Constitution Amendment Bill: ଲୋକସଭାରେ ଆଗତ ହେଲା ୩ ଗୁରୁତ୍ବପୂର୍ଣ୍ଣ ସମ୍ବିଧାନ ସଂଶୋଧନ ବିଲ୍

ଲୋକସଭାରେ ସମ୍ବିଧାନ ସଂଶୋଧନ ବିଲ୍ ଆଗତ । ୩ଟି ବିଲ୍‌ ଆଗତ କଲେ ଆଇନ ମନ୍ତ୍ରୀ ଅର୍ଜୁନ ରାମ ମେଘୱାଲ୍ । ଗୋଟିଏ ବିଲ୍‌ ଆଗତ କଲେ ଗୃହ ମନ୍ତ୍ରୀ ଅମିତ ଶାହ । ୧୩୧ତମ ସଂଶୋଧନ ବିଲ୍ କୁ ଉପସ୍ଥାପନ କରିବା ପାଇଁ ଲୋକସଭାରେ ଭୋଟ୍ ଗ୍ରହଣ କରାଯାଇଥିଲା । ମହିଳା ସଂରକ୍ଷଣ ସଂଶୋଧନ ବିଲ୍ ୨୦୨୬, ସୀମା ନିର୍ଦ୍ଧାରଣ ବିଲ୍ ୨୦୨୬, ଏବଂ କେନ୍ଦ୍ରଶାସିତ ଅଞ୍ଚଳ ସଂଶୋଧନ ବିଲ୍ ୨୦୨୬।

ଆଇନ ମନ୍ତ୍ରୀ ଅର୍ଜୁନ ରାମ ମେଘୱାଲ ସଂସଦରେ ମହିଳାମାନଙ୍କ ପାଇଁ ସଂରକ୍ଷଣ ପ୍ରଦାନ କରିବା ପାଇଁ ତିନୋଟି ବିଲ୍ ଆଗତ କରିଥିଲେ। ଏହି ତିନିଟି ଯାକ ବିଲର ଉଦ୍ଦେଶ୍ୟ ହେଲା ବିଧାନସଭା ଓ ସଂସଦରେ ମହିଳାଙ୍କ ପାଇଁ ୩୩ ପ୍ରତିଶତ ଆସନ ସଂରକ୍ଷଣ । ଏଥିପାଇଁ ଏହି ତିନି ଦିନିଆ ସ୍ଵତନ୍ତ୍ର ଅଧିବେଶନ ଡକାଯାଇଛି । ବିଧାନସଭା ବିଲ୍ ଉପରେ ଆଲୋଚନା ପାଇଁ ୧୮ ଘଣ୍ଟା ସମୟ ଦିଆଯାଇଛି। ପ୍ରଧାନମନ୍ତ୍ରୀ ମୋଦି ଅପରାହ୍ନ ୩ ଟାରେ ଏହା ଉପରେ ଭାଷଣ ଦେବେ। ୧୭ ଏପ୍ରିଲରେ ଲୋକସଭାରେ ଆଲୋଚନା ପରେ ତିନୋଟି ବିଲ୍ ଉପରେ ଭୋଟିଂ ହେବ। ଏହି ସମୟରେ, ୧୮ ଏପ୍ରିଲରେ ରାଜ୍ୟସଭାରେ ତିନୋଟି ବିଲ୍ ଆଗତ କରାଯିବ, ଯେଉଁଠାରେ ଆଲୋଚନା ପାଇଁ ୧୦ ଘଣ୍ଟା ସମୟ ଦିଆଯାଇଛି। ୧୮ ଏପ୍ରିଲରେ ରାଜ୍ୟସଭାରେ ଆଲୋଚନା ପରେ ଭୋଟିଂ ହେବ।

ଏହି ବିଲ୍ ସପକ୍ଷରେ ୨୦୭ ଜଣ ସାଂସଦ ଭୋଟ୍ ଦେଇଥିବାବେଳେ, ୧୨୬ ଜଣ ଏହାକୁ ବିରୋଧ କରିଛନ୍ତି । ବିରୋଧୀ ଦଳର ସଦସ୍ୟମାନେ ଏହି ବିଲ୍ ଆଗତ କରିବା ବିରୋଧରେ ‘ଡିଭିଜନ ଭୋଟ୍’ ପାଇଁ ଦାବି କରିଥିଲେ। ‘ଡିଭିଜନ’ର ଅର୍ଥ ହେଉଛି ଯେତେବେଳେ ସାଂସଦମାନେ କେବଳ ପାଟିରେ ହଁ କିମ୍ବା ନା ନକହି, ବଟନ୍ ଦବାଇ ବା ସ୍ୱତନ୍ତ୍ର ଭାବେ ନିଜର ଭୋଟ୍ ରେକର୍ଡ କରନ୍ତି ।

