ସୁକତେଲ ପ୍ରକଳ୍ପର ମୁଖ୍ୟ ନିର୍ମାଣ ଯନ୍ତ୍ରୀଙ୍କ ଅମାପ ସମ୍ପତ୍ତି; ଯେତେ ଖୋଜୁଛି, ସେତେ ବାହାରୁଛି

ଭିଜିଲାନ୍ସ ଜାଲରେ ଧରାପଡ଼ିଛନ୍ତି ଵଲାଙ୍ଗୀର ଲୋୟର ସୁକତେଲ ପ୍ରକଳ୍ପର ମୁଖ୍ୟ ନିର୍ମାଣ ଯନ୍ତ୍ରୀ। ଆୟ ବହିର୍ଭୁତ ସମ୍ପତ୍ତି ଠୁଳ ଅଭିଯୋଗରେ ଚିଫ୍ କନଷ୍ଟ୍ରକସନ ଇଞ୍ଜିନିୟର ସୁନିଲ ରାଉତଙ୍କ ଘରେ ଚାଲିଛି ଚଢ଼ାଉ। ଆଜି ଚଢ଼ାଉର ଦ୍ଵିତୀୟ ଦିନ ।

ଗତକାଲି ଓଡ଼ିଶା ଭୁବନେଶ୍ୱର-କଟକ-ପୁରୀ ଓ ଢେଙ୍କାନାଳରେ ୩୪ଟି ପ୍ଲଟ୍ ମିଳିଥିବାବେଳେ ଆଉ ୨ଟି ପ୍ଲଟ୍ ହସ୍ତଗତ ହୋଇଥିବା ସୂଚନା ମିଳିଛି । ଏହା ସହିତ ‘ଦୁର୍ନୀତିଗ୍ରସ୍ତ’ ଇଞ୍ଜିନିୟରଙ୍କ ନାମରେ ପ୍ଲଟ ସଂଖ୍ୟା ଏପର୍ଯ୍ୟନ୍ତ ୩୬ କୁ ବୃଦ୍ଧି ପାଇଛି।

ଭୁବନେଶ୍ୱର ନୀଳାଦ୍ରିବିହାରଠାରେ ଆବାସିକ ତିନି ମହଲା କୋଠା, ଭୁବନେଶ୍ୱର ନୟାପଲ୍ଲୀଠାରେ ଦୁଇ ମହଲା କୋଠା, ପୁରୀ ଭିଆଇପି ରୋଡ ଓ ଗ୍ରାଣ୍ଡ ରୋଡରେ ଥିବା ଦୁଇଟି ଫ୍ଲାଟ୍, କଟକ ଗୁରୁଡିଝାଟିଆରେ ଥିବା ପୈତୃକ ଘର, ଅନୁଗୁଳ କିଶୋରନଗରରେ ତାଙ୍କ ପୁଅଙ୍କ ଘର, ଭୁବନେଶ୍ୱର ନୟାପଲ୍ଲୀରେ ତାଙ୍କ ସମ୍ପର୍କୀୟଙ୍କ ଘର, ବଲାଙ୍ଗୀରରେ ଶ୍ରୀ ରାଉତଙ୍କ ବାସଭବନ ଓ କାର୍ଯ୍ୟାଳୟରେ ମଧ୍ୟ ଏକକାଳୀନ ଚଢ଼ାଉ କରାଯାଇଛି।

ଏହା ବ୍ୟତୀତ ଢେଙ୍କାନାଳ ସପ୍ତଶଯ୍ୟାରେ ସୁନୀଲ ରାଉତଙ୍କ ୮ ଏକର ପରିମିତ ଜମିରେ ଥିବା ଏକ ଫାର୍ମ ହାଉସରେ ଦୁଇ ମହଲା ବିଶିଷ୍ଟ କୋଠାରେ ମଧ୍ୟ ଚଢ଼ାଉ ଜାରି ରହିଛି। ଫାର୍ମ ହାଉସରେ ଭିତରେ ୨୧୨୩ ବର୍ଗର କୁକୁଡ଼ା ଫାର୍ମ ଯାଉଥିରେ ୧୦୦୦ ଦେଶୀ କୁକୁଡ଼ା ଏବଂ ବତକ ରହିଛନ୍ତି । ଏହାସହ ୨୫୫୦ ବର୍ଗ ବିଶିଷ୍ଟ ଗୋଶାଳା ମଧ୍ୟ ଠାବ ହୋଇଛି ଏଥିରେ ୪୫ଟା ଉଚ୍ଚ ମାନର ଗାଈ ଏବଂ ୨୫ଟି ବାଛୁରୀ ଠାବ ହୋଇଛି । ଓଡ଼ିଶା ବ୍ୟତୀତ ଉତ୍ତରପ୍ରଦେଶର ମଥୁରା ଓ ବୃନ୍ଦାବନ ଚନ୍ଦ୍ରଦୟ ମନ୍ଦିର ଛତିକରା ରୋଡ଼ରେ ଦୁଇଟି ପ୍ଲଟ ଠାବ ହୋଇଛି ।

ଗତକାଲି ଚଢାଉ ବେଳେ ନଗଦ ୨ ଲକ୍ଷ ୩୪ ହଜାର ଟଙ୍କା, ୧୭୬ ଗ୍ରାମ୍ ସୁନା, ୨ଟି ଟ୍ରକ୍ ଓ ୨ଟି ଦାମୀ କାର୍ ଜବତ ହୋଇଥିବା ବେଳେ । ଏହାବ୍ୟତୀତ ରାଉତ ବିଭିନ୍ନ ବିମାରେ ୧.୮୬ କୋଟି ଟଙ୍କା ବିନିଯୋଗ କରିଛନ୍ତି ଏବଂ ୪୦.୩୯ ଲକ୍ଷ ଟଙ୍କା ବ୍ୟାଙ୍କରେ ଜମା ରହିଛି । ଆକଳନ କରାଯାଉଛି ଯେ ମୋଟ୍ ବ୍ୟାଙ୍କ ଜମାରାଶି ୨.୨୬କୋଟିରୁ ଅଧିକ ରହିଛି । ଆଜି ବିଭିନ୍ନ ବ୍ୟାଙ୍କରେ ଥିବା ବିଭିନ୍ନ ଲକର୍ ଯାଞ୍ଚ ହେବ ବୋଲି ସୂଚନା ମିଳିଛି ।