ସ୍ବପ୍ନରେ ବି ଆମ୍ବେଦକରଙ୍କୁ ଅପମାନିତ କରିପାରିବିନି: ଅମିତ ଶାହା 

ରାଜ୍ୟସଭାରେ ଡ. ଆସେବକରଙ୍କ ବାବଦରେ ନିଜ ଟିପ୍ପଣୀକୁ ନେଇ ବିବାଦ ପରେ ଗୃହ ମନ୍ତ୍ରୀ ଅମିତ ଶାହା । ବୁଧବାର ଏକ ସାମ୍ବାଦିକ ସମ୍ମିଳନୀ କରି ସ୍ପଷ୍ଟୀକରଣ ଦେବା ସହ କଂଗ୍ରେସକୁ ପୁଣିଥରେ ଜୋରଦାର ଘେରିଛନ୍ତି । “ସଂସଦରେ କଥା ତଥ୍ୟ ଏବଂ ସତ୍ୟ ଆଧାରରେ ରଖାଯିବା ଉଚିତ୍ । ଭାଜପାର ସଦସ୍ୟମାନେ ଏପରି ହିଁ କରିଛନ୍ତି । ଯେତେବେଳେ ସାବ୍ୟସ୍ତ ହୋଇଗଲା କଂଗ୍ରେସ ଆମ୍ବେଦକର ବିରୋଧୀ, ସଂରକ୍ଷଣ ବିରୋଧୀ ଏବଂ ସମ୍ବିଧାନ ବିରୋଧୀ ଦଳ ଅଟେ, ସେତେବେଳେ ଦଳ ଏହାର ପୁରୁଣା ରଣନୀତିକୁ ଆପଣେଇ ବୟାନକୁ କାଂଟଛାଟ୍ କରି ଉପସ୍ଥାପନ କରିବା ଆରମ୍ଭ କରିଦେଲା” ବୋଲି ଶାହା ଏହି ଅବସରରେ କହିଥିଲେ ।ସେ କହିଛନ୍ତି ମୁଁ ମୋ ସପ୍ନରେ ବି ବାବା ସାହେବ ଆମ୍ବେଦକରଙ୍କୁ ଅପମାନିତ କରିପାରିବି ନାହିଁ । ଲୋକେ ମୋ ଭାଷଣର ମୂଳ ରେକର୍ଡ ଦେଖନ୍ତୁ, ସବୁକିଛି ସ୍ପଷ୍ଟ ହୋଇଯିବ ବୋଲି କହିଥିଲେ । କଂଗ୍ରେସ ଅଧ୍ଯକ୍ଷ ଖଡଗେ ମୋ ଠାରୁ ଇସ୍ତଫା ମାଗୁଛନ୍ତି, ତାଙ୍କୁ ଆନନ୍ଦ ମିଳିବା ପାଇଁ ଯଦିବି ମୁଁ ଇସ୍ତଫା ଦେଇଦିଏ, ତେବେବି ତାଙ୍କର କୌଣସି କାମ ହେବନି । ଏବେ ୧୫ ବର୍ଷ ଯାଏ ତାଙ୍କୁ ଯେଉଁଠାରେ ଅଛନ୍ତି, ସେଠାରେ ହିଁ ବସିବାକୁ ପଢିବ । ମୋ ଇସ୍ତଫା ଦ୍ଵାରା ତାଙ୍କର କିଛି ବି ଭଲ ହେବନି ବୋଲି ଶାହା କଂଗ୍ରେସକୁ ଟାର୍ଗେଟ କରି କହିଥିଲେ ।

ଶାହା ଆଉ ମଧ୍ୟ କହିଛନ୍ତି ରଜ୍ୟସଭାରେ ମୋର ପୂରା ଭାଷଣର ରେକର୍ଡ ରହିଛି । ଭାଜପା ସଦସ୍ୟ ଟ୍ଵିଟ୍ କରି ଏହି କଥାକୁ ଲୋକଙ୍କ ନିକଟରେ ପହଞ୍ଚାଇଛନ୍ତି । କଂଗ୍ରେସ ମୋ ବୟାନକୁ କାଣ୍ଟଛାଣ୍ଟ କରି ଲୋକଙ୍କ ସାମନାରେ ରଖିଛି । ଜନତାଙ୍କ ମଧ୍ୟରେ ମୋ ପ୍ରତି ଭ୍ରାନ୍ତ ଧାରଣା ସୃଷ୍ଟି କରିଛି । ମୋ ବୟାନକୁ ଜନତାଙ୍କ ନିକଟରେ ପହଞ୍ଚାନ୍ତୁ, ସବୁକିଛି ସ୍ପଷ୍ଟ ହୋଇଯିବ । ମୁଁ ସେହି ଦଳର ଲୋକ, ଯାହା ସପ୍ନରେ ବି ବାବା ସାହେବ ଆମ୍ବେଦକରଙ୍କ ଅପମାନ କରିପାରିବ ନାହିଁ ବୋଲି ଶାହା କହିଥିଲେ ।

ଏହାପୂର୍ବରୁ ଖଡଗେ ବାବା ସାହେବ ଭୀମରାଓ ଆମ୍ବେଦକରଙ୍କ ଉପରେ ଟିପ୍ପଣୀ ପାଇଁ ଅମିର ଶାହାଙ୍କ ଇସ୍ତଫା ଦାବି କରିଥିଲେ । ସେ ବୁଧବାର ଅପରାହ୍ନରେ ଏକ ସାମ୍ବାଦିକ ସମ୍ମିଳନୀ କରି ରାତି ୧୨ଟା ପୂର୍ବରୁ ଶାହାଙ୍କୁ ପଦରୁ ହଟାଇବା ପାଇଁ ପ୍ରଧାନମନ୍ତ୍ରୀ ମୋଦିଙ୍କଠାରେ ଦାବି କରିଥିଲେ । ମୋଦୀ ଏବଂ ଶାହା ପରସ୍ପରର ପାପ ଏବଂ କଥାକୁ ଲୁଚାଇଥାନ୍ତି ବୋଲି ଖଡଗେ କହିଥିଲେ ।