ଟେଣ୍ଡର ଫିକ୍ସିଂ ମାମଲା: ନିତ୍ୟାନନ୍ଦ ଗଣ୍ଡଙ୍କ ଇସ୍ତଫା ଦାବି କଲା ବିଜେଡି

ଟେଣ୍ଡର ଫିକ୍ସିଂ ମାମଲାରେ ଆଇଏଏସ ବିଷ୍ନୁପଦ ସେଠୀଙ୍କୁ ସମନ ହେବାପରେ ଆଜି ନବରଙ୍ଗପୁର ବିଜେଡି ତରଫରୁ ଏକ ସାମ୍ବାଦିକ ସମ୍ମିଳନୀ କରାଯାଇଥିଲା।

କିଛିଦିନ ତଳେ ଭୁବନେଶ୍ୱରର ଏକ ତାରକା ହୋଟେଲ ନିକଟରୁ ସିବିଆଇ ୧୦ ଲକ୍ଷ ଟଙ୍କା ଜବତ କରିବା ଘଟଣାରେ ଆଦିବାସୀ ଉନ୍ନୟନ ବିଭାଗର ତତ୍କାଳୀନ ପ୍ରମୁଖ ସଚିବଙ୍କ ସମ୍ପୃକ୍ତି ଓ ସିବିଆଇ ସମନ ହେବା ଘଟଣା ପଦାକୁ ଆସିବା ପରେ ଏହା ଏକ ନୂଆ ମୋଡ଼ ନେଇଛି।

ଆଦିବାସୀ ଉନ୍ନୟନ ବିଭାଗର ପୂର୍ବତନ ପ୍ରମୁଖ ସଚିବ ଯଦି ସିବିଆଇ ସମନ ପାଆନ୍ତି ତେବେ ସେହି ବିଭାଗର ମୁଖ୍ୟ ଭାବେ ବିଭାଗୀୟ ମନ୍ତ୍ରୀ କିପରି ଭାବେ ଏଥିରୁ ବାଦ ପଡିବେ ବୋଲି ସାମ୍ବାଦିକ ସମ୍ମିଳନୀ ରେ ପ୍ରଶ୍ନ କରାଯାଇଛି।

ଆଦିବାସୀ ଉନ୍ନୟନ ବିଭାଗର ଯେକୌଣସି କାର୍ଯ୍ୟର ଯଦି ଅଟକଳ ମୂଲ୍ୟ ୨୦କୋଟି ରୁ ଉର୍ଦ୍ଧ ହୁଏ ତାହା ହେଲେ ସେହି କାର୍ଯ୍ୟର ଅନୁମୋଦନ ନିମନ୍ତେ ରାଜ୍ୟ କ୍ୟାବିନେଟର ଅନୁମୋଦନ ନିହାତି ଆବଶ୍ୟକ ଅଟେ।

ବ୍ରିଜ ଆଣ୍ଡ ରୁଫ ସଂସ୍ଥାକୁ ୧୯ ନଭେମ୍ବର ୨୦୨୪ ରେ ପୂର୍ବତନ ପ୍ରମୁଖ ସଚିବ ୩୭ କୋଟି ଟଙ୍କାର କାର୍ଯ୍ୟାଦେଶ ପାଇଥିବା ଉଲ୍ଲେଖ କରି ନିଜେ ସିବିଆଇ ସନ୍ଦେହ ଘେର ମଧ୍ୟକୁ ଆସିଛନ୍ତି। ଏହି ବିଭାଗର ମନ୍ତ୍ରୀଙ୍କ ଅନୁମୋଦନ ବିନା ଏହି କାର୍ଯ୍ୟ ହୋଇପାରିବ ନାହିଁ।

ଗତ ୧୧ନଭେମ୍ବର ୨୦୨୪ରେ ପୂର୍ବତନ ସଚିବ ଭାରତ ସରକାରଙ୍କର ଚାରିଗୋଟି ରାଷ୍ଟ୍ରାୟତ ସଂସ୍ଥା ଯଥା Bridge and Roof Corporation, National Bridge Construction Corporation, Water and Power consultancy Services, Central Electronics Ltd କୁ ସିଧା ସଳଖ ୩୮୭କୋଟି ଟଙ୍କାର କାର୍ଯ୍ୟାଦେଶ ଦେବା ସରକାରଙ୍କ ସ୍ୱଚ୍ଛତା ଉପରେ ପ୍ରଶ୍ନବାଚୀ ସୃଷ୍ଟି କରିଥିବା ସାମ୍ବାଦିକ ସମ୍ମିଳନୀରେ କୁହାଯାଇଛି।

