ହେଲିକପ୍ଟର ଦୁର୍ଘଟଣାଗ୍ରସ୍ତ, ୩ ମୃତ

ବୁଧବାର ସକାଳେ ମୁମ୍ବାଇ ଅଭିମୁଖେ ଯାଉଥିବା ବେଳେ ପୁଣେର ବାୱଧନ ଅଞ୍ଚଳରେ ହେଲିକପ୍ଟର ଦୁର୍ଘଟଣାଗ୍ରସ୍ତ ହେବାରୁ ୩ ଜଣଙ୍କ ମୃତ୍ୟୁ ଘଟିଛି। ହେଲିକପ୍ଟରଟି ଅକ୍ସଫୋର୍ଡ ଗଲ୍ଫ କୋର୍ସ ରିସର୍ଟରୁ ଜୁହୁ ଅଭିମୁଖେ ଯାଉଥିଲା। ମୃତକମାନେ ହେଲେ ଗିରିଶ କୁମାର ପିଲ୍ଲାଇ, ପ୍ରୀତମଚାନ୍ଦ ଭରଦ୍ୱାଜ ଓ ପରମଜିତ। ଜଣେ ବରିଷ୍ଠ ପୁଲିସ ଅଧିକାରୀ କହିଛନ୍ତି ଯେ, ହେରିଟେଜ୍ ଏଭିଏସନ୍ ନାମକ ଏକ ସଂସ୍ଥା ଦ୍ୱାରା ପରିଚାଳିତ ହେଲିକପ୍ଟର ଉଡ଼ାଣ ଭରିବା ସମୟରେ କୁହୁଡ଼ି ହୋଇଥିଲା ବୋଲି ପ୍ରାଥମିକ ସୂଚନାରୁ ଜଣାପଡିଛି।

ହିଞ୍ଜେଓ୍ଵାଡି ପୁଲିସର ସୂଚନା ଅନୁଯାୟୀ, ବାୱଧନରେ ହେଲିକପ୍ଟର ଦୁର୍ଘଟଣା ଖବର ମିଳିବା ପରେ ଅଗ୍ନିଶମ ବାହିନୀ ସହ ସେମାନଙ୍କ ଟିମ୍ ପ୍ରତିକ୍ରିୟା ରଖିଥିଲେ। ମିଳିଥିବା ସୂଚନା ଅନୁଯାୟୀ, ସକାଳ ୭ଟା ପୂର୍ବରୁ ଏହି ଦୁର୍ଘଟଣା ଘଟିଥାଇପାରେ। ନିଆଁକୁ ଆୟତ୍ତ କରିବା ପାଇଁ ୩ଟି ଦମକଳ ବାହିନୀ ନିୟୋଜିତ ହୋଇଛନ୍ତି । ପୁଲିସ କଣ୍ଟ୍ରୋଲ ରୁମ୍ ଓ ଜିଲ୍ଲା ବିପର୍ଯ୍ୟୟ ପରିଚାଳନା କଣ୍ଟ୍ରୋଲ ରୁମ୍ ପକ୍ଷରୁ ବେସାମରିକ ବିମାନ ଚଳାଚଳ ମହାନିର୍ଦେଶକଙ୍କ କାର୍ଯ୍ୟାଳୟ କର୍ତ୍ତୃପକ୍ଷଙ୍କୁ ଅବଗତ କରାଯାଇଛି। ଡିଜିସିଏ ଦୁର୍ଘଟଣାର ତଦନ୍ତ ଆରମ୍ଭ କରିବ ବୋଲି ଡେପୁଟି କମିଶନର କହିଛନ୍ତି।