ସୁପ୍ରିମକୋର୍ଟ ବିବାଦୀୟ ଏନସିଇଆରଟି ଅଷ୍ଟମ ଶ୍ରେଣୀ ସାମାଜିକ ବିଜ୍ଞାନ ପାଠ୍ୟପୁସ୍ତକ ନ୍ୟାୟପାଳିକା ଅଧ୍ୟାୟକୁ ନିଷିଦ୍ଧ କରିବା ଏବଂ ଅବମାନନା ନୋଟିସ୍ ଜାରି କରିବା ପରେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ପ୍ରତିକ୍ରିୟା ଦେଇଛନ୍ତି। ଦୁଃଖ ପ୍ରକାଶ କରି, ସେ କୋର୍ଟଙ୍କ ନିର୍ଦ୍ଦେଶର ପୂର୍ଣ୍ଣ ପାଳନ କରିବାକୁ ପ୍ରତିଶ୍ରୁତି ଦେଇଛନ୍ତି । ଧର୍ମେନ୍ଦ୍ର ପ୍ରଧାନ କହିଛନ୍ତି ସର୍ବୋଚ୍ଚ କୋର୍ଟଙ୍କ ଉଦବେଗକୁ ସରକାର ଗ୍ରହଣ କରିଛନ୍ତି । ଆମେ ନ୍ୟାୟପାଳିକାକୁ ସମ୍ମାନ କରୁଛୁ, ଏବଂ କୋର୍ଟ ଯାହା କହିଛନ୍ତି, ଆମେ ତାହା ସମ୍ପୂର୍ଣ୍ଣ ପାଳନ କରିବୁ। ଯାହା ଘଟିଛି ତାହା ପାଇଁ ମୁଁ ଗଭୀର ଦୁଃଖିତ ଏବଂ ଘଟଣା ପାଇଁ ମୋର ଦୁଃଖ ପ୍ରକାଶ କରୁଛି। ଏହି ପୁସ୍ତକକୁ ପ୍ରତ୍ୟାହାର ପାଇଁ ଏନସିଇଆରଟିକୁ ନିର୍ଦ୍ଦେଶ ଦିଆଯାଇଛି । ସରକାର ଆଉ ଥରେ ଏପରି କରିବାକୁ ଦେବୁ ନାହିଁ । ବିଚାର ବିଭାଗରେ ଭ୍ରଷ୍ଟାଚାର ବିଷୟ ୮ମ ଶ୍ରେଣୀ ପୁସ୍ତକରେ ସ୍ଥାନ ପାଇଥିଲା । ସେ ଆଉ ମଧ୍ୟ କହିଛନ୍ତି ନ୍ୟାୟପାଳିକାଙ୍କୁ ଅସମ୍ମାନ କରିବାର କୌଣସି ଉଦ୍ଦେଶ୍ୟ ନଥିଲା। ସରକାରଙ୍କ ସେଭଳି କୌଣସି ଆଭିମୁଖ୍ୟ କେବେ ବି ନଥିଲା। ଆମେ ଏହି ପ୍ରସଙ୍ଗକୁ ଅତ୍ୟନ୍ତ ଗୁରୁତ୍ୱର ସହ ନେଇଛୁ। ନିଶ୍ଚିତ ଭାବେ ଗୋଟିଏ ତଦନ୍ତ ହେବ। ଏନସିଇଆରଟିର ଯେଉଁ ଅଫିସର ଏପରି କରିଛନ୍ତି କାର୍ଯ୍ୟାନୁଷ୍ଟାନ ହେବ । ଆମର ନ୍ୟାୟପାଳିକା ଉପରେ ପୂର୍ଣ୍ଣ ବିଶ୍ୱାସ ଅଛି, ଏହାର ନିର୍ଦ୍ଦେଶ ପାଳନ କରିବା ଆମର ସାମ୍ବିଧାନିକ ଏବଂ ନୈତିକ ଦାୟିତ୍ୱ। ସେ ନାଗରିକମାନଙ୍କୁ ଆଶ୍ୱାସନା ଦେଇ କହିଛନ୍ତି ଯେ ସରକାର କୋର୍ଟଙ୍କ ନିର୍ଦ୍ଦେଶକୁ ସମ୍ମାନ ଦେବାକୁ ପ୍ରତିବଦ୍ଧ। କୋର୍ଟ ନିର୍ଦ୍ଦେଶ ଦେଇଛନ୍ତି ଯେ ସମସ୍ତ ଭୌତିକ ଏବଂ ଡିଜିଟାଲ୍ କପିକୁ ତୁରନ୍ତ ସାଧାରଣ ପ୍ରବେଶରୁ ହଟାଇ ଦିଆଯିବ। ଏନସିଇଆରଟି ନିର୍ଦ୍ଦେଶକଙ୍କୁ ସ୍କୁଲଗୁଡ଼ିକୁ ପୂର୍ବରୁ ପଠାଯାଇଥିବା କପିଗୁଡ଼ିକୁ ଜବତ କରିବା ଏବଂ ଏକ ଅନୁପାଳନ ରିପୋର୍ଟ ଦାଖଲ କରିବା ନିଶ୍ଚିତ କରିବା ପାଇଁ ଦାୟିତ୍ୱ ଦିଆଯାଇଥିଲା। ସମସ୍ତ ରାଜ୍ୟର ଶିକ୍ଷା ପ୍ରମୁଖ ସଚିବମାନଙ୍କୁ ଏହି ଆଦେଶ କାର୍ଯ୍ୟକାରୀ କରିବାକୁ ଏବଂ ଦୁଇ ସପ୍ତାହ ମଧ୍ୟରେ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଥିଲା। ଏହା ସହିତ, କୋର୍ଟ ଅଧ୍ୟାୟ ପ୍ରସ୍ତୁତ କରିବାରେ ସମ୍ପୃକ୍ତ ସଦସ୍ୟଙ୍କ ନାମ ଏବଂ ପ୍ରମାଣପତ୍ର ମାଗିଥିଲେ ଏବଂ ବିଷୟବସ୍ତୁ ଚୂଡ଼ାନ୍ତ ହୋଇଥିବା ବୈଠକର ମୂଳ ବିବରଣୀ ମାଗିଥିଲେ। ବରିଷ୍ଠ ଅଧିକାରୀମାନଙ୍କୁ ଏକ କାରଣ ଦର୍ଶାଅ ନୋଟିସ୍ ଜାରି କରାଯାଇଥିଲା, ଯେଉଁଥିରେ ପଚାରିଥିଲେ ଯେ କାହିଁକି କାର୍ଯ୍ୟାନୁଷ୍ଠାନ – କୋର୍ଟ ଅବମାନନା ଆଇନ ଅନୁଯାୟୀ – ଆରମ୍ଭ କରାଯିବ ନାହିଁ। Post navigation NCERT Class 8 TextBook: ସୁପ୍ରିମ୍କୋର୍ଟଙ୍କ ତୀବ୍ର ସମାଲୋଚନା ପରେ କ୍ଷମା ମାଗିଲା ଏନସିଇଆରଟି
