କଂଗ୍ରେସ ଓ କଂଗ୍ରେସ ନେତା ଆତ୍ମସମୀକ୍ଷା କରନ୍ତୁ: ମନମୋହନ ସାମଲ

ରାଜ୍ୟ କାର୍ଯ୍ୟାଳୟରେ ଆୟୋଜିତ ସାମ୍ବାଦିକ ସମ୍ମିଳନୀର ବିରୋଧୀ କଂଗ୍ରେସକୁ କଡ଼ା ନିନ୍ଦା କରିଛନ୍ତି ରାଜ୍ୟ ବିଜେପି ସଭାପତି ମନମୋହନ ସାମଲ। ସେ କହିଛନ୍ତି ବିଧାନସଭାର ମର୍ଯ୍ୟାଦା ଉଲ୍ଲଂଘନ ହୋଇଛି । କଂଗ୍ରେସ ଓ କଂଗ୍ରେସ ନେତା ଆତ୍ମସମୀକ୍ଷା କରନ୍ତୁ । ସେମାନେ ବିରୋଧୀ ଦଳର ଭୂମିକା ବୁଝିନାହାନ୍ତି । ଯେଉଁ ଜଣେ ମହିଳା ବାଚସ୍ପତିଙ୍କୁ ବ୍ୟବହାର ପ୍ରଦର୍ଶନ କରାଯାଇଛି, ତାହା ଏକ ଦାୟିତ୍ୱ ସମ୍ପନ୍ନ ବିରୋଧୀ ଦଳ ଠାରୁ ଆଶା କରାଯାଇ ନ ଥାଏ ବୋଲି କହିଛନ୍ତି ମନମୋହନ । ବିରୋଧୀ ଦଳ ଗଠନ ମୂଳକ ପ୍ରସ୍ତାବ ଦେବାକୁ କେହି ମନା କରି ନାହାଁନ୍ତି । ସରକାରଙ୍କୁ ସମାଲୋଚନା କରିବାକୁ କେହି ମନା କରୁ ନାହାଁନ୍ତି । କିଛି ପ୍ରଚାର ଏବଂ ଅପପ୍ରଚାର କରି ସର୍ଟକର୍ଟ୍ ରାଜନୀତି କରୁଛନ୍ତି । ମାନସିକ ଦୃଷ୍ଟିରେ ରହି ଏବେବି ସରକାର ଅଛନ୍ତି ବୋଲି ଯେଉଁମାନେ ଭାବୁଛନ୍ତି, ସେମାନେ ଜୋସରେ ନୁହେଁ ହୋସରେ ଆସନ୍ତୁ ବୋଲି କହିଛନ୍ତି ବିଜେପି ସଭାପତି ।

ସେ ଆହୁରି କହିଛନ୍ତି ଓଡ଼ିଶାର ଜନମତକୁ ସ୍ୱୀକାର କରିବା ଆବଶ୍ୟକ । ଜନମତ ବିରୋଧୀ ଦଳଙ୍କୁ ପ୍ରତ୍ୟାଖାନ କରିଛି ତାହାକୁ ସ୍ୱୀକାର କରିବାକୁ ପଡ଼ିବ । ଆଇନକୁ ହାତକୁ ନେଇ ସାଧାରଣ ଲୋକଙ୍କ ଜୀବନ ସହିତ ଖେଳିବାର ଅଧିକାର କାହାର ନାହିଁ । ଏଭଳି ଆଚରଣ, ଉଚ୍ଚାରଣ ଓ ବ୍ୟବହାରକୁ ବିଜେପି ତୀବ୍ର ନିନ୍ଦା କରୁଛି ।  ବିଜେପି ସର୍ବଦା ଗଣତନ୍ତ୍ର ଉପରେ ବିଶ୍ୱାସ କରେ । ତେଣୁ ବିରୋଧୀଙ୍କ ଦ୍ୱାରା କରାଯାଉଥିବା ଏହି ସବୁ କାମ ଗଣତନ୍ତ୍ର ପାଇଁ ଶୁଭ ନୁହେଁ ।

ଅନ୍ୟପଟେ ଏପଟେ ବିଧାନସଭା ଅଭିମୁଖେ କଂଗ୍ରେସ ନେତା ଓ କର୍ମୀ। ଶହ ଶହ କଂଗ୍ରେସ କର୍ମୀ ଶୋଭାଯାତ୍ରାରେ ବାହାରିଛନ୍ତି। ବିଧାନସଭା ଘେରାଉ ଲାଗି ରାଜ୍ୟର ବିଭିନ୍ନ ସ୍ଥାନରୁ ଆସି ଭୁବନେଶ୍ବରରେ ଶୋଭାଯାତ୍ରାରେ ସାମିଲ ହୋଇଛନ୍ତି କଂଗ୍ରେସ କର୍ମୀମାନେ। ନାରୀ ନିର୍ଯାତନା ପ୍ରତିବାଦରେ ବିକ୍ଷୋଭ କରୁଛି କଂଗ୍ରେସ।