ଆହୁରି ମଧ୍ୟ କୁହାଯାଇଛି କେନ୍ଦ୍ର ସରକାର ଙ୍କ PSU ମାନେ Tending process ରେ ଓଡିଶା ସରକାରଙ୍କ PWD ନିୟମକୁ ପାଳନ କରନ୍ତି ନାହିଁ।ସେମାନେ Internal Tendering ବା Group of Contractor ମାନଙ୍କୁ ନେଇ ନିଜର empanelled କରାଇ କାର୍ଯ୍ୟ ବଣ୍ଟନ କରାଇଥାନ୍ତି ଏବଂ ପ୍ରାୟ ଅଧିକାଂଶ ସମୟରେ ନିର୍ଧାରିତ ଦରଠାରୁ ୭ରୁ ୧୦ପ୍ରତିଶତ ଅଧିକ ଦରରେ କାର୍ଯ୍ୟ କରିଥାନ୍ତି। ଏହାଦ୍ୱାରା ନିୟୋଜିତ ଠିକାଦାର ମାନେ ବଡ ଆକାରର ଆର୍ଥିକ କାରବାର କରିଥାନ୍ତି।

ମନ୍ତ୍ରୀଙ୍କ ବିନା ଅନୁମୋଦନରେ Water and Power Consultancy Services କୁ ୧୭୮କୋଟି, ଏନବିସିସି କୁ ୪୧କୋଟି, ବ୍ରିଜ ଆଣ୍ଡ ରୁଫକୁ ୩୭ ଏବଂ Central Electronics Ltd କୁ ୧୦୩ କୋଟି ଟଙ୍କାର କାର୍ଯ୍ୟାଦେଶ ଦେବା ଅସମ୍ଭବ ବୋଲି କୁହାଯାଇଛି।

Water and Power Consultancy Services ଭଳି ସଂସ୍ଥା ଯାହାକୁ କି ସୁନ୍ଦରଗଡ଼ ଜିଲ୍ଲା ପ୍ରଶାସନ ଗତ ମାର୍ଚ୍ଚ ମାସ ଚାରି ତାରିଖରୁ ରାଉଲକେଲାରେ ଏକ ପୋଖରୀ ନିର୍ମାଣ କାର୍ଯ୍ୟରେ ଅନିୟମିତତା ଅଭିଯୋଗ ଯୋଗୁଁ କଳା ତାଲିକାଭୁକ୍ତ କରାଯାଇଥିବା ନିଜେ ମୁଖ୍ୟମନ୍ତ୍ରୀ ବିଧାନସଭା ଗୃହର ପ୍ରଶ୍ନକାଳ ରେ ଜଣାଇଛନ୍ତି ପୁନଃ ସେହି ସଂସ୍ଥାକୁ ନଭେମ୍ବର ୧୯ ରେ ବିଭାଗୀୟ ସଚିବ ପତ୍ର ମାଧ୍ୟମରେ କାର୍ଯ୍ୟାଦେଶ ଦେବା ଘଟଣାରେ ମନ୍ତ୍ରୀଙ୍କ ସମ୍ପୃକ୍ତି ଥିବା ବିଜେଡି ସନ୍ଦେହ କରିଛି।

ସରକାର ମନ୍ତ୍ରୀ ମାନଙ୍କ ନିୟନ୍ତ୍ରଣ ବାହାରେ କି? ସିବିଆଇ କାହା ଚାପରେ ପକ୍ଷପାତିତା କରୁଛି? ଏବଂ ଏହି ଦୁର୍ନୀତିରେ ମୁଖ୍ୟମନ୍ତ୍ରୀଙ୍କ ଭୂମିକା କୁ ନେଇ ବିଜେଡି ପ୍ରଶ୍ନ କରିବା ସହ ମନ୍ତ୍ରୀଙ୍କୁ ସିବିଆଇ ତଦନ୍ତଭୁକ୍ତ କରିବା ପାଇଁ ଏବଂ ମନ୍ତ୍ରୀ ନିତ୍ୟାନନ୍ଦ ଗଣ୍ଡଙ୍କ ଇସ୍ତଫା ଦାବି କରିଛି।