବିତ।

ସେ ଆଉ ମଧ୍ୟ କହିଛନ୍ତି ଏହା ଭାରତ ଏବଂ ପାକିସ୍ତାନ ମଧ୍ୟରେ ଏକ ଦ୍ୱିପାକ୍ଷିକ ପ୍ରସଙ୍ଗ, ଏବଂ ଆମେରିକା ସମେତ କୌଣସି ଦେଶ ଏଥିରେ ହସ୍ତକ୍ଷେପ କରିବା ଉଚିତ୍ ନୁହେଁ।