ଦନ୍ତାହାତୀ ଉପରେ ମାଡିଗଲା ମାଲବାହୀ ଟ୍ରେନ

ଢେଙ୍କାନାଳ ସଦର ରେଞ୍ଜ ଅନ୍ତର୍ଗତ ଚିନ୍ତାପୋଖରୀ ଠାରେ ଟ୍ରେନ ଦୁର୍ଘଟଣା ରେ ଦନ୍ତା ହାତୀ ର ମୃତ୍ୟୁ ଘଟିଛି | ସୂଚନା ଅନୁଯାୟୀ ୪୦ ଟିକିଆ ହାତୀ ପଲ ରେଳଧାରଣା ପାର କରୁଥିବା ବେଳେ ମାଲବାହୀ ଟ୍ରେନ ହାତୀ କୁ ଧକ୍କା ଦେଇଥିଲା | ଆଜି ଭୋର ରେ ଏହି ଦୁର୍ଘଟଣା ଘଟିଛି, ହାତୀଟି ର ବୟସ ୧୨ ରୁ ୧୫ ବର୍ଷ ହେବ ବୋଲି ବନ ଅଧିକାରୀ ସୂଚନା ଦେଇଛନ୍ତି | ଦୁର୍ଘଟଣା ସୂଚନା ପାଇ ବନ ଅଧିକାରୀ ଓ ଡିଏଫଓ ଘଟଣାସ୍ଥଳ ରେ ପହଞ୍ଚି ହାତୀ ମୃତ ଦେହ କୁ ରେଳଧାରଣା କଡ଼ କୁ ନେଲା ପରେ ରେଳ ଚଳାଚଳ ଆରମ୍ଭ ହୋଇଥିଲା |

ବନବିଭାଗ ସନ୍ଧ୍ୟା ୬ଟା ରୁ ସକାଳ ୬ଟା ଯାଏ ସତର୍କ ସୂଚନା ଦେଇଥିଲେ ମଧ୍ୟ ଟ୍ରେନ ଚାଳକ ଏହାକୁ ଅଣଦେଖା କରିଛି ବୋଲି ଫରେଷ୍ଟର ଅଭିଯୋଗ କରିଛନ୍ତି | ଟର୍ଚ୍ଚ ମାରି ଟ୍ରେନ କୁ ଅଟକାଇବା ଚେଷ୍ଟା କରିଥିଲେ ମଧ୍ୟ ଟ୍ରେନ ରହିନଥିଲା | ଘଟଣାସ୍ଥଳ ରେ ପୋଲିସ ପହଞ୍ଚି କେଉଁ ପରିସ୍ଥିତି ରେ ଏମିତି ଅଘଟଣ ଘଟିଛି ତାହାର ତନାଘନା ଆରମ୍ଭ କରିଛି |