ଗୁଜରାଟରେ କୋଷ୍ଟଗାର୍ଡ ହେଲିକପ୍ଟର ଦୁର୍ଘଟଣାରେ ୩ ମୃତ

ଗୁଜରାଟର ପୋରବନ୍ଦର ଏୟାରପୋର୍ଟରେ ଏକ ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇଛି । ଅଭ୍ୟାସ ବେଳେ କୋଷ୍ଟଗାର୍ଡ ଏଏଲଏଚ ଧ୍ରୁବ ଦୁର୍ଘଟଣାଗସ୍ତ ହୋଇଛି। ଏହି ଦୁର୍ଘଟଣାରେ ୩ ଜଣଙ୍କ ମୃତ୍ୟୁ ସୂଚନା ମିଳିଛି। ଦୁର୍ଘଟଣା ଘଟିବା ମାତ୍ରେ ଦମକଳ ଓ ମେଡିକାଲ୍ ଟିମ୍ ଘଟଣାସ୍ଥଳରେ ପହଞ୍ଚି ଉଦ୍ଧାରକାର୍ଯ୍ୟ ଆରମ୍ଭ କରିଥିଲେ ।

ଭାରତୀୟ ତଟରକ୍ଷୀ ବାହିନୀର ଅଧିକାରୀ କହିଛନ୍ତି କୋଷ୍ଟଗାର୍ଡ ଏଏଲଏଚ ଧ୍ରୁବ ହେଲିକପ୍ଟର ନିୟମିତ ଅଭ୍ୟାସ ପାଇଁ ଉଡାଣ ଭରିବା ସମୟରେ ଗୁଜରାଟର ପୋରବନ୍ଦରରେ ଦୁର୍ଘଟଣାଗ୍ରସ୍ତ ହୋଇଛି । ଏହି ହେଲିକପ୍ଟର ସର୍ଚ୍ଚ ଅପରେସନ ଓ ଉଦ୍ଧାରକାର୍ଯ୍ୟ, ପରିବହନ, ଆଣ୍ଟି ସବମରିନ ଯୁଦ୍ଧ ସହିତ ଅନେକ ପ୍ରକାରର ମିଶନ ପାଇଁ ସକ୍ଷମ ଥିଲା । ଅଭ୍ୟାସ ସମୟରେ ସେଥିରେ କିଛି ଟେକ୍ନିକାଲ୍ ତ୍ରୁଟି ଦେଖାଦେଇଥିଲା । ଗୁଜରାଟର ପୋରବନ୍ଦର କୋଷ୍ଟଗାର୍ଡ ଏୟାରପୋର୍ଟରେ ଲ୍ୟାଣ୍ଡିଂ ବେଳେ ହେଲିକପ୍ଟରରେ ନିଆଁ ଲାଗି ଯାଇଥିଲା । ହେଲିକପ୍ଟରରେ ଦୁଇ ପାଇଲଟ୍ ସମେତ ତିନି ଯବାନ ବସିଥିଲେ ଏବଂ କ୍ରାସ୍ ସମୟରେ ହେଲିକପ୍ଟରରୁ ଡେଇଁଥିବା ଜଣେ ବ୍ୟକ୍ତିଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିବା ବେଳେ ଆହତ ୨ ଜଣଙ୍କୁ ହସ୍ପିଟାଲ ନିଆଯାଉଥିବା ବାଟରେ ସେମାନେ ଆଖି ବୁଜିଥିଲେ  ।