ମୟୂରଭଞ୍ଜ ଜିଲ୍ଲାର ବହାଳଦା ଅଞ୍ଚଳରେ ଜଣେ ଆଦିବାସୀ ନାବାଳିକାଙ୍କ ପ୍ରତି ହୋଇଥିବା ଅସଦାଚରଣ ଘଟଣାକୁ ବିରୋଧ କରି ମୟୁରଭଞ୍ଜର ମିଳିତ ଆଦିବାସୀ ମଞ୍ଚ ପକ୍ଷରୁ ବାମନଘାଟି ଉପଖଣ୍ଡରେ ଡକାଯାଇଥିବା ଧର୍ମଘଟ ସଫଳ ହୋଇଛି ବୋଲି ବିଜେଡି କହିଛି । ଏହି ଅସଦାଚରଣ ଘଟଣା ସାଧାରଣ ଲୋକଙ୍କ ମଧ୍ୟରେ ବ୍ୟାପକ ଆକ୍ରୋଶର ପ୍ରତିଫଳନ ବୋଲି ବିଜେଡି ଦାବି କରିଛି । ବିଜେଡି ମୟୂରଭଞ୍ଜ-୨ ଜିଲ୍ଲା ସଂଗଠନ ୟୁନିଟ୍ ଏହି ଧର୍ମଘଟକୁ ପୂର୍ଣ୍ଣ ଏବଂ ସକ୍ରିୟ ସମର୍ଥନ ଦେଇଛି ଏବଂ ନ୍ୟାୟ ଦାବିରେ ସ୍ଥାନୀୟ ଲୋକଙ୍କ ସହ ଦୃଢ଼ଭାବେ ସମର୍ଥନ କରିଛି । ବିଜେଡି ମୟୂରଭଞ୍ଜର ଲୋକମାନଙ୍କ ସହିତ ଏହି ଘଟଣାର ପ୍ରତିବାଦରେ ପୀଡିତାଙ୍କ ପାଇଁ ନ୍ୟାୟ ସୁନିଶ୍ଚିତ କରିବା ଓ ଦୋଷୀକୁ କଠୋର ଦଣ୍ଡିତ କରିବା ପାଇଁ ସମସ୍ତ ଗଣତାନ୍ତ୍ରିକ ଆନେ୍ଦାଳନକୁ ସମର୍ଥନ ଜାରି ରଖିଛି । ପୂର୍ବରୁ, ଦଳ ଟିରିଂ ଥାନା ଅଧୀନରେ ୧୪ ବର୍ଷୀୟ ଆଦିବାସୀ ନାବାଳିକାଙ୍କ ସହିତ ଘଟିଥିବା ଅସଦାଚରଣକୁ ଦୃଢ଼ଭାବେ ନିନ୍ଦା କରିଥିଲା । ଓଡିଶାରେ ଆଦିବାସୀ ମହିଳାମାନଙ୍କ ବିରୋଧରେ ଉଦ୍ବେଗଜନକ ଭାବେ ବୃଦ୍ଧି ପାଉଥିବା ଅତ୍ୟାଚାର ନେଇ ଗୁରୁତର ଚିନ୍ତା ପ୍ରକଟ କରିଛି । ଏହି ଘଟଣାରେ ପୋଲିସର ନିଷ୍କ୍ରିୟତାକୁ ବିଜେଡି ମଧ୍ୟ ସମାଲୋଚନା କରିଛି । ଯେଉଁମାନେ ଅସଦାଚରଣ ଘଟଣାରେ ଦୋଷୀ ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ସହ ଆଦିବାସୀ ମହିଳାମାନଙ୍କ ସୁରକ୍ଷା ଓ ନ୍ୟାୟ ପାଇଁ ଉପଯୁକ୍ତ ପଦକ୍ଷେପ ନେବାକୁ ଦଳ ଦାବି କରିଛି । Post navigation BJD Suspends BCJD, BYJD Leaders: ୧୦ ଛାତ୍ର ଓ ଯୁବ ନେତା ବିଜେଡିରୁ ନିଲମ୍ବିତ Pakhala Divas 2026: ପଖାଳ ପାଇଁ ଗିନିଜ ବୁକ ଅଫ ୱାର୍ଲଡ ରେକର୍ଡ କଲା ଓଡିଶା