ପ୍ରଥମ ବିଲ୍ ହେଉଛି ସମ୍ବିଧାନ (୧୩୧ତମ ସଂଶୋଧନ) ବିଲ୍, ୨୦୨୬ । ଏହି ବିଲ୍ ର ମୁଖ୍ୟ ଉଦ୍ଦେଶ୍ୟ ହେଉଛି ମହିଳା ସଂରକ୍ଷଣକୁ କାର୍ଯ୍ୟକାରୀ କରିବା । ଲୋକସଭା ଏବଂ ରାଜ୍ୟ ବିଧାନସଭାଗୁଡ଼ିକରେ ମହିଳାମାନଙ୍କ ପାଇଁ ୩୩% ଆସନ ସଂରକ୍ଷଣ କରିବାକୁ ଏହି ବିଲ୍ ଆଗତ ହୋଇଛି । ପୂର୍ବରୁ ସଂରକ୍ଷଣ ବ୍ୟବସ୍ଥା ଜନଗଣନା ଏବଂ ସୀମା ନିର୍ଦ୍ଧାରଣ ପରେ ହେବାର ଥିଲା, କିନ୍ତୁ ଏହି ନୂଆ ସଂଶୋଧନ ଦ୍ୱାରା ଏହାକୁ ତ୍ୱରାନ୍ୱିତ କରିବାକୁ ଲକ୍ଷ୍ୟ ରଖାଯାଇଛି ।

ଅନ୍ୟପଟେ ଲୋକସଭାରେ ଆଗତ ୩ ଗୁରୁତ୍ବପୂର୍ଣ୍ଣ ବିଲ୍ କୁ ନେଇ ବିତର୍କ ଜାରି। ୧୫ରୁ ୧୮ ଘଣ୍ଟା ପର୍ଯ୍ୟନ୍ତ ବିଲ୍ ଉପରେ ବିତର୍କ ଚାଲିବା ନେଇ ବାଚସ୍ପତି ସୂଚନା ଦେଇଛନ୍ତି। ତେଣୁ ବିଳମ୍ବିତ ରାତି ପର୍ଯ୍ୟନ୍ତ ଶାସକ-ବିରୋଧୀ ବିତର୍କ ଚାଲିବା ସମ୍ଭାବନା ରହିଛି।

ବିଲ୍ ଉପରେ ଆଲୋଚନା କରିବା ସମୟରେ AIMIM ସାଂସଦ ଅସଦୁଦ୍ଦିନ ଓୱେସି କହିଛନ୍ତି, “ମୁଁ ସମ୍ବିଧାନ ସଂଶୋଧନ ବିଲ୍‌କୁ ବିରୋଧ କରୁଛି। ଏହି ବିଲ୍‌ଗୁଡ଼ିକ କେବଳ ମହିଳା ସଂରକ୍ଷଣ ପାଇଁ ନୁହେଁ। ଏହା ସଂଘୀୟତା ବିରୁଦ୍ଧରେ। ସେହିପରି ସପା ମୁଖ୍ୟ ଅଖିଳେଶ ଯାଦବ ମହିଳା ସଂରକ୍ଷଣ ବିଲ୍ ଉପରେ କହିଛନ୍ତି, “ଏହା ବୁଦ୍ଧିମତ୍ତାର ଏକ ଗୁପ୍ତ ଯୋଜନା। ଆମେ ମହିଳା ସଂରକ୍ଷଣ ବିରୋଧରେ ନୁହେଁ, କିନ୍ତୁ ଆମେ ଯେଉଁ ଶୀଘ୍ର ଏହାକୁ ଅଣାଯାଉଛି ତାହାର ବିରୋଧ କରୁ। ଯଦି ଜନଗଣନା ହୁଏ, ତେବେ ଦେଶ ଜାତିଭିତ୍ତିକ ଜନଗଣନା ଦାବି କରିବ, ଏବଂ ଯଦି ଜାତିଭିତ୍ତିକ ଜନଗଣନା ହୁଏ, ତେବେ ଦେଶ ସଂରକ୍ଷଣ ଦାବି କରିବ, କିନ୍ତୁ ସେମାନେ ଏସବୁକୁ ଏଡାଇବାକୁ ଚାହାଁନ୍ତି।