ଖୋର୍ଦ୍ଧା ଶାଳାପଡିହ ଜଙ୍ଗଲରେ ବାଘର ପାଦଚିହ୍ନ; ଗ୍ରାମବାସୀ ଆତଙ୍କିତ

ଖୋର୍ଦ୍ଧା ଜିଲ୍ଲାର ବାଣପୁର ବ୍ଲକ ଅନ୍ତର୍ଗତ ଶାଳାପଡିହ ଜଙ୍ଗଲରେ ଏକ ରୟାଲ ବେଙ୍ଗଲ ଟାଇଗରର ପାଦଚିହ୍ନ ଦେଖିବାକୁ ମିଳିଥିବାରୁ ଗ୍ରାମବାସୀ ଆତଙ୍କିତ ଅବସ୍ଥାରେ ଅଛନ୍ତି। ନିକଟସ୍ଥ କେତେକ ଅଞ୍ଚଳରେ ଦେଖାଯାଇଥିବା ପାଦଚିହ୍ନ ଯାଞ୍ଚ କରିବା ପରେ ବନ ବିଭାଗ ଶାଳାପଡିହ ଜଙ୍ଗଲରେ ଏକ ବାଘର ଉପସ୍ଥିତି ନିଶ୍ଚିତ କରିଛି।

ଗ୍ରାମବାସୀଙ୍କ କହିବାନୁସାରେ, ସେପ୍ଟେମ୍ବର ୨୦ ତାରିଖ ରାତିରେ ଏକ ବନ୍ୟ ପଶୁ ଜଙ୍ଗଲ ନିକଟସ୍ଥ ଝୋଲା ସାହିଠାରେ ଥିବା ମନ୍ଦିର ନିକଟରେ ଷଣ୍ଢକୁ ମାରି ଦେଇଥିଲା। ପରଦିନ ଏକ ଧାନ କ୍ଷେତରେ ଅଧା ଖିଆଯାଇଥିବା ଷଣ୍ଢର ଶବ ମିଳିବା ପରେ ଗ୍ରାମବାସୀ ବନ ବିଭାଗକୁ ଏ ସଂପର୍କରେ ସୂଚନା ଦେଇଥିଲେ।

ବନ ବିଭାଗର ଅଧିକାରୀମାନେ ଘଟଣାସ୍ଥଳରେ ପହଞ୍ଚି ସ୍ଥାନୀୟ ଅଞ୍ଚଳରୁ ମିଳିଥିବା ପାଦଚିହ୍ନ ଯାଞ୍ଚ କରିଥିଲେ। ପରେ ସେମାନେ ନିଶ୍ଚିତ କରିଥିଲେ ଯେ ପାଦଚିହ୍ନ ରୟାଲ ବେଙ୍ଗଲ ଟାଇଗରର। ଓଡ଼ିଶାର ଅନ୍ୟ କିଛି ଜଙ୍ଗଲରୁ ବାଘ ଶାଳାପଡିହକୁ ଆସିଥାଇପାରେ ବୋଲି ସନ୍ଦେହ କରାଯାଉଛି।

ଶାଳାପଡିହ ଜଙ୍ଗଲରେ ବାଘର ପ୍ରକୃତ ଅବସ୍ଥିତି ଜାଣିବା ପାଇଁ ଆମେ ଡ୍ରୋନର ସହାୟତା ନେବୁ ବୋଲି ଟାଙ୍ଗୀ ଏସିଏଫ୍ ଦେବାଶିଷ ଭୋଇ କହିଛନ୍ତି। ଆଖପାଖ ଗ୍ରାମର ବାସିନ୍ଦାଙ୍କୁ ଏକୁଟିଆ ଜଙ୍ଗଲ ଭିତରକୁ ନଯିବାକୁ ବନ ବିଭାଗ ପକ୍ଷରୁ କୁହାଯାଇଛି ବୋଲି ନାଚୁଣୀ ଫରେଷ୍ଟର ପୂର୍ଣ୍ଣଚନ୍ଦ୍ର ବେହେରା କହିଛନ୍ତି।