ଭୂମିହୀନଙ୍କୁ ମିଳିବ ଘର। ଯୋଗ୍ୟ ଭୂମିହୀନ ପରିବାରକୁ ତୁରନ୍ତ ଘର ବଣ୍ଟନ ପାଇଁ ନିର୍ଦ୍ଦେଶ । ଏ ନେଇ ଜିଲ୍ଲାପାଳମାନଙ୍କୁ ରାଜ୍ୟ ପଞ୍ଚାୟତିରାଜ ବିଭାଗର କଡ଼ା ନିର୍ଦ୍ଦେଶନାମା । ରାଜ୍ୟରେ ଚିହ୍ନଟ ହୋଇଥିବା ଭୂମିହୀନଙ୍କୁ ଯଥାଶୀଘ୍ର ପ୍ରଧାନମନ୍ତ୍ରୀ ଆବାସ ଯୋଜନାରେ ପକ୍କା ଘର ଯୋଗାଇ ଦେବାକୁ ରାଜ୍ୟ ପଞ୍ଚାୟତିରାଜ ଓ ପାନୀୟ ଜଳ ବିଭାଗ ସମସ୍ତ ଜିଲ୍ଲାପାଳମାନଙ୍କୁ ଚିଠି ଲେଖିଛି । ଏହା ସହ ଭୂମିହୀନ ସମସ୍ୟାର ସମାଧାନ ପାଇଁ ପ୍ରତି ମାସର ପ୍ରଥମ ଶନିବାର BDO ଏବଂ ସମ୍ପୃକ୍ତ ତହସିଲଦାରଙ୍କ ସହିତ ଏକ ମିଳିତ ବୈଠକ କରିବାକୁ ନିର୍ଦ୍ଦେଶ ଦିଆଯାଇଛି । ପଞ୍ଚାୟତିରାଜ ବିଭାଗ ଚିଠି ଲେଖି ତାଗିଦ କରିଛି ଯେ ଯେଉଁମାନେ ଭୂମିହୀନ ଅଛନ୍ତି ସେମାନଙ୍କୁ ତୁରନ୍ତ ପକ୍କା ଘର ଯୋଗାଇ ଦିଅ । ଏକ୍ଷେତ୍ରରେ ପୂର୍ବରୁ ଚିହ୍ନଟ ହୋଇଥିବା ଭୂମିହୀନ ହିତାଧିକାରୀଙ୍କୁ ପ୍ରାଥମିକତା ଭିତ୍ତିରେ ଘର ଯୋଗାଇ ଦେବାକୁ ନିର୍ଦ୍ଦେଶ ରହିଛି । ଏହି ସମସ୍ୟାର ସମାଧାନ ପାଇଁ ପ୍ରତି ମାସର ପ୍ରଥମ ଶନିବାରରେ ମଣ୍ଡଳ ଉନ୍ନୟନ ଅଧିକାରୀ ଏବଂ ସମ୍ପୃକ୍ତ ତହସିଲଦାରଙ୍କ ସହିତ ଏକ ମିଳିତ ବୈଠକ କରିବେ । ବୈଠକରେ ଭୂମିହୀନଙ୍କୁ ଚିହ୍ନଟ କରି ପକ୍କା ଘର ପାଇଁ ଅର୍ଥ ମଞ୍ଜୁର କରିବେ । ସେହିପରି ଏପର୍ଯ୍ୟନ୍ତ ଗ୍ରାମୀଣ ପିଏମଆବାସ ଯୋଜନା ଏବଂ ପିଏମ୍ ଜନମନ ଯୋଜନାରେ ଚିହ୍ନଟ ଯଥାକ୍ରମେ ୮୭୧ ଓ ୫୦ ଜଣ ହିତାଧିକାରୀଙ୍କୁ ଘର ଯୋଗାଇ ଦିଆଯାଇ ନାହିଁ । ପିଏମଆବାସ ଯୋଜନାରେ କେନ୍ଦ୍ରାପଡ଼ାର ସର୍ବାଧିକ ୨୧୪ ଜଣ ହିତାଧିକାରୀଙ୍କ ନାଁ ଥିବାବେଳେ ଦ୍ୱିତୀୟରେ ଗଞ୍ଜାମରେ ୧୭୧ ଜଣ ଚିହ୍ନଟ ଭୂମିହୀନଙ୍କୁ ଘର ମିଳି ନାହିଁ । ସେହିପରି ବଲାଙ୍ଗୀରରେ ୩୨, ଯାଜପୁରରେ ୬୪, କଳାହାଣ୍ଡିରେ ୧, କନ୍ଧମାଳରେ ୧, କୋରାପୁଟରେ ୧୪୧, ମୟୂରଭଞ୍ଜରେ ୧୨, ନବରଙ୍ଗପୁରରେ ୩୯, ନୟାଗଡ଼ରେ ୧୧୨ ଓ ସୁବର୍ଣ୍ଣପୂରରେ ୮୪ ଜଣ ରହିଛନ୍ତି । ସେହିପରି ପିଏମ୍ ଜନମନ ଯୋଜନାରେ ଗଞ୍ଜାମରେ ୩୯, ଦେବଗଡ଼ରେ ୬ ଏବଂ ଢେଙ୍କାନାଳରେ ୫ ଜଣଙ୍କୁ ଘର ମିଳି ନାହିଁ । ଏହା ବ୍ୟତୀତ, ଗ୍ରାମୀଣ ପିଏମଏୱାଇ ଅନ୍ତର୍ଗତ ଆବାସ ପ୍ଲସ୍ ୨୦୨୪ ସର୍ଭେ ସମୟରେ, ମୋଟ ୩୭ ଲକ୍ଷ ୮୯ ହଜାର ୨୩୪ ହିତାଧିକାରୀଙ୍କ କଚ୍ଚା ଘରେ ରହୁଥିବାବେଳେ ସେଥିମଧ୍ୟରୁ ୨ ଲକ୍ଷ ୧ ହଜାର ୧୧ ଜଣ ଭୂମିହୀନ ଭାବରେ ଚିହ୍ନିଟ କରାଯାଇଛି । ଯଦିଓ ନୂତନ ଭାବରେ ଚିହ୍ନଟ ହୋଇଥିବା ଯୋଗ୍ୟ ପରିବାରକୁ ଗ୍ରାମ୍ୟ ଉନ୍ନୟନ ବିଭାଗର ନିର୍ଦ୍ଦେଶ ପରେ ଘର ମଞ୍ଜୁର କରାଯିବ । Post navigation Non-Veg Retail Market: ଭୁବନେଶ୍ୱର ୪ ନମ୍ୱର ଆମିଷ ବଜାରରୁ ହଟିବ ସମସ୍ତ ଜବରଦଖଲ Anganwadi Oil Boards: ସବୁ ଅଙ୍ଗନବାଡି ସେଣ୍ଟର ଓ ଶିଶୁ ଯତ୍ନ କେନ୍ଦ୍ରରେ ଲାଗିବ ତେଲ ବୋର୍ଡ
