ସମ୍ବିତ ପାତ୍ର ଜିତିଲେ ୩ ମାସ ଭିତରେ ନୟାଗଡ଼ ଚିନିକଳ ଖୋଲିବ: ଅମିତ ଶାହ

ନୟାଗଡ଼: କେନ୍ଦ୍ର ଗୃୃହମନ୍ତ୍ରୀ ଅମିତ ଶାହ  ମଙ୍ଗଳବାର ନିର୍ବାଚନୀ ପ୍ରଚାର ପାଇଁ ନୟାଗଡ଼ ଗସ୍ତ କରି ଥିଲେ । ଅମିତି ଶାହ ନୟାଗଡ଼ ଗସ୍ତ କରିଥିବା ବେଳେ ବିଜେପି କର୍ମୀଙ୍କ ମଧ୍ୟରେ ବେଶ ଉତ୍ସାହ ଭରିଛି । ସେ ସେଠାରେ ପୁରୀ ବିଜେପି ସାଂସଦ ପ୍ରାର୍ଥୀ ସମ୍ବିତ ପାତ୍ର ଏବଂ ନୟାଗଡ଼ ବିଜେପି ବିଧାୟିକା ପ୍ରାର୍ଥୀ ପ୍ରତ୍ୟୁଷା ରାଜେଶ୍ୱରୀ ସିଂଙ୍କ ପାଇଁ ପ୍ରଚାର କରିଥିଲେ । ସବୁ ସଭା ପରି ନୟାଗଡ଼ରେ ମଧ୍ୟ ରାଜ୍ୟ ସରକାରଙ୍କୁ ଟାର୍ଗେଟ କରିଛନ୍ତି ଶାହ ।
ଓଡ଼ିଶାରେ ନବୀନ ସରକାରଙ୍କ ୨୫ବର୍ଷ ଶାସନ ଭିତରେ ଓଡ଼ିଶା ବହୁତ ପଛକୁ ଯାଇଛି । ଥରେ ବିଜେପିକୁ ସରକାର କରିବାକୁ ସୁଯୋଗ ଦିଅନ୍ତୁ । ଓଡ଼ିଶାକୁ ୧ ନମ୍ବର କରିଦେବୁ ବୋଲି ନିଜ ଭାଷଣରେ କହିଛନ୍ତି ଅମିତ । ପ୍ରଭୁ ଜଗନ୍ନାଥଙ୍କ ରତ୍ନ ଭଣ୍ଡାର ଚାବିକୁ ନେଇ ବିଜେଡିକୁ ସମାଲୋଚନା କରିବା ସହ ନୟାଗଡ଼ରେ ୩ ମାସ ମଧ୍ୟରେ ଚିନିକଳ ଚାଲିବା ନେଇ ପ୍ରତିଶୃତି ଦେଇଛନ୍ତି ।

ଗତ ଥର ନୟାଗଡ ନିର୍ବାଚନ ମଣ୍ଡଳୀରୁ କମ୍ ଭୋଟ ପାଇ ହାରିଥିଲେ ସମ୍ବିତ ପାତ୍ର । କିନ୍ତୁ ଏଥର ମୁଁ ଆଶାବାଦୀ ସମ୍ବିତ ବାବୁ ଜିତିବାର କାରଣ ବି ନୟାଗଡ ହିଁ ହେବ । ଏହା ସହ ସଭାରେ ଚିନିକଳ କଥା ଉଠାଇ କହିଲେ ‘ସମ୍ବିତଙ୍କୁ ଜିତାଇ ଦିଅନ୍ତୁ, ଚିନିକଳ ୩ ମାସ ଭିତରେ ଚାଲିବ।’ ସରକାରୀ ଚାକିରି ମିଳିବ, ଏଥିପାଇଁ ଆଦୌ ଚିନ୍ତିତ ହୁଅନ୍ତୁ ନାହିଁ।