ଲୋକସଭାରେ ବିଳମ୍ବିତ ରାତ୍ରିରେ ପାରିତ ହେଲା ୱାକଫ ବିଲ୍

ଲୋକସଭାରେ ଗୃହୀତ ହେଲା ୱାକଫ୍ ସଂଶୋଧନ ବିଲ୍ ।ସରକାର ଏବଂ ବିରୋଧୀଙ୍କ ମଧ୍ୟରେ ପ୍ରବଳ ବିତର୍କ ପରେ ଲୋକସଭାରେ ଗୃହୀତ ହୋଇଛି ୱାକଫ ସଂଶୋଧନ ବିଲ୍-୨୦୨୫। ସଂଖ୍ୟାଲଘୁ ବ୍ୟାପାର ମନ୍ତ୍ରୀ କିରଣ ରିଜିଜୁ ଲୋକସଭାରେ ଏହି ବିଲ୍ ଆଗତ କରିଥିଲେ। ୧୨ ଘଣ୍ଟା ଧରି ମାରାଥନ ବିତର୍କ ପରେ ରାତି ୨ଟା ବେଳେ ବିଲ୍‌ ଲୋକସଭାରେ ପାରିତ ହୋଇଥିଲା । ବିଲ୍ ସପକ୍ଷରେ ୨୮୮ ଏବଂ ବିପକ୍ଷରେ ୨୩୨ ଭୋଟ ପଡ଼ିଥିଲା। ବିଲ୍ ପାସ କରିବା ପାଇଁ ମଧ୍ୟରାତ୍ରି ପରେ ମଧ୍ୟ ଗୃହ ବସିଥିଲା। ବିଲ୍ ଉପରେ ୮ ଘଣ୍ଟା ଆଲୋଚନା ପାଇଁ ଧାର୍ଯ୍ୟ ହୋଇଥିବା ବେଳେ ବିରୋଧୀ ଦଳଙ୍କ ଦାବି ମୁତାବକ ଏହା ୧୨ ଘଣ୍ଟାକୁ ବୃଦ୍ଧି ପାଇଥିଲା ।

ନରେନ୍ଦ୍ର ମୋଦୀ ତୃତୀୟ ଥର ପାଇଁ ସରକାର ଗଠନ କରିବା ପରେ ଡକାଯାଇଥିବା ବଜେଟ ଅଧିବେଶନରେ ସରକାର ଦୁଇଟି ବିଲ୍ ଆଣିଥିଲେ। ପ୍ରଥମ – ୱାକଫ (ସଂଶୋଧନ) ବିଲ୍ ୨୦୨୪ ଏବଂ ଦ୍ୱିତୀୟ – ମୁସଲିମ ୱାକଫ (ବାତିଲ) ବିଲ୍ ୨୦୨୪। ଏହି ଦୁଇଟି ବିଲ୍ ଲୋକସଭାରେ ଅଣାଯାଇଥିଲା। ସରକାର ପ୍ରତ୍ୟେକଟି ଆପତ୍ତିର ଉତ୍ତର ଦେଇଥିଲେ, ଯେଉଁଥିରେ ବିରୋଧୀଙ୍କ ଦ୍ୱାରା ଉଠାଯାଇଥିବା ଆପତ୍ତି ମଧ୍ୟ ସାମିଲ ଥିଲା, ଯେଉଁ ଆପତ୍ତିଗୁଡ଼ିକ କହିଥିଲେ ଯେ ବିଲ୍ ସମ୍ବିଧାନର ମୌଳିକ ଢାଞ୍ଚାର ବିରୋଧୀ ଏବଂ ଆଶଙ୍କାକୁ ଦୂର କରିଥିଲା।

ଶାସକ ଏନ୍ ଡିଏ ଓ ବିରୋଧୀ ଦଳ ମଧ୍ୟରେ ଘମାଘୋଟ ବିତର୍କ ପରେ ରାତି ସାଢ଼େ ୧୨ଟାରେ ଭୋଟ୍ ଗ୍ରହଣ ହୋଇଥିଲା । ବାଚସ୍ପତି ଓମ୍ ବିର୍ଲା ୧୨ଟା ୪୦ରେ ଫଳାଫଳ ଘୋଷଣା କରିଥିଲେ । ୱାକଫ ସଂଶୋଧିତ ବିଲରେ କିଛି ଗୁରୁତ୍ବପୂର୍ଣ୍ଣ ସଂଶୋଧନ କରାଯାଇଛି । ଯୁଗ୍ମ ସଂସଦୀୟ କମିଟି, ଜେପିସିର ସୁପାରିଶ ଆଧାରରେ ଏହି ସଂଶୋଧନ କରାଯାଇଛି । ଏନଡିଏର ପ୍ରମୁଖ ସହଯୋଗୀ ସଂଯୁକ୍ତ ଜନତା ଦଳ ଓ ତେଲୁଗୁ ଦେଶମ ପାର୍ଟି ତରଫରୁ ଦିଆଯାଇଥିବା ସଂଶୋଧନକୁ ଗ୍ରହଣ କରାଯାଇଛି ।

ବିଲ୍ ସପକ୍ଷରେ ସରକାର ଦୃଢ଼ ଯୁକ୍ତି ରଖିଥିଲେ। ସଂଖ୍ୟାଲଘୁ ଏବଂ ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିକୁ କହିଛନ୍ତି ମୁସଲମାନଙ୍କ ଧାର୍ମିକ କାର୍ଯ୍ୟରେ ହସ୍ତକ୍ଷେପ କରିବା ଏହି ବିଲର ଉଦ୍ଦେଶ୍ୟ ନୁହେଁ। ଏହି ବିଲ୍ ଅସାମ୍ବିଧାନିକ ନୁହେଁ। ୱାକଫ୍ ସଂପତ୍ତିର ପରିଚାଳନାରେ ସ୍ବଚ୍ଛତା ଆଣିବା ହେଉଛି ଏହି ବିଲ୍‌ର ମୁଖ୍ୟ ଉଦ୍ଦେଶ୍ୟ। ଏହାଦ୍ବାରା ଲକ୍ଷଲକ୍ଷ ଗରିବ ମୁସଲିମ ଲାଭବାନ ହେବେ ।

ଆଜି ୱାକଫ ବିଲ୍ ରାଜ୍ୟସଭାରେ ଆଗତ ହେବ। ୧୯୯୫ ୱାକଫ୍ ଆଇନର ସଂଶୋଧନ ପାଇଁ ଏହି ବିଲ୍‌ ଆଣିଛନ୍ତି କେନ୍ଦ୍ର ସରକାର । ବିଜ୍ଞପ୍ତି ଜାରି ହେବା ଦିନଠାରୁ ନୂତନ ଆଇନ କାର୍ଯ୍ୟକାରୀ ହେବ। ୱାକଫ ସଂଶୋଧନ ବିଲକୁ ଅସାମ୍ବିଧାନିକ ବୋଲି କହିବା ପାଇଁ ବିରୋଧୀ ଦଳଗୁଡ଼ିକୁ ସମାଲୋଚନା କରି ସଂଖ୍ୟାଲଘୁ ବ୍ୟାପାର ମନ୍ତ୍ରୀ କିରେନ ରିଜିଜୁ କହିଛନ୍ତି ଯେ ୱାକଫ ସମ୍ପତ୍ତି ସମ୍ପର୍କିତ ଆଇନ ଦଶନ୍ଧି ଧରି ରହିଛି